ޖަމީލު ހުއްޓައެއް ނުލެއްވި، ފައިސަލްއަށް އަނެއްކާވެސް ފުރައްސާރައިގެ ބަސްތަކެއް

ފަތުރުވެރިކަމާއި ބެހޭ ވަޒީރު އިބްރާހިމް ފައިސަލްއަށް ނިސްބަތްކޮށް ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދު އަނެއްކާވެސް ފުރައްސާރައިގެ ބަސްތަކެއް ވިދާޅުވެއްޖެ އެވެ.
ޑރ. ޖަމީލާއި އޭނާގެ ކޮއްކޮ ކުރީގެ ޔޫތު މިނިސްޓަރު މުހައްމަދު މަލީހު ޖަމާލު ގެންދަވަނީ ވަޒީރު ފައިސަލްއަށް ވަރަށް ބޮޑަށް ފާޑު ވިދާޅުވަމުންނެވެ. ރާއްޖެއިން ބޭރަށް ވަޑައިގެން ކޮށި އިނގިރޭސި ބަހުން ފައިސަލް ވާހަކަ ދައްކަވާތީ އެކަމަށް އެކި ގޮތްގޮތުން މަލާމާތާއި ފުރައްސާރައިގެ ބަސްތައް މި ދެބޭފުޅުންވެސް ގެންދަވަނީ އަމާޒު ކުރައްވަމުންނެވެ.
އަނެއްކާވެސް މިއަދު ޑރ. ޖަމީލު ވަނީ ފައިސަލްއަށް އަމާޒުކޮށް ފުރައްސާރައިގެ ބަސްތަކެއް ވިދާޅުވެފަ އެވެ. އެގޮތުން ވިދާޅުވީ ފައިސަލްގެ "ޖާހިލު" ކަމުން ހައިރާންވެފައި ހުންނެވި ކަމަށެވެ. ކުރީގެ ރައީސް އިބްރާހިމް މުހައްމަދު ޞާލިހުގެ 5 އަހަރު ދުވަހު ފައިސަލް ކޮބައިތޯ ސުވާލު އުފައްދަވަމުން ޖަމީލު ވިދާޅުވީ ކޮންމެ އާ ސަރުކާރަކާއިއެކު ފާޅުވާ ފާޅުވުމުން އެތައް ވާހަކައެއް ބުނެދޭ ކަމަށެވެ.
"ފައިސަލްގެ ހާޒިރުގައި ދުވަނީ ނެޕޮޓިޒަމްގެ ވަސް. ބޮޑާކަމާއިއެކު ނާކާމިޔާބީއާއި ލިޔަންކިޔަން ނޭނގުމުގެ ވާހަކަ ދެއްކުމަކީ ލަދުވެތިކަމެއް" ޖަމީލު ވިދާޅުވި އެވެ.އޭނާ ވިދާޅުވީ އެއްވެސް ކެބިނެޓެއްގައި ވަޒީރެއްގެ ގޮތުގައި ފައިސަލް ހުންނެވުމަކީ ބަދުނާމެއް ކަމަށެވެ. ސިއްރުކުރުމެއް ނެތި އެވާހަކަތައް ދަންނަވަން ޖެހޭތީ މައާފަށް އެދޭކަމަށްވެސް ޖަމީލު ވިދާޅުވި އެވެ. ޑރ. ޖަމީލުއާއި މަލީހުގެ ފާޑުކިޔުންތަކަށް ރައްދު ނުދެއްވައި ހުންނެވުމަށްފަހު ފައިސަލް ވަނީ ދާދި ފަހުން އެއްޗެއް ވިދާޅުވެފަ އެވެ. އެގޮތުން އެންމެ މޮޅަށް ކިޔަވައިގެން ހުންނެވި ބޭފުޅާކަމަށް ނުދަންނަވާ ކަމަށާއި އެހެންނަމަވެސް އެންމެ މޮޅު މީހާއަކީ އަނެކާއަށް އިހުތިރާމުކުރަން ދަންނަ މީހާކަމަށް ފައިސަލް ވިދާޅުވި އެވެ. މީގެ އިތުރުން ފުރައްސާރަ ކުރިނަމަވެސް ފަހަތަށް ޖެހިވަޑައިނުގަންނަވާނެ ކަމަށްވެސް ފައިސަލް ވަނީ ވިދާޅުވެފަ އެވެ. ފައިސަލް ވަނީ ރައީސް އިބްރާހިމް މުހައްމަދު ޞާލިހަށް އިނގިރޭސި ބަހުން ވާހަކަދައްކަވަން ނޭނގުނުއިރު އެމަނިކުފާނު ވެރިކަމަށް ގެންނަވަން ޑރ. ޖަމީލާއި މަލީހު މަސައްކަތް ކުރެއްވިކަންވެސް ފާހަގަކުރައްވައިފަ އެވެ.






ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.