ހަޔާ އެޑިއުކޭޝަންގެ އެކްޝަން ޕްލޭން އެކުލަވާލަން ފަށައިފި
ހަޔާ އެޑިއުކޭޝަން ލޭބާ އެންޑް ސްކިލްސް ޑެވެލޮޕްމެންޓު 2024-2028 ގެ އެކްޝަން ޕްލޭން އެކުލަވާލުމުގެ މަޝްވަރާ ފަށައިފިއެވެ.
މީރުމާ އިވެންޓުހޯލުގައި މިއަދު މި އެކްޝަން ޕްލޭނު އެކުލަވާލަން ބޭއްވޭ ވޯކްޝޮޕު އިފްތިތާހުކޮށްދެއްވާފައި ވަނީ މިނިސްޓަރ ޑރ މަރިޔަމް މާރިޔާއެވެ.
ހަޔާ އެޑިއުކޭޝަންގެ ދަށުން ކުރިއަށް ގެންދާ މި ވޯކްޝޮޕްގައި މޯލްޑިވްސް ނޭޝަނަލް ސްކިލްސް ޑިވެލޮޕްމެންޓު އޮތޯރިޓީ (އެމްއެންއެސްޑީ)، މޯލްޑިވްސް ކޮލިފިކޭޝަން އޮތޯރިޓީ (އެމްއެންކިއުއެފް)، މޯލްޑިވްސް ޕޮލީޓެކްނިކު، ލޭބާ ރިލޭޝަންސް އޮތޯރިޓީ އަދި ޖޮބް ސެންޓާ އިން ވަނީ ބައިވެރިވެފައިއެވެ.
މި ވޯކްޝޮޕް ކުރިއަށް ގެންގޮސްފައި ވަނީ 9 ގަޑިއިރަށެވެ.
މި ވޯކްޝޮޕް ފައްޓަވައިދެއްވަމުން މިނިސްޓަރު ޑރ. މަރިޔަމް މާރިޔާ ވާހަކަފުޅު ދައްކަވަމުން ވަނީ ކުރިއަށް އޮތް ފަސް އަހަރުގެ ރާސްތާ ޕްލޭނާއި ބެހޭގޮތުން ވާހަކަފުޅު ދައްކަވާފައިއެވެ. އަދި މެންޑޭޓަށް މަސައްކަތް ކުރުމަށް މިޙާރު ހުރި ގޮންޖެހުން ތަކާއި މެދުވެސް މިނިސްޓަރު ވަނީ ވާހަކަދައްކަވާފައިއެވެ.
މިނިސްޓަރު ވަނީ މިހާރު މި ދާއިރާގައި އޮންނަ ވިޝަން އާއި މިޝަން ބަދަލުކޮށް، މި ދާއިރާއާއި ގުޅުން ހުރި ސިޔާސަތުތައްވެސް ކަނޑައަޅުއްވާން މަޝްވަރާކުރެވިގެން ދާނެ ކަމަށް ވިދާޅުވެފައިއެވެ.
މި އެކްޝަން ޕްލޭނުގެ ދަށުން މިނިސްޓްރީން ވަނީ މަތީ ތައުލީމުގެ ދާއިރާއަށް އެތަށް ހެޔޮ ބަދަލަކާއި ކުރިއެރުވުންތަކެއް ގެންނަން މަސައްކަތްތަކެއް ކުރަން ނިންމާފައިއެވެ.
އެގޮތުން ރާއްޖެއިން ބޭރުގައި މަތީ ތައުލީމް ހާސިލް ކުރަމުން އަންނަ ދަރިވަރުންގެ ކިޔެވުމުގެ ފެންވަރު އިތުރުކޮށް މިހާރު ރާއްޖޭގައި މަތީ ތައުލީމު އަދާކުރަމުން އަންނަ ދަރިވަރުންނަށް މިއަށް ވުރެންވެސް ރަނގަޅު ފެންވަރުގައި މަތީ ތައުލީމް ހާސިލް ކޮށްދިނުމަށް ކުރެވޭނެ މަސައްކަތްތައް މި އެކްޝަން ޕްލޭނުގައި މަޝްވަރާކުރެވިގެން ދާނެއެވެ.
