ތިލަފުށީގެ އެޗްޑީސީ ބިމެއްގައި ނުގަވާއިދުން ބަހައްޓާފައި ހުރި އުޅަނދުތައް ނަގަން އެދިއްޖެ
ކ.ތިލަފުށީ ގައި، ހައުސިން ޑިވޮލޮޕްމެންޓް ކޯޕަރޭޝަން (އެޗްޑީސީ) ގެ ބިމެއްގައި ނުގަވާއިދުން ބަހައްޓާފައި ހުރި އުޅަނދުތައް ނަގަން އެ ކޯޕަރޭޝަނުން އެދިއްޖެ އެވެ.
އެޗްޑީސީން މިއަދު ކުރި އިއުލާނެއްގައި ބުނީ ތިލަފުށީގައި އޮންނަ އެ ކުންފުނީގެ އަމިއްލަ ބިން، ބަޔަކަށް ކުއްޔަށް ދީފައިވާތީ އެ ބިމުގެ ތެރޭގައި ގަވާއިދާ ހިލާފަށް ބަހައްޓާފައިވާ އުޅަނދުތަކާއި އަދި އެހެނިހެން ތަކެތި ނަގާ އެ ބިން އެ ފަރަތާއި ހަވާލުކުރުމުގެ މަސައްކަތް ފަށާފައިވާ ކަމަށެވެ.
އިއުލާނާއެކު އެޗްޑީސީން ވަނީ އުޅަނދުތަކުގެ ލިސްޓެއް އާއްމުކޮށްފަ އެވެ. އެ ކޯޕަރޭޝަނުން ވަނީ އެ އުޅަނދުތަކުގެ ވެރިފަރާތުން ކުންފުނީގެ ކޯލް ސެންޓާ ހޮޓްލައިން 1516 އަށް ގުޅާ މައުލޫމާތު ސާފުކުރުމަށް ފަހު 15 ދުވަސް ތެރޭގައި އެ އުޅަނދެއް ނުވަތަ ތަކެއްޗެއްގެ ވެރިފަރާތުން އެތަކެތި ނެގުމަށް އަންގާފަ އެވެ.
އެ މުއްދަތު ތެރޭގައި ނުނަގާނަމަ ގަވާއިދާ ހިލާފަށް ދޫކޮށްލާފައިވާ އުޅަނދުތައް ކަމަށް ބަލާ އެ އުޅަނދުތަކާއި ތަކެއްޗާއި މެދު އެ ކޯޕަރޭޝަނަށް ފެންނަ ގޮތަކަށް އަމަލުކުރާނެ ކަމަށް އެޗްޑީސީން ބުންޏެވެ.
