އޭވިއޭޝަން ސެކިއުރިޓީ ކޮމާންޑަށް 55 މުވައްޒަފުން ހޯދަން އިއުލާންކޮށްފި
އޭވިއޭޝަން ސެކިއުރިޓީ ކޮމާންޑަށް 55 މުވައްޒަފުން ހޯދަން އިއުލާންކޮށްފިއެވެ.
ޑިފެންސް މިނިސްޓްރީން ސަރުކާރުގެ ގެޒެޓްގައި މިއަދު ކޮށްފައިވާ އިއުލާނެއްގައި ބުނީ، އެ މަގާމަށް ހޮވާ މީހުން ޝަރުތުތަކުގެ ތެރޭގައި ސާނަވީ އިމްތިހާނުން ދެ މާއްދާއިން ދަށްވެގެން 'ސީ' ފާސް ލިބިފައިވުމާ އެކު، ސެކަންޑަރީ ސްކޫލް ސެޓްފިކެޓް އިމްތިހާނުން "ދިވެހި" މާއްދާއިން ދަށްވެގެން 'ސީ' ފާސް ލިބިފައިވުން ނުވަތަ ގައުމީ ސަނަދުތަކުގެ އޮނިގަނޑުގެ ލެވެލް ތިނެއްގެ ސަނަދެއް ހާސިލްކޮށްފައިވުން ހިމެނޭ ކަމަށެވެ.
އަދި އުމުރުން 18 އަހަރާ 35 އަހަރާ ދެމެދުގެ ދިވެހި ރައްޔިތެއް ކަމުގައިވުމާއި، އިސްކޮޅުގައި ފަސް ފޫޓް ހުރުމުގެ އިތުރުން ފުރިހަމަ ސިއްހަތެއްގައި ހުރި ފަރާތަކަށް ވާން ޖެހޭނެއެވެ.
އޭވިއޭޝަން ސެކިއުރިޓީ ކޮމަންޑުންގެ ބޭސިކް މުސާރައެއް ގޮތަށް ކަނޑައަޅާފައިވަނީ 5920.00 ރުފިޔާއެވެ. ސާވިސް އެލަވެންސްގެ ގޮތުގައި 1500 ރުފިޔާ ލިބޭނެއެވެ. އަދި ހަމަޖެހިފައިވާ އުސޫލުން އިތުރު އެލަވެންސްތައް ލިބޭނެ ކަމަށް އިއުލާނުގައިވެއެވެ.
މަގާމަށް ކުރިމަތިލާ ފަރާތްތަކުން މި މަހުގެ 18 ވަނަ ދުވަހުގެ 14:00 ގެ ކުރިން، ހުޅުލޭގައި ހުންނަ އޭވިއޭޝަން ސެކިއުރިޓީ ކޮމާންޑުގެ ހެޑްކުއާޓާސް އަށް ހުށަހަަޅަން ވަނީ އެދިފައެވެ. ވަޒީފާއަށް އެދޭ ފޯމާއި ލިޔުންތައް އީ-މެއިލް މެދުވެރިކޮށް ވެސް ބަލައިގަންނާނެއެވެ.
އެ ވަޒީފާއަށް މީހުން ނެގުމުގައި ތައުލީމީ ފެންވަރާއި ތަޖުރިބާއަށް ބަލާނެއެވެ. އެންމެ މަތިން ޕޮއިންޓު ލިބޭ ފަރާތްތައް ޝޯޓްލިސްޓު ކުރެވޭނެއެވެ. އޭގެ ފަހުން އިންޓަވިއު އާއި އިމްތިހާން އޮންނާނީ، މި މަހުގެ 20 އާއި އަންނަ މަހުގެ ނުވަޔަކާއި ދެމެދު އެވެ. އިންޓަވިއު އޮންނާނީ އޭވިއޭޝަން ސެކިއުރިޓީ ކޮމާންޑުގެ ހެޑްކުއާޓާސް، ހުޅުލޭ ގައެވެ.
ވަޒީފާއަށް ހޮވޭ މީހުން މަސައްކަތްކުރަން ޖެހޭނީ އޭވިއޭޝަން ސެކިއުރިޓީ ކޮމާންޑުން ސެކިއުރިޓީ ބަލަހައްޓަމުން ގެންދާ އެއާޕޯޓު ތަކުގައެވެ.
