4،000 ފްލެޓް ދޭން ހަމަޖެހިފައިވަނީ ޕޮއިންޓް ލިބުނު ތަރުތީބުން: ހައުސިން މިނިސްޓްރީ
'ގެދޮރުވެރިޔާ' ސްކީމުގެ ދަށުން ފުރަތަމަ 4،000 ފްލެޓް ދޭނީ ޕޮއިންޓް ލިބުނު ތަރުތީބުން ކަމަށް ހައުސިންގެ ސްޓޭޓް މިނިސްޓަރު އަކުރަމް ކަމާލުއްދީން މިއަދު ވިދާޅުވެއްޖެއެވެ.
އަކްރަމް ވިދާޅުވީ އަންނަ އާދިއްތައިގެ ކުރިން ދާއިމީ ލިސްޓު އާންމުކުރަން މަސައްކަތް ކުރަމުން އަންނަ ކަމަށާއި އެ ލިސްޓުގައި ހިމެނޭ ފަރާތްތަކަށް ދީފައިވާ ޕޮއިންޓު ވެސް ފެންނަން ހުންނާނެ ކަމަށެވެ.
އަދި ފްލެޓް ދޫކުރާނީ އެންމެ މަތިން ޕޮއިންޓް ލިބިފައިވާ މީހުންނަށް ކަމަށާއި، ފްލެޓް ލިބޭ މީހުންގެ ލިސްޓް މިމަހުގެ 5 ވަނަ ދުވަހުގެ ކުރިން އާންމު ކުރާނޭ ކަމަށް އަކްރަމް ވިދާޅުވިއެވެ.
އަކްރަމް މިފަދައިން ވިދާޅުވީ މިސަރުކާރުގެ ގެދޮރުވެރިޔާ ސްކީމްގެ ދަށުން ދޭން ނިންމާފައިވާ 4،000 ފްލެޓް އެއްވެސް އުސޫލެއްނެތި ބަހަން އުޅޭކަަމަށް ތުހުމަތުކޮށް އޭސީސީއަށް މިއަދު އަމިއްލަ ފާރާތަކުން މައްސަލަ ހުށަހެޅުމާއި ގުޅިގެންނެވެ.
އޭސީސީއަށް މިއަދު ހުށަހެޅި މައްސަލާގައި ބުނެފައިވަނީ، ފްލެޓް ލިބުނު ފަރާތްތަކަށް ޕޮއިންޓް ލިބުނު ގޮތް މިހާތަނަަށްވެސް ސަރުކާރުން ހާމަކޮށްފައި ނުވާކަމަށެވެ. އަދި ފްލެޓް ހަވާލުކުރާނީ ލިބޭ ފަރާތްތަކުގެ ދިރިއުޅުމުގެ ހާލަތަށް ބަލާފައިކަމަށް ބުނެފައިވި ނަމަވެސް ސަރުކާރުގެ ކަމާއި ގުޅުންހުރި އިދާރާތަކުން އެކަން ކޮށްފައި ނުވާކަމަށާއި، އަދި އެކަމަށް މިހާރު ވަގުތުވެސް ނެތްކަމަށް ވެސް އެ މައްސަލާގައި ބުނެފައިވެއެވެ.
Ads by STO
