ކުރީ ސަރުކާރުން ގޯތިތައް ދިނީ ހިނގާނެ މަގެއް ވެސް ނުލައި، ހުސް ގޮޅި ކުރަހާފައި: ރައީސް
ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގެ ފަހުކޮޅު މާލޭ ސަރަހައްދުން ގޯތީގެ ނަމުގައި ދޫކޮށްފައިވަނީ 'ގޮޅި'ތަކެއް ކަމަށާއި، މި ސަރުކާރުން ބޯހިޔާވަހިކަމުގެ މަސައްކަތް ކުރިއަށްގެންދަނީ ޕްލޭނާއެކު ކަމަށް ރައީސް ޑރ މުހައްމަދު މުއިއްޒު މިރޭ ވިދާޅުވެއްޖެއެވެ.
މި މަހުގެ 21 ވަނަ ދުވަހު އޮންނަ ރައްޔިތުންގެ މަޖިލީހުގެ އިންތިހާބުގައި ޕީޕީއެމް/ޕީއެންސީގެ ޓިކެޓުގައި މައްޗަންގޮޅި އުތުރަށް ވާދަކުރައްވާ އިބްރާހިމް މުހައްމަދު (ޖަނާބު އިއްބެ) ގެ ކެމްޕޭނު ބައްދަލުވުމުގައި ރައީސް މުއިއްޒު ވަނީ އެމަނިކުފާނުގެ ސަރުކާރުން ކުރިއަށްގެންދާ ބޯހިޔާވަހިކަމުގެ މަޝްރޫއުތަކާ ގުޅޭ ގޮތުން ވާހަކަފުޅު ދައްކަވާފައެވެ. އަދި ސޯލިހުގެ ސަރުކާރުގައި ދައުރުގެ ފަހުކޮޅު ގޯއްޗާއި ފްލެޓް ދިން ގޮތާއި މެދު ފާޑު ވިދާޅުވެފައެވެ. ރައީސްގެ ވާހަކަ މައިގަނޑު ގޮތެއްގައި ބިނާކުރެއްވީ ނިމިދިޔަ ފަސް އަހަރުގައި ބޯހިޔާވަހިކަން ހޯދައި ދިނުމަށް ވީ ވައުދު ފުއްދައި ނުދެވުނު ކަމެވެ.
ރައީސް މުއިއްޒު ވިދާޅުވީ ރައްޔިތުން މި ސަރުކާރު އިންތިހާބުކުރީ އެމްޑީޕީ މަތިން ފޫހިވެގެން ކަމަށެވެ. ވަކިން ހާއްސަކޮށް މާލޭގެ ރައްޔިތުންނަށް ބޯހިޔާވަހިކަން ހޯދައިދޭންވީ ވައުދު ފުއްދިފައިނުވާތީ ކަމަށެވެ. 2018 ވަނަ އަހަރުވެސް ވެރިކަމަށް އައުމަށް ކެމްޕޭނު ތެރޭގައި އެމްޑީޕީން ރައްޔިތުން ގާތުގައި ވައުދުވީ ބޯހިޔާވަހިކަން ކަށަވަރުކޮށްދޭނެ ކަމުގެ ވައުދެވެ. އެކަމަކު ވެރިކަމާއެެކު މަޖިލީހުގެ ސުޕަ މެޖޯރިޓީ ލިބުމުންވެސް އެކަންވީ ގޮތް ރައްޔިތުންނަށް ސާފުކޮށް އެނގޭނެ ކަމަށް ވިދާޅުވިއެވެ.
''މަޖިލީހުގެ ސުޕަ މެޖޯީރިޓީ ދީ ސަރުކާރު ދިނީމާވެސް މާލޭގެ ރައްޔިތުންނަށް އެންމެ މުހިއްމުވި ކަންތަކުގައި ހަމަ އިސްކަން ނުދީ އެތައް ދުވަސްތަކެއް އެތައް މަސްތަކެއް އަހަރުތަކެއް ވޭތުވެެެގެން ދިޔައީ''
މާލޭގެ މޭޔަރުކަން ކުރެއްވި ރައީސް މުއިއްޒު ވިދާޅުވީ ގުޅިފަޅުގައި ޕޯޓް އަޅާއިގެން ބިން ގެއްލުވާލުމުގެ ބަދަލުގައި އެ ޕޯޓްު ތިލަފުއްޓަށް ބަދަލުކޮށްދޭން ކުރީގެ ރައީސް އަރިހު އެދިވަޑައިގެންނެވި ކަމަށެވެ. އެއީ ތިލަފުއްޓަށް ޕޯޓު ބަދަލުކުރީމަ ބޮޑު ޖަގާއެއް ލިބޭނެތީ ކަމަށެވެ. ނަމަވެސް ތިލަފުއްޓަކީ މާލެއިން ނަގާ ކުނި ވަޅުލަން ފަޅެއް ގޮތުގައި ހިއްކަން ޖެހޭ ތަނެއް ކަމަށް ކުރީގެ ރައީސް ސޯލިހު ވިދާޅުވެފައިވާ ކަމަށެވެ.
އެމަނިކުފާނު ވިދާޅުވީ ފޭސް ދޭކުން ގޯތި ދޫކޮށްފައިވަނީ އެއްވެސް ކަހަލަ ޕްލޭނެއް ނެތި ކަމަށެވެ. ހިދުމަތްތައް ގާއިމްކުރެވޭނެ ގޮތަކަށްވެސް ނޫން ކަމަށެވެ. އެޗްޑީސީން ބުނެފައިވާ ގޮތުން ގޯތި ދީފައިވަނީ ނެޓްވޯކްތަކަށް އަރާގޮތަށެވެ. އެހެންވެ އެ ނެޓްވޯކްތައް އެހެން ތަންތަނަށް ބަދަލުކުރަން 200 މިލިއަނެއްހާ ރުފިޔާ ހަރަދުވާނެ ކަމަށް އެ ކުންފުނިން ވަނީ ބުނެފައެވެ.
''އެއްވެސް ކަހަލަ ޕްލޭނެއް ނެތި، ޕްލޭނެއް ނެތް ހަދާފައި. ހަމައެކަނި ގޮޅި ޖާހާލީ ސްލަމްއެއް ގޮތަށް. ހުޅުމާލެއިން ވެސް ގޮޅިތަކެއް ޖަހާފައި ލިސްޓު ހަދާފައި''
ރައީސް ވިދާޅުވީ މި ސަރުކާރުން ހުޅުމާލެ ފަޅުތެރެ ހިއްކުމުގެ މަސައްކަތް ކުރިއަށްދާ ކަމަށެވެ. އަދި ވިދާޅުވީ ފޭސް ދޭއްގައި އިމާރާތް ކުރުމުގެ ހުއްދަ ވަރަށް އަވަަހަށް ދޭނެ ކަމަށެވެ. އެ ގޯތިތަކުގައި އިންފާރު ރޭނުމުގެ މަސައްކަތް މިހާރު ދަނީ ކުރަމުންނެވެ.
