ރައީސް ނަޝީދު މަޤާމުން ވަކިކުރަން އެއްވެސް ފުރުސަތެއް ނުދޭނަން: އާޒިމް

ރައްޔިތުންގެ މަޖިލީހުގެ ރައީސް މުހައްމަދު ނަޝީދު މަގާމުން ވަކިކުރަން ހުށަހަޅާފައި އޮތް ހުށަހެޅުން ބަލައިގަނެގެން ވަކިކުރެވޭނެ އެއްވެސް ފުރުސަތެއް ނުދޭނެކަމަށް ރައްޔިތުންގެ މަޖިލީހުގެ މެދު ހެންވޭރު ދާއިރާގެ މެމްބަރު އަލީ އާޒިމް ވިދާޅުވެއްޖެއެވެ.
ޑިމޮކްރެޓްސްއިން މިރޭ ބޭއްވި ޖަގަހަ ޖަލްސާގައި ވާހަކަފުޅުދައްކަވަމުން އާޒިމް ވިދާޅުވީ އެމްޑީޕީ އެހެން އުޅެގެން އަނެއްކާވެސް ބޮޑު ނާކާމިޔާބީއަކާ ކުރިމަތިލާން ޖެހޭނެ ކަމަށާއި ރައީސް ނަޝީދުގެ އިތުބާރު ނެތް ކަމުގެ މައްސަލައަކީ "ކުޅޭކުޅޭ" މައްސަލައަކަށް އެމްޑީޕީން ހަދައިފިކަމަށެވެ. އެހެންކަމުން އެމްޑީޕީ ބޭނުންހާގޮތަކަށް އުޅެން ފުރުޞަތު ނުދެއްވާނެކަމަށާއި މިދިޔަ މަހު ބޭއްވި ރިޔާސީ އިންތިހާބުން އެމްޑީޕީ ބަލިވެފައިވާއިރު، ރައީސް ނަޝީދުގެ އިތުބާރު ނެތްކަމުގެ މައްސަލަ މަޖިލީހަށް ވައްދައިގެން އަނެއްކާވެސް އެ ޕާޓީ "ބޮޑުތަނުން ބަލިވާނެ" ކަމަށް އާޒިމް ވިދާޅުވި އެވެ. "އަނެއްކާވެސް އެމްޑީޕީ ތި ދަނީ ބަލިވާންށޭ، ބޮޑުތަނުން ބަލިވާންށޭ. އަޅުގަނޑުމެން އިރާދަކުރެއްވިއްޔާ ރައްޔިތުންގެ މަޖިލީހުގައި ތިބެގެން، މަޖިލީހުގެ ރައީސް ވަކިކުރަން ހުށަހަޅާފައި އޮތް ހުށަހެޅުން ބަލައިގަނެގެން ވަކިކުރެވޭނެ އެއްވެސް ގޮތެއް، އެ ފުރުސަތެއް ނުދޭނަމޭ" އާޒިމް ވިދާޅުވިއެވެ. މީގެ އިތުރުން، ރާއްޖޭގައި އުފެދުނު އެންމެ ބޮޑު ސިޔާސީ ޕާޓީ ކަމަށްވާ އެމްޑީޕީ މިދިޔަ ފަސް އަހަރުގެ ތެރޭގައި ފުނޑުފުނޑުވެފައިވާކަން ފާހަގަކުރައްވަމުން އާޒިމް ވިދާޅުވީ ދައުލަތުގެ ހުރިހާ ބާރެއް ލިބިގެން ވެސް އެ ޕާޓީއަށް އެއްވެސް ނަތީޖާއެއް ނުނެރެވުނުކަމަށާއި އަދި ރައްޔިތުންގެ ކުރިމަތީގައި ފެއިލްވެއްޖެކަމަށެވެ. އަދި އެހެން އެވީ ރައީސް ޞާލިޙުގެ ނާގާބިލު ކަމުން ކަމަށްވެސް އާޒިމް ވިދާޅުވިއެވެ."ނަޝީދު ވަކިކުރަން ވެސް އުޅެނީ، ރިޔާސީ އިންތިހާބުގައި ރައީސް އިބްރާހިމް މުހައްމަދު ސޯލިހަށް ކުރިމަތިލައްވަން ޖެހުނު ބޮޑު ނާކާމިޔާބީ އަށް ފަހު އެމަނިކުފާނުގެ "ހިތަށް ތަސައްލީއެއް ގެނެސްދިނުމަށްޓަކައި" ... އަޅުގަނޑުގެ ކުރީގެ ކޮލީގުން، އެމްޑީޕީގެ މެމްބަރުންނަށް ދަންނަވާލަން ބޭނުންވަނީ ރިޔާސީ އިންތިހާބަކުން ބަލިވުމަކީ ރައްޔިތުންގެ މަޖިލީހުގެ ރައީސްގެ އިތުބާރު ނެތްކަމުގެ މައްސަލަ ހުށަހަޅަން ޖެހޭ ސަބަބެއް ނޫނޭ. އެހެން ކަމަށް ވަންޏާ މި ކަހަލަ ވާދަވެރި އިންތިހާބުތަކުގައި ރައީސް ވާދަނުކުރައްވާ،" އާޒިމް ވިދާޅުވި އެވެ.
އެމްޑީޕީގެ ކުރީގެ ރައީީސް ނަޝީދުގެ އިތުބާރު ނެތްކަމުގެ މައްސަލަ އެމްޑީޕީގެ ފަރާތުން މަޖިލީހަށް ވެއްދީ 49 މެމްބަރުންގެ ސޮޔާއެކުއެވެ. ރައީސް ނަޝީދު ވަކި ކުރުމުގެ މައްސަލަ އަންނަ އާދީއްތަ ދުވަހަށް އެޖެންޑާ ކުރުމަށް ރައްޔިތުންގެ މަޖިލީހުގެ އިދާރާ އިން ވަނީ ނިންމައިފައެވެ. އެމްޑީޕީން ވަނީ މި މައްސަލަ ނުނިންމާ މަޖިލީހުގެ އެހެން އެއްވެސް މަސައްކަތެއް ދެން ނުކުރާނެ ކަމަށް ބުނެފައެވެ.





ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.