ކްރިމިނަލް ކޯޓަށް އަލަށް އައްޔަނު ކުރި ދެ ފަނޑިޔާރުންގެ ތެރޭގައި، ފުރަތަމަ ފަހަރަށް އަންހެން ފަނޑިޔާރެއް
ކްރިމިނަލް ކޯޓަށް އާ ދެ ފަނޑިޔާރުން އައްޔަނު ކުރައްވައިފިއެވެ.
އެކޯޓަށް އައްޔަނު ކުރެއްވީ ކުރީގެ ޑެޕިއުޓީ ޕްރޮސިކިއުޓާ ޖެނެރަލް ދީބާނާޒް ފަހުމީ އާއި ސ. ހުޅުދޫ، ހެޕީ ޑްރީމް، މުހައްމަދު މިސްބާހެވެ. މި ދެ ބޭފުޅުން ވެސް މިއަދު ވަނީ ފަނޑިޔާރު ކަމުގެ ހުވާ ކުރައްވާފައެވެ.
މިއީ ކްރިމިނަލް ކޯޓަށް އައްޔަނު ކުރި ފުރަތަމަ އަންހެން ފަނޑިޔާރެވެ.
ކްރިމިނަލް ކޯޓުގެ ކުރީގެ އިސް ގާޒީ އަހުމަދު ހައިލަމް އާއި ފަނޑިޔާރު ހަސަން ނަޖީބު މަގާމުން އިސްތިއުފާ ދެއްވުމުން ހުސްވި ދެ މަގާމަށް ފަނޑިޔާރުން ހޯދުމަށް މީގެ ކުރިން ޖުޑިޝަލް ސާވިސް ކޮމިޝަނުން ވަނީ އިއުލާނުކޮށްފަ އެވެ. އިސްތިއުފާ ދެއްވުމުގެ ކުރިން ހައިލަމް ހުރީ ސަސްޕެންޑު ވެސް ކޮށްފައެވެ.
ކްރިމިނަލް ކޯޓަށް އައްޔަނު ކުރި ދެ ބޭފުޅުން، މަގާމުގެ ހުވާ ކުރުމަށް ސުޕްރީމް ކޯޓުގައި ބޭއްވި ރަސްމިއްޔާތުގައި އެ ދެ ބޭފުޅުންނަށް ހުވާ ލައިދެއްވީ ސުޕްރީމް ކޯޓުގެ ފަނޑިޔާރު ހުސްނުއްސުއޫދެވެ.
ދީބަނާޒް އަކީ މެލޭޝިއާގެ އިސްލާމިކް ޔުނިވާސިޓީއިން ބެޗެލާ އޮފް ލޯ (އޮނާސް) ހާސިލު ކުރެއްވުމަށް ފަހު ނިއުޒިލޭންޑުގެ ޔުނިވާސިޓީ އޮފް ކެންޓަބަރީއިން މާސްޓާސް އޮފް ލޯ ހާސިލު ކުރައްވާފައިވާ ބޭކަނބަލެކެވެ.
މިސްބާހަކީ މިސްރުގެ އަލް އަޒްހަރު ޔުނިވާސިޓީއިން ބެޗެލާ އޮފް ލޯ ހާސިލު ކުރައްވާފައިވާ ގާނޫނީ ދާއިރާއިން ހަ އަހަރުގެ ތަޖުރިބާ ލިބިފައިވާ ބޭފުޅެކެވެ.
އަންހެން ފަނޑިޔާރުން އައްޔަންކުރުމާއި ގުޅޭގޮތުން އިސްލާމް ދީނުގަ އައިސްފައިވާގޮތްވެސް ބަޔާންކޮށްލިނަމަ ވ ފުރިހަމަވީސް