ފައިސަލް ދެއްވީ ނުހެދި ހުރި ރިސޯޓުތައް މާކެޓަށް ނެރެވޭނެކަމުގެ ޔަގީންކަން
ރިސޯޓު ތަރައްގީކުރަން ޓޫރިޒަމް މިނިސްޓްރީން ދޫކުރި 63 ރަށެެއް ނުހެދި އެބައޮތް ކަމަށާއި، މި ފަސް އަހަރު ނިމުމުގެ ކުރިން އެކަށީގެންވާ އަދަދެއްގެ ރަށްތައް މާކެޓަށް ނެރެވޭނެ ކަމުގެ އުއްމީދު އެބައޮތް ކަމަށް ޓޫރިޒަމް މިނިސްޓަރު އިބްރާހިމް ފައިސަލް ރޭ ވިދާޅުވެއްޖެ އެވެ.
މަގާމުގެ މަސްއޫލިއްޔަތުތަކާއި ހަވާލުވެވަޑައިގެންނެވި ހިސާބުން ފެށިގެން މިނިސްޓަރުގެ ލިސްޓުގެ އެންމެ ކުރީގައި އޮތީ ނުހެދި ހުރި ރަށްތައް މާކެޓަށް ނެރެވޭނެ ގޮތްތައް ހޯދުމެވެ. ރިސޯޓުތައް ނުހެދި އޮތް ސަބަބުވެސް ހޯދުމުގެ މަސައްކަތްވެސް ކުރިއަށް އެބަދެ އެވެ.
ރޭ ދައުލަތުގެ މީޑިއާ 'ޕީއެސްއެމް' ގެ ރާއްޖެ މިއަދު ޕްރޮގްރާމްގައި ފައިސަލް ވިދާޅުވީ ނުހެދި ހުރި ރިސޯޓުތަކަކީ 20 އަހަރާއި 25 އަހަރާ ދެމެދުގެ މުއްދަތަކަށް ދޫކޮށްފައިވާ ރަށްތައް ކަމަށާއި އެ ރަށްތަކުގެ ދަފްތަރެއް އެކުލަވާލުމުގެ މަސައްކަތް ކުރަމުންދާ ކަމަށެވެ.
ދެއްވި ޔަގީންކަމަކީ ރައީސް ޑރ މުހައްމަދު މުއިއްޒުގެ މި ދައުރުގެ ތެރޭގައި އެކަށީގެންވާ އަދަދެއްގެ ރަށްތަކެއް މާކެޓަށް ނެރެވޭނެ ކަމެވެ. އެއަށް ފަހު ވިދާޅުވެދެއްވީ އެކަމުގައި މިނިސްޓްރީގެ ވިސްނުމެވެ.
މިނިސްޓްރީން އެކަމުގައި ގެންގުޅެނީ ދެ ގޮތެވެ. އިކޮނޮމިކް ކައުންސިލަށް ހުށަހެޅި ޕޭޕަރުގައި އެއް ކަމެއްގެ ގޮތުގައި ލިޔެފައިވަނީ އެއްވެސް ގޮތަކަށް މަސައްކަތް ނުހިނގާ ހުރި ރަށްތައް މާކެޓަށް ނެރޭނެ ގޮތް ހޯދަން އިންވެސްޓަރުންނާ މަޝްވަރާ ކުރުމެވެ.
މައިގަނޑު ގޮތެއްގައި ގެންގުޅެނީ، އެއްވެސް މަސައްކަތެއް ނުހިނގާ ހުރި ރަށްތައް ފޮރިން އިންވެސްޓަރަކު ނުވަތަ ދިވެހި ވިޔަފާރިވެރިއަކު ބޭނުންވާ ކަމަށްވަންޏާ ދެ ފަރާތުން ވާހަކަ ދެއްކިގެން ފިނޭންސްއާ މިރާ އާއެކު މަޝްވަރާކޮށްގެން އެ ރަށްތައް މާކެޓަށް ނެރުން
ދެވަނަ ގޮތެއް ކަމަށް ފައިސަލް ވިދާޅުވީ، 50 އިންސައްތަ ނިމިފައި ހުރި ރަށްތައް އޮޑިޓް ފާމެއް މެދުވެރިކޮށް އޮޑިޓް ކުރުމެވެ.
އިންވެސްޓް ކުރި ފަރާތަށްވެސް އެދެވޭ ގޮތަކަށް އޭގެ މަންފާކުރަނިވި ގޮތަކަށް ބައްލަވައިގަންނަން ބޭނުންފުޅުވާ އިންވެސްޓަރަކާއި އެކީގައި އެކަމާއިގެން ކުރިއަށް ދިޔުން
ރާއްޖޭގައި މި ވަގުތު 177 ރިސޯޓެއް އޮޕަރޭޓް ކުރެ އެވެ. ނުހެދި ހުރި ރިސޯޓުތަކަށް ލުއެއް ހޯދައިދޭން ހުރިހާ ސަރުކާރުތަކުންވެސް މަސައްކަތްތަކެއް ކުރެ އެވެ.
