ތިން ބިލެއް މިއަދު ތަސްދީގު ކުރައްވައިފި
ރައްޔިތުންގެ މަޖިލީހުން މިމަހުގެ 18 ވަނަ ދުވަހު ފާސްކޮށްފައިވާ ތިން ބިލެއް މިއަދު ރައީސް އިބްރާހިމް މުޙައްމަދު ޞާލިޙު ތަސްދީގު ކުރައްވައިފިއެވެ.
އެގޮތުން މިއަދު ތަސްދީގު ކުރައްވާފައިވަނީ ވިޔަފާރީގެ ދާއިރާގައި ވާދަވެރިކަން އުފައްދައި ދެމެހެއްޓުމުގެ ބިލާއި، މުދާ ގަންނަ ފަރާތްތަކާއި ހިދުމަތް ލިބިގަންނަ ފަރާތްތައް ހިމާޔަތްކުރުމުގެ ބިލާއި، އެއްގަމު ދަތުރުފަތުރުގެ ގާނޫނަށް ހަތަރުވަނަ އިސްލާހު ގެނައުމުގެ ބިލެވެ.
މީގެތެރެއިން ވިޔަފާރީގެ ދާއިރާގައި ވާދަވެރިކަން އުފައްދައި ދެމެހެއްޓުމުގެ ބިލަކީ ދިވެހިރާއްޖޭގައި ވިޔަފާރީގެ ދާއިރާގައި ވާދަވެރިކަން އުފައްދައި ދެމެހެއްޓުމަށާއި، ވިޔަފާރީގެ ދާއިރާގައި ވާދަވެރިކަން ހަނިވާގޮތަށް ހިންގާ ވިޔަފާރީގެ އަމަލުތަކުގެ ސަބަބުން ގައުމުގެ އިގްތިސާދީ ކުރިއެރުމަށް ކުރާ ނޭދެވޭ އަސަރުތައް ހުއްޓުވުމަށްޓަކައި ވިޔަފާރީގެ ދާއިރާގެ ވާދަވެރިކަމަށް ހުރަސްއަޅާ އެއްބަސްވުންތަކާއި ވިޔަފާރީގެ އަމަލުތައް މަނާކުރުމަށް އެކުލަވާލައިފައިވާ ބިލެކެވެ.
މުދާ ގަންނަ ފަރާތްތަކާއި ހިދުމަތް ލިބިގަންނަ ފަރާތްތައް ހިމާޔަތްކުރުމުގެ ބިލުގައި ބުނެފައި ވަނީ މުދާ ގަންނަ ފަރާތްތަކާއި ހިދުމަތް ހޯދާ ފަރާތްތަކަށް ހިމާޔަތް ލިބިދެވޭ ގޮތަށް ގިނަ މާއްދާތަކެއް ހިމަނާފައިވާނެ ކަމަށެވެ. އެގޮތުން މައްސަލަ ޖެހިފައިވާ މުދަލެއް ގަތުމާއި ގުޅިގެން ލިބޭ ގެއްލުމުގެ ބަދަލު ހޯދުމަށް ދައުވާ ކުރުމުގެ ހައްގު އެ މުދަލެއް ގަންނަ ފަރާތަށް ލިބިގެންވާ ކަމަށް ބިލުގައި ވަނީ ބުނެފަ އެވެ.
އެއްގަމު ދަތުރުފަތުރުގެ ގާނޫނަށް ހަތަރު ވަނަ އިސްލާހު ގެނައުމުގެ ބިލުގައި އެއްގަމު ދަތުރުފަތުރުގެ ގާނޫނުގެ ދަށުން ކުރެވޭ ޖޫރިމަނާއާ ގުޅިގެން ޓްރާންސްޕޯޓް މިނިސްޓްރީއަށް ޝަކުވާ ހުށަހެޅޭނެ ނިޒާމެއް އެ މިނިސްޓްރީއިން ގާއިމުކުރަން ޖެހޭނެ ކަމަށް ކަނޑައަޅައިފައިވެއެވެ.
