މާލެ ފިޔަވައި އެހެން ރަށެއްގައި ކޮވިޑުގެ ކޮމިޔުނިޓީ ސްޕްރެޑެއް ނެތް: ރައީސް
މާލެ ފިޔަވައި އެހެން ރަށެއްގައި ކޮވިޑުގެ ކޮމިޔުނިޓީ ސްޕްރެޑެއް ނެތް ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.
“ކޮވިޑު ހުއްޓުވާނީ އަހަރެން!” ކެމްޕޭން އިފްތިތާހު ކުރުމަށް މިރޭ ބޭއްވި ޙަފުލާގައި ޝަރަފުވެރިކަން ކޮށްދެއްވައި ރައީސް އިބްރާހިމް މުހައްމަދު ޞާލިހު ވިދާޅުވީ، ބަލި ނެތް ރަށްރަށުން ބަލި ފެނުނު ކަމުގައި ވީ ނަމަވެސް އިތުރު ބޮޑު ކޮމިއުނިޓީ ސްޕްރެޑަކަށް ދިއުމުގެ ކުރިން ސިއްހީ ހިދުމަތްތެރިން މަސައްކަތް ކުރައްވަމުން ގެންދަވާ ކަމަށެވެ.
ރައީސް ވިދާޅުވީ އެ މެސެޖަކީ ރާއްޖެއަށް އަންނަން ބޭނުންވެފައި ތިބި ބޭރުގެ އެތައް ފަތުރުވެރިންނަށް ފޯރުކޮށްދޭން ޖެހޭ މެސެޖެއް ކަމަށެވެ.
މިރޭ ފެށިގެން މިދިޔަ ކެމްޕޭނުގެ ތެރެއިން ރައީސް އިބްރާހިމް މުޙައްމަދު ޞާލިހު ވިދާޅުވީ މިމެސެޖު ރާއްޖެއިން ބޭރަށް ފޯރުކޮށްދިނުމަކީ މުހިންމު ކަމެއް ކަމަށާއި، ހުރިހާ ނޫސްވެެރިން ވެސް އެއްއަޒުމެއްގައި ކޮންމެ ކަމެއް ކުރަން ތެދުވެއްޖެނަމަ ކޮންމެ ކަމެއްވެސް ހާސިލު ކުރަން ފަސޭހަވެގެން ދާނެ ކަމެއް ކަމަށެވެ.
"ކޮވިޑް ހުއްޓުވާނީ އަހަރެން" ގައުމީ ކެމްޕޭނަކީ ރާއްޖޭގެ އެޑިޓާސް ގިލްޑުން އިސްނަގައިގެން ރާއްޖޭގެ އޮންލައިން ނޫސްތަކާއި ޓީވީ، އަދި ރޭޑިއޯގެ އިތުރުން ނިއު މީޑިއާ ގުޅިގެން ކޮވިޑާގުޅޭ ގޮތުން ރައްޔިތުންގެ ހޭލުންތެރިކަން އިތުރުކޮށް ބަލި ކޮންޓްރޯލުކުރުމަށް ހާއްސަ މަސައްކަތްތަކެއް ކުރުމުގެ މަގުސަދުގައި ފެށި ކެމްޕޭނެކެވެ.
