ގާނޫނު އަސާސީއާ ހިލާފަށް އެއްވެސް ކަމެއް ނުކުރާނަން: ރައީސް

އެމަނިކުފާނު ހުންނެވީ ﷲ ގަންދީ ހުވާކުރަައްވައިގެން ކަމަށާއި ގާނޫނޫ އަސާސީއާ ހިލާފަށް އެއްވެސް ކަމެއް ނުކުރައްވާނެ ކަމަށް ރައީސް ޑރ. މުޙައްމަދު މުޢިއްޒު މިރޭ ވިިދާޅުވެއްޖެއެވެ.

Ads by MWSC

އުތުރުގެ އަތޮޅުތަކަށް ކުރައްވަމުން ގެންދަވާ ދަތުރުފުޅުގެ ތެރެއިން ނ. މަނަދޫގައި ބޭއްވި ޖަލްސާގައި ވާހަކަފުޅުދައްކަވަމުން ރައީސް ވިދާޅުވީ އެއްވެސް ހުވަޔެއް ނުކުރެއްވިޔަސް އެމަނިކުފާނު ވިދާޅުވާ ކޮންމެ ބަސްފުޅެއްގައި އިތުބާރު އޮންނާނެ ކަމަށެވެ.

"އަޅުގަނޑު އަބަދުވެސް މަސައްކަތް ކުރާނީ ރައްޔިތުންނަށްޓަކައި، ގާނޫނީ އިމުގެ ތެރެއިން. އަޅުގަނޑު ރައްޔިތުންނަށް، މުޅި ރާއްޖޭގެ ރައްޔިތުންނަށް ދޭން ބޭނުންވާ ފުރިހަމަ ޔަގީންކަމަކީ ހަމަ އެއްވެސް ކަމެއް ނުކުރާނަމޭ ގާނޫނުއަސާސީއާ ހިލާފަކަށް. އެއްވެސް ކަމެއް އަޅުގަނޑުގެ ކިބަޔަކުން ނުފެންނާނެ، ނުވެސް ކުރާނަން، ގާނޫނުއަސާސީއާ ހިލާފަކަށް،" ރައީސް ވިދާޅުވިއެވެ.

ގާނޫނު އަސާސީއާ ހިލާފުވެވަޑައިނުގަންނަވާނެ ކަމަށް ރައީސް ވިދާޅުވެފައިވާއިރު އިންތިހާބުތައް ރޯދަ މަހު ނުބޭއްވޭނެ ކަމަށް ކަނޑައަޅާ ބިލް މަޖިލީހުން ދެވަނަ ފަހަރަށް ފާސްކުރި ނަމަވެސް، އެ އިންތިހާބު އޮންނާނީ ރޯދަ މަހުގެ ހަތް ވަނަ ދުވަސް ކަމަށްވާ މާޗު 17 ގައި ކަމަށް މިއަދު ނ. މަނަދޫގައި ރައީސް ވިދާޅުވެފައިވެއެވެ.

މިނިވަން އަދި އިންސާފުވެރި އިންތިހާބަކަށް ހުރަސް އެޅިދާނެ ކަމަށް ބުނެ އެ ބިލު، ތަސްދީގު ނުކުރައްވައި އަނބުރާ މަޖިލީހަށް ފޮނުވާލީ މިދިޔަ އާދީއްތަ ދުވަހެވެ. އިތުރު ބަދަލެއް ނުގެނެސް އެ ބިލު މިއަދު ފާސްކޮށްފައިވާއިރު، ފެންނަ ކަމަށް ވޯޓު ދެއްވީ 47 މެންބަރުންނެވެ. ނުފެންނަ ކަމަށް ވޯޓުދިނީ 14 މެންބަރުންނެވެ.

ގާނޫނުއަސާސީގެ 91 ވަނަ މާއްދާގެ ށ. ގައި ބުނެފައިވާ ގޮތުންނަމަ ރައްޔިތުންގެ މަޖިލީހަށް ރައީސުލްޖުމްހޫރިއްޔާ އަނބުރާ ފޮނުވާ ބިލަކާމެދު އަލުން ވިސްނުމަށްފަހު، އެ ބިލަށް އެއްވެސް ބަދަލެއް ނުގެނެސް، އެ ބިލު ރައްޔިތުންގެ މަޖިލީހުގެ ޖުމްލަ މެންބަރުންގެ އަގުލަބިއްޔަތުން ފާސްވެއްޖެނަމަ، އެ ބިލެއް ރައީސުލްޖުމްހޫރިއްޔާ ތަސްދީގުކޮށް، ސަރުކާރުގެ ގެޒެޓްގައި ޝާއިއުކުރަން ވާނެއެވެ.