ރޮޒެއިނާއަށް ދައުލަތުން ބަދަލުދޭންޖެހުނުތޯ ސާފުކުރުމަށް ސިޓީއެއް ފޮނުވައިފި

ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެންބަރު ރޮޒެއިނާ އާދަމަށް ދައުލަތުން ބަދަލުދޭންޖެހުނުތޯ ބެލުމަށް ރައީސް އޮފީހަށް އެކަމަނާ ސިޓީއެއް ފޮނުއްވައިފިއެވެ.

Ads by STELCO

މިކަން ހާމަކޮށް ރޮޒެއިނާ ރައީސް އޮފީހަށް ފޮނުއްވި ސިޓީގައި ވިދާޅުވީ ރައީސް އޮފީހުގައި އޮންނަ ބަދަލުދޭ ކޮމިޓީއަކުން ގެއްލުމުގެ ބަދަލަކަށް އެ ކަމަނާއަށް 2 ރަށާއި ފަޅަކާއި 30 މިލިއަން ރުފިޔާ ދޭން ނިންމާފައިވާ ކަމަށް 'ދެންމެ' ކިޔާ އޮންލައިން ނޫހެއްގައި ލިޔެފައި އޮތުމުގެ ސަބަބުން ވަރަށް ގިނަ މީހުންނަށް ވަނީ މިއީ ހަޤީޤަތުގައިވެސް ހިނގާފައިވާ ކަމެއް ކަމަށް ޤަބޫލު ކުރެވިފައި ކަމަށެވެ.

އެހެން ނަމަވެސް މިއަދާއި ހަމައަށްވެސް، އެ އޮފީހުގެ ފަރާތުން އެ ކަމަނާއަށް މިފަދަ ބަދަލެއް ދޭންއުޅޭ ކަމެއްވެސް، އަދި މިއީ ކޮން ކަމަކާއި ގުޅިގެން ދޭން އުޅޭ ބަދަލެއް ކަމެއްވެސް އަންގާފައިނުވާ ކަމަށް ރޮޒެއިނާ ވިދާޅުވިއެވެ. އަދި އެއްވެސް ކަމަކާއި ގުޅިގެން ރައީސް އޮފީހުން ބަދަލެއް ދޭންޖެހޭ ކަމެއް މިހާތަނަށް އެނގިވަޑައިގެންފައި ނުވާކަމަށްވެސް ރޮޒެއިނާގެ ސިޓީގައި ވިދާޅުވެފައި ވެއެވެ.

އެހެންކަމުން ރައީސް އޮފީހުން މިފަދަ އެއްވެސް ނިންމުމެއް ނިންމަފައި ވޭތޯ ސާފުކޮށްދެއްވުމަށް ރޮޒެއިނާގެ ސިޓީގައި ވަނީ އެދިވަޑައިގެންފައެވެ.

މީގެ އިތުރުން ރައީސް އޮފީހަށް ރޮޒެއިނާ ފޮނުއްވި ސިޓީ ސޯޝަލް މީޑިއާގައި އާންމު ކުރައްވާ އެ ކަމަނާ ވިދާޅުވީ ސިޓީގެ ޖަވާބު ލިބުމުންވެސް އާންމު ކުރައްވާނެ ކަމަށެވެ.