މިނިސްޓަރު ޒަމީރު ގަތަރަށް ކުރެއްވި ރަސްމީ ދަތުރުފުޅު ނިންމަވާލައްވައިފި
މިނިސްޓަރު އޮފް ފޮރިން އެފެއާޒް، މޫސާ ޒަމީރު ގަތަރަށް ކުރެއްވި ރަސްމީ ދަތުރުފުޅު ނިންމަވާލައްވައިފި އެވެ.
މިނިސްޓްރީ އޮފް ފޮރިން އެފެއާސްއިން އާންމުކުރި ނޫސްބަޔާނެއްގައި ބުނެފައި ވަނީ މޭ މަހު ރާއްޖެއާއި އާއި ގަތަރާ ދެމެދު އޮންނަ ދެގައުމުގެ ގުޅުން އިތުރަށް ބަދަހިކުރުމުގެ މަގުސަދުގައި ކުރިއަށް ގެންދިޔަ މި ދަތުރުފުޅު ނިންމަވާލައްވާފައި ވަނީ އިއްޔެ ކަމަށެވެ.
މި ދަތުރުފުޅުގައި މިނިސްޓަރު ޒަމީރު ވަނީ ގަތަރުގެ ބޮޑުވަޒީރު އަދި މިނިސްޓަރު އޮފް ފޮރިން އެފެއާޒް ހދ. ޝެއިޚް މުހައްމަދު ބިން އަބްދުއްރަހްމާން އަލް ތާނީ އާއި ދެގައުމުގެ ދެމެދުގައި މިހާރު އޮތް ގުޅުން މުރާޖައާކޮށް އިތުރަށް އެއްބާރުލުން ދިނުމުގެ މަގުތައް ހޯއްދެއްވުމުގެ މަޝްވަރާކޮށްފައިކަމަށް މިނިސްޓްރީއިން ވަނީ ބުނެފަ އެވެ.
މިނިސްޓަރު ޒަމީރު ވަނީ ކުރިއަށް އޮތް ދުވަސްތަކުގައި ފުރިހަމަ އެއްބާރުލުމާއި ޑިޕްލޮމެޓިކް ގުޅުންތައް ގާއިމްކުރެވޭނެ ކަމުގެ ޔަގީންކަން ދެއްވާފަ އެވެ.
މިނިސްޓަރު ޒަމީރާ އެކު މި ދަތުރުފުޅުގައި ބައިލެޓަރަލްގެ ސެކްރެޓަރީ ޑރ. ހާލާ ހަމީދާއި، އެމްބެސެޑަރ އެޓް ލާޖް ޑރ. ފަޒީލް ނަޖީބާއި އެސިސްޓެންޓް ޑިރެކްޓަރ ލަމްހާ ސަލީމް ބައިވެރިވެވަޑައިގެންނެވި އެވެ.
