ޔުނިސެފް ރެޕްރެޒެންޓޭޓިވް، މެޑަމް ފަޒްނާއާ ބައްދަލު ކުރައްވައިފި

ޔުނައިޓެޑް ނޭޝަންސް ޗިލްޑްރަންސް ފަންޑް (ޔުނިސެފް)އިން ރާއްޖެއަށް ކަނޑައަޅުއްވާފައި ހުންނަވާ ރެޕްރެޒެންޓޭޓިވް، ޑރ.އެޑްވަރޑް އަޑައީ، ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަޙުމަދުގެ އަރިހަށް އިޙްތިރާމުގެ ޒިޔާރަތެއް ކުރައްވައިފިއެވެ.
މި ބައްދަލުކުރެއްވުން އޮތީ މުލިއާގޭގައެވެ.
މި ބައްދަލުކުރެއްވުމުގައި މެޑަމް ފަޒްނާ ވަނީ، ޔުނިސެފްގެ ފަރާތުން ރާއްޖެއަށް އަބަސްދުވެސް ފޯރުކޮށްދެއްވަމުންދާ އެހީތެރިކަމާއި އެއްބާރުލުން ފާހަގަކުރައްވާ، އެކަންކަން ބަލައިގަނެ ޝުކުރު އަދާކުރައްވާފައެވެ.
އެގޮތުން ކުޑަކުދިންގެ ސަލާމަތާއި ރައްކާތެރިކަން ކަށަވަރުކުމާއި، ކުޑަކުދިންނާއި ގުޅޭ އުސޫލުތައް ކަނޑައަޅާ، ރާއްޖޭގައި މި ދާއިރާއިން ކުރަމުންދާ މަސައްކަތް ތަކުގައި ޔުނިސެފުން ދެމުންދާ ޚާއްސަ އަހަމިއްޔަތު އެކަމަނާ ފާހަގަކުރެއްވިއެވެ. އަދި ޔުނިސެފާއި ރާއްޖެއާއި ގުޅިގެން، މިދާރާއިން އިތުރަށް ތަރައްޤީ ހޯދުމަށް ކުރެވޭނެ ކަންކަމާއި ގުޅޭގޮތުން ދެބޭފުޅުން ވަނީ މަޝްވަރާ ކުރައްވާފައެވެ.
މި ބައްދަލުވުމުގައި ޔުނިސެފްގެ ރެޕްރެޒެންޓޭޓިވް ޑރ.އެޑްވަރޑް އަޑައީ ވަނީ، މި ދާއިރާއިން މި ވަގުތު ކުރިއަށްދާ މުހިންމު މަސައްކަތްތަކާއި، ކުޑަކުދިންގެ ޙައްޤުތައް ޙިމާޔަތްކުރުމުގައި ކުރިއަށް އޮތްތަނުގައި ރާއްޖެއާއި ގުޅިގެން ކުރިއަށް ގެންދެވުމަށް ރާވާފައިވާ ކަންކަމުގެ މަޢުލޫމާތު ޙިއްސާކުރައްވާފައެވެ
މިގޮތުން ޑރ. އެޑްވަރޑް އަޑައީ ވަނީ ތުއްތު ކުދިންގެ ނަފްސާނީ ދުޅަހެޔޮކަމާއި، ޒުވާނުންނަށް ކުރިމަތިވާ މިފަދަ މައްސަލަތަކާއި، ދުޅަހެޔޮ ސިއްޙަތުގައި ބޮޑުވާ ޖީލެއް ބިނާކުރުމާއި، ކުދިން ރަނގަޅަށް ތަރުބިއްޔަތު ކުރުމުގައި އެކި ދާއިރާތަކުގެ ދައުރާއި ގުޅޭގޮތުން ހިންގުމަށް ހަމަޖެހިފައިވާ ޕްރޮގްރާމްތަކުގެ މަޢޫލޫމާތު ޙިއްސާކުރައްވާފައެވެ.
މީގެ އިތުރުން މެޑަމް ފަޒްނާ ވަނީ، ޔަހޫދީ އިސްރާއިލުން ޣައްޒާއަށް ދެމުންދާ ޙަމަލާތަކުގައި ހާލުގައިޖެހިފައިވާ ކުޑަކުދިންނަށް އެހީވުމަށް ޔުނިސެފުން ފޯރުކޮށްދެމުންދާ އެހީތެރިކަން ފާހަގަކުރައްވާފައެވެ.
މި ބައްދަލުކުރެއްވުން ނިންމަވާލައްވަމުން ޔުނިސެފްގެ ރެޕްރެޒެންޓޭޓިވް ވަނީ، ކުޑަކުދިންގެ ޙައްގުތައް ޙިމާޔަތްކުރުމާއި އިޖްތިމާޢީ ދާއިރާއިން މެޑަމް ފަޒްނާ ކުރައްވާ މަސައްކަތްޕުޅުތަކަށް ތަޢުރީފުކުރައްވާ ހިތްވަރު ދެއްވާފައެވެ.







ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.