މަސް ދުވާނީ ފެން އޮތް ދިމާއަކަށެވެ.
މަސް ދުވާނީ ފެން އޮތް ތާކަށޭ ބުނާ އަޑު އަޅުގަނޑު އަހަމުއެވެ. ހަގީގަތުގައި ވެސް މަހަށް ދެވޭނީ ގިނައިން ފެން އޮތް ދިމާލަކަށްތާއެވެ. އިންސާނުންގެ ޙާލަކީވެސް މިއެވެ. މުދާވެރި، ގިނައިން މޮޅު އެއްޗެހި ގެންގުޅޭ މީހުންނާ އެއްކޮށް ގިނަ މީހުން އުޅޭ ހިތްވާނެއެވެ. މިއީ އިންސާނީ ޠަބިއްޔަތަކީ ބާވައެވެ.
މިޒަމާނުގައި ލޯބިވެރިންނާއި، ރައްޓެހިން ޚިޔާރު ކުރުމުގައިވެސް ވަފާތެރިކަމާއި، ތެދުވެރި ކަމުގެ ބަދަލުގައި މުދާވެރި މަޝްހޫރު މީހުން ހޯދުމަކީ ފެޝަނަކަށް ވެފައިވާ ކަމެކެވެ. އަނެކާ ކިތަންމެ އުޅުން ގޯހަސް ކިތަންމެ އަޑި ނުބަޔަސް މުދާވެރި، މޮޅު އެއްޗެހި ގެންގުޅޭ ކަމުގައި ވަނީ ނަމަ އެދިމާލަށް ތިމާގެ ޙަޔާތުގެ ނައު އަނބުރާލާކަށް ލަހެއް ފަހެއް ނުޖެހޭނެއެވެ.
ތިމާ އެންމެ ހިތް އެދޭ ފަދަ ކުއްޖަކާ ލޯބިވެވި އެ ލޯބި ހުށައަޅަން ތިމާ ބޭނުންވެ، އެހެންނަމަވެސް އެއީ ތިމާގެ ފެންވަރެއް ނޫނޭ ހިތާ ކިތައް ބޭފުޅުން ފަސްޖެހިފައި އެބަ ތިއްބެވިންތޯއެވެ؟ އާނއެކެވެ. ކިތަންމެ ރޫފަ އާއި ބައްޓަން ރީތި ކަމުގައި ވީ ނަމަވެސް ހިތް އެނބުރެނީ ފައިސާއާއި އަރާމަށެވެ. އެހެން ނަމަވެސް ތިމާގެ ހިތުގައި އޭނާއަށް އޮތް ވަފާތެރިކަން،މުއްސަނދި ކަމާއި މުދާވެރި ކަމުގެ ކުރިމަތީގައި އެއްވެސް އެއްޗަކަށް ނުވާނެއެވެ.
ހަމަމިފަދައިން ރައްޓެހިން ޚިޔާރު ކުރި ކަމުގައި ވީ ނަމަވެސް، ކިތަންމެ އެއްކޮށް އުޅޭ ދެ ރަޙުމަތްތެރިން ކަމުގައި ވީ ނަމަވެސް ކުއްލިއަކަށް ތިމާގެ އެ ގާތް ރަޙުމަތްތެރިޔާއާއި ގާތްވާނީ މުއްސަނދި މުދާވެރި މީހެކެވެ. އެހިސާބުން އެކި ޒާތް ޒާތުގެ މުދަލާއި ހިތްހަމަޖެހުން އޭނާގެ ފަރާތުން ލިބެން ފެށުމުން ދުވަސްކޮޅަކުން ތިބާގެ މަތިން އޭނާ ހަނދާންނެތިދާނެއެވެ.
ކިތަންމެ ހިތިކަމުގައި ވީނަމަވެސް މިއީ ދުނިޔެވީ ޙަގީގަތެކެވެ. ދުނިޔޭގެ އާދައެވެ. މުއްސަނދި ކަމާއި މުދާވެރިކަން ނެތް މީހުންނަކީ ނިކަމެތިންނެވެ. އެއީ ބާކީ ވެފައިވާ ބައެކެވެ. މިއީ ދުނިޔޭގެ އުސޫލެވެ. އެހެންނަމަވެސް މިކަން ކަން މިހެން މިދަނީ އެންމެ އިންސާފުވެރިކޮށް ތޯއެވެ؟ ނޫނެކެވެ. ތިމާގެ އަތުގެ 5 އިނގިލި އެއްވަރު ނުވާ ފަދައިން އެންމެންނަކީ އެއްވަރެއްގެ މީހުނެއް ވެސް ނޫނެވެ. އެންމެނާއި ދޭތެރޭ ހަމަހަމަ ކޮށް ކަންކަން ކުރަމާ ހިނގާށެވެ.
