ރައީސް ޔާމިން އަކީ ކުށެއްނެތް މައުސޫމް ބޭފުޅެއްކަން މިއަދު ސާބިތުވެއްޖެ: ޖަމީލް

ޕީޕީއެމް/ޕީއެންސީގެ ލީޑަރު ރައީސް ޔާމީން އަކި ކުށެއްނެތް މައުސޫމް ބޭފުޅެއްކަން މިއަދު ސާބިތުވެގެން ހިނގައްޖެ ކަމަށް ކުރީގެ ނައިބު ރައީސް ޑރ. މުހައްމަދު ޖަމީލް އަހްމަދު ވިދާޅުވެއްޖެއެވެ.

Ads by Hajj Corporation

އިދިކޮޅު ލީޑަރު، ރައީސް ޔާމީން ގެއަށް ބަދަލު ކުރާތީ، އެމަނިކުފާނުގެ ގެކޮޅު ހުންނަ ސަރަހައްދު، ސަޕޯޓަރުން ފުރާލާފައިވާއިރު އެ ސަރަޙައްދުގައި ހުންނަވައިގެން ނޫސްވެރިންނާއި ބައްދަލުކުރައްވައި ޖަމީލް ވިދާޅުވީ ރައީސް ޔާމީނުގެ ޝަރީއަތް ކުރިއަށް ދިޔަ ގޮތް ހުރިހާ ރައްޔިތުންނަށްވެސް އެނގިވަޑައިގަންނަވާނެކަމަށެވެ.

އަދި ރައީސް ޔާމީނުގެ ޝަރީއަތުގެ ތެރެއިން ފެނިގެން ދިޔައީ ރާއްޖޭގެ ވެރިކަމުގެ ނިޒާމު ތަޢައްޔަރު ވެގެން ދިޔައިމަ ދެން އެހިސާބުން ދެން ހުރި ހުރިހާ ނިޒާމެއްވެސް "ކޮމްޕްރޮމައިސް" ވެގެން ދިޔަތަންކަމަށެވެ.

މީގެ އިތުރުން ރައީސް ޔާމީނުގެ ޝަރީއަތުގައި ކަންތައްތައް ދިމާވި ގޮތް ފަހުމުވާން އަދިވެސް އުދަނގޫފުޅުކަމަށް ފާހަގަކުރައްވަމުން ޖަމީލް ވިދާޅުވީ ދިފާއުން ހުށަހެޅި ހުރިހާ ހެކިތައް ފަނޑިޔާރުން އެއްފަރާތްކުރެއްވީ ކޮން ގޮތަކުންކަން ސާފުނުވާކަމަށާއި ޤާނޫނު އަސާސީގެ 56 ވަނަ މާއްދާގައި ބަޔާންކޮށްފައިވާ ހައްޤު ހިފަހައްޓައި ރިޔާސީ އިންތިޚާބާއި ހަމައަށް ރައީސް ޔާމީނު ހިފަހައްޓާފައިވުމަކީ ސަރުކާރުން އަދުލު އިންސާފުގެ ނިޒާމަށް ފުރިހަމައަށް ނުފޫޒު ފޯރުވި ކަމުގެ ހެއްކެއް ކަމަށެވެ.

"ރާއްޖޭގެ ތާރީޚުގައި މި މިންވަރަށް އަދުލު އިންޞާފުގެ ނިޒާމު ބޭނުންކޮށްގެން ރައްޔިތުންގެ ހައްގުތައް މިގޮތަށް ހިފަހައްޓައި، އެންމެ ފަރުދެއްގެ މައްޗަށް މި މިނަވްރަށް އަނޔާވެރިވުން ރާއްޖޭގެ ތާރީޚުގައި ދެނެއް ހިޔެއް ނުވޭ އަންނާނެހެން" ޖަމީލް ވިދާޅުވިއެވެ.

ޖަމީލް ވިދާޅުވީ ރައީސް ޔާމީނުގެ ޝަރީއަތުގެ މައްސަލައިގައި ވަރަށް ބޮޑެތި ޝަކުވާތައް އެބޭފުޅުންގެ އެބަހުރި ކަމަށާއި ފަނޑިޔާރުގެތަކާއި ސުޕްރީމް ކޯޓުން އެކަމުގައި އަމަލުކޮށްފައިވަނީ ވަރަށް ބޭއިންސާފުންކަމަށެވެ.

"އެހެންވީމާ ވަރަށް ސާފުކޮށް އެބަ އެނގޭ މިއޮތީ ޝަރުއީ ނިޒާމުގެ ތެރެއަށް ސަރުކާރުގެ ނުފޫޒު، އެކަން މިއަދު ސާާފުވެގެން މިދިޔައީ، ރައްޔިތުންގެ ބަސް ބުނެ ނިމުނުތަނާ ހަޤީޤަތުގައި މިއޮތީ ދޫކުރަން މަޖުބޫރުވެފައި، ބަދަލުކުރަން މަޖުބޫރުވެފައި.... މިއަދު ސާބިތުވެއްޖެ ރައީސް ޔާމީނުގެ މައުސޫމުކަން، ރައީސް ޔާމީނުގެ ކުށެއް ނެތްކަން" ޖަމީލް ވިދާޅުވިއެވެ.

ރައީސް ޔާމީން ގެއަށް ބަދަލުކުރައްވާފައިވާއިރު، އިއްޔެ ބޭއްވި ރިޔާސީ އިންތިހާބުގެ ދެވަނަ ބުރުގެ ވަގުތީ ނަތީޖާ ހާމަވުމާ އެކު ރޭ ބޭއްވި ނޫސްވެރިންގެ ބައްދަލުވުމެއްގައި އިންތިޚާބީ ރައީސް ޑރ. މުޙައްމަދު މުޢިއްޒު ވަނީ، ޕީޕީއެމްގެ ރައީސްގެ މަޤާމުގައި ހުންނެވި ޔާމީން ވަގުތުން ވަގުތަށް ގެއަށް ބަދަލު ކުރަން އެދިވަޑައިގެންފައެވެ.