ރާއްޖޭގައި އިޒްރޭލު ޕާސްޕޯޓް މަނާކުރަން ގާނޫނަށް އިސްލާހު ގެންނަން ނިންމައިފި
އިޒްރޭލު ޕާސްޕޯޓް ރާއްޖެ އެތެރެވުން މަނާކުރަން ގާނޫނު އަސާސީ އަށް އިސްލާހު ގެންނަން ވަޒީރުންގެ މަޖިލީހުން މިއަދު ނިންމައިފި އެވެ.
އެކަން ހާމަކުރުމަށް ރައީސް އޮފީހުގައި ބޭއްވި ކުއްލި ނޫސްވެރިންގެ ބައްދަލުވުމެއްގައި ހޯމް މިނިސްޓަރު އަލީ އިހުސާން ވިދާޅުވީ އިޒްރޭލުން ފަލަސްތީނާ މެދު ކަންތައް ކުރަމުންދާ ލާއިންސާނީ އަމަލުތަކާއި މެދު ކަންބޮޑުވުން ފާޅުކޮށް މިހާތަނަށް ނުނިންމާ ގިނަ ނިންމުންތަކެއް މި ސަރުކާރުން ނިންމަމުންދާ ކަމަށެވެ.
އޭގެ އިތުރަށް ދައުލަތުން އަޅަންޖެހޭ ފިޔަވަޅުތައް އެޅުމަށްޓަކައި ދިރާސާކުރަމުންދާ ކަމަށް އިހުސާން ވިދާޅުވި އެވެ. އެގޮތުން މިއަދުގެ ކެބިނެޓު ބައްދަލުވުމުގައި މުހިއްމު ނިންމުންތަކެއް ނިންމާފައިވާކަން މިނިސްޓަރު ހާމަކުރެއްވި އެވެ.
އޭގެ ތެރޭގައި އިޒްރޭލުގެ ޕާސްޕޯޓުގައި ދިވެހިރާއްޖެއަށް އެތެރެވުން ހުއްޓުވުމަށްޓަކައި ގާނޫނުތަކަށް ގެންނަން ޖެހޭ އިސްލާހުތައް ގެނައުމަށް މިއަދު ވަޒީރުންގެ މަޖިލީހުން ވަނީ ނިންމާފައި
އެކަން ކުރިއަށް ގެންދިޔުމަށްޓަކައި ވަޒީރުންގެ މަޖިލީހުން ވަނީ ހާއްސަ ކޮމިޓީއެއް އެކުލަވާލާފައެވެ. އެ ކޮމިޓީގައި ހިމެނިވަޑައިގަންނަވަނީ، ހޯމް މިނިސްޓަރު، ފޮރިން މިނިސްޓަރު މޫސާ ޒަމީރު، އެޓާނީ ޖެނެރަލް އަހުމަދު އުޝާމް އަދި އިކޮނޮމިކް މިނިސްޓަރު މުހައްމަދު ސައީދު، ޓޫރިޒަމް މިނިސްޓަރު އިބްރާހިމް ފައިސަލްގެ އިތުރުން އިސްލާމިކް މިނިސްޓަރު ޑރ ޝަހީމް އަލީ ސައީދު އެވެ.
އިޒްރޭލު ފާސްޕޯޓް މަނާކުރަން އިމިގްރޭޝަން ގާނޫނަށް އިސްލާހު ގެންނަން އިދިކޮޅު އެމްޑީޕީއަށް ނިސްބަތްވެވަޑައިގަންނަވާ ގަލޮޅު ދެކުނު ދާއިރާގެ މެންބަރު މީކާއިލް ނަސީމް ވަނީ ރައްޔިތުންގެ މަޖިލީހަށް ހުށަހަޅާފަ އެވެ. އެ ބިލަށް ސަރުކާރުން ތާއިދުކުރާނެތޯ އެ ޕްރެސްގައި ނޫސްވެރިއަކު ސުވާލުކުރުމުން އިހުސާން ވިދާޅުވީ އެއަށް އެއްޗެއް ވިދާޅުވާނީ އިތުރަށް ދިރާސާކުރުމަށް ފަހު ކަމަށެވެ.
"ފަހަރެއްގައި ވެދާނެ އަޅުގަނޑުމެން އެލައިން ވާން ޖެހޭނީ އެއާ ކަމަށްވެސް. އަޅުގަނޑުމެން ވަކި އިސްތިސްނާއެއް ނުކުރާނަން މިވެން ބޭފުޅަކު މިވެނި މެންބަރަކު ހުށަހެޅި ހުށަހެޅުމަށް" މީކާއީލްގެ އިސްލާހަށް އިޝާރާތް ކުރައްވާ މިނިސްޓަރު ވިދާޅުވި އެވެ.
އިހުސާން ވިދާޅުވީ ގާނޫނަށް ގެންނަން ޖެހޭ އިސްލާހުތައް ގެނައުމަށްޓަކައި ވަރަށް އަވަހަށް މަޖިލީހަށް ހުށަހަޅާނެ ކަމަށެވެ.
Ads by STO
