ދިވެހިން ތަމްރީނު ކުރަން ޗައިނާގެ އޯޝަން ޔުނިވާސިޓީއިން ޝައުގުވެރިކަން ފާޅުކޮށްފި
މެރިން ޝައިންސްގެ ދާއިރާއިން ފާހަގަކޮށްލެވޭ ޗައިނާގެ ޝަންހާއީ އޯޝަން ޔުނިވާސިޓީން ދިވެހިން ތަމްރީނު ކުރުމަށް ޝައުގުވެރިކަން ފާޅުކޮށްފިއެވެ.
ޝަންހާއީ އޯޝަން ޔުނިވާސިޓީއިން އެ ޝައުގުވެރިކަން ފާޅުކޮށްފައިވަނީ ފިޝަރީޒް މިނިސްޓްރީއާއެކު މިއަދު ބޭއްވި މަޝްވަރާ ބައްދަލުވުމެއްގައެވެ.
އެ ބައްދަލުވުމުގައި، ފިޝަރީޒް މިނިސްޓްރީގެ ފަރާތުން ބައިވެރިވަޑައިގަތީ، ސްޓޭޓް މިނިސްޓަރު ޑރ. އަމްޒަތު އަހުމަދާއި ޑެޕިއުޓީ މިނިސްޓަރު އަހުމަދު ޝާފިއެވެ. އަދި ޝަންހާއީ އޯޝަން ޔުނިވާސިޓީގެ ފަރާތުން އެ ޔުނިވާސިޓީގެ ޗެއާމަން، ވަންގް ހޮންޒޫއާއި އެ ޔުނިވާސިޓީގެ ބައެއް އިސްވެރިން ބައިވެރިވެވަޑައިގަތެވެ.
އެ ބައްދަލުވުމުގައި ވަންގް ހޮންޒޫ ވަނީ، ރާއްޖޭގެ މަސްވެރިކަމުގެ ދާއިރާއާއި ކަނޑުގެ ދިރާސާތަކަށް ފަންނީ ގޮތުންނާއި އެހެނިހެން ގޮތް ގޮތުން އެހީތެރިކަން ފޯރުކޮށްދިނުމަށް އެ ޔުނިވާސިޓީއިން ޝައުގުވެރިވާ ކަމަށް ވިދާޅުވެފައެވެ. އެ ގޮތުން، ރާއްޖޭގެ މެރިން ރިސާޗް އިންސްޓިޓުއުޓް ތަރައްގީ ކުރުމަށް އުމްރާނީ ގޮތުންނާއި ފަންނީ ގޮތުން އެހީތެރިކަން ފޯރުކޮށްދިނުމަށް ބޭނުންވާ ކަމަށް ވެސް އޭނާ ވިދާޅުވިއެވެ.
އޭގެ އިތުރުން، ރާއްޖޭގެ ޔުނިވާސިޓީގެ ދަރިވަރުން ތަމްރީނު ކުރުމަށް ޝައުގުވެރިވާކަން ފާހަގަކުރައްވައި، ވަންގް ހޮންޒޫ ވަނީ ޑިގްރީ ކޯސްތަކުގައި ކިޔެވުމަށް އެ ޔުނިވާސިޓީއަށް ރާއްޖޭގެ ދަރިވަރުންނަށް ދައުވަތު ދެއްވާފައެވެ.
އަދި ފިޝަރީޒް މިނިސްޓްރީއިން ބޭނުންވާ މެނޭޖްމަންޓް ދާއިރާއިންނާއި އެހެނިހެން ދާއިރާތަކުން މީހުން ބިނާކުރުމަށް އެ ޔުނިވާސިޓީން އެހީތެރިކަން ފޯރުކޮށްދޭނެ ކަމަށް ވިދާޅުވިއެވެ.
ރާއްޖޭގައި ގާއިމްކުރަމުން އަންނަ "ފިޝަރީޒް ކޮލެޖު" އަށް އެކި ދާއިރާތަކުން އެހީތެރިކަން ފޯރުކޮށްދޭން ބޭނުންވާ ކަމަށާއި، އެ ކޮލެޖަށް ލެކްޗަރާއިން ތަމްރީނު ކުރުމާއި ދިރާސާ ކުރުމާއި ދަރިވަރުން ތަމްރީނު ކުރުމުގެ ދާއިރާއިން އެހީތެރިކަން ފޯރުކޮށްދޭނެ ބޭނުންވާކަމަށް ވިދާޅުވިއެވެ.
ސްޓޭޓް މިނިސްޓަރު ޑރ. އަމްޒަތު ވިދާޅުވީ، އަމާޒަކީ، "ފިޝަރީޒް ކޮލެޖު" އިން މަސްވެރިކަމުގެ ދާއިރާއިން ޕީއެޗްޑީ ހެދޭ ފެންވަރަށް އެ ކޮލެޖު ތަރައްގީކުރުން ކަމަށެވެ. އަދި "ބެލްޓް އެންޑް ރޯޑް ލެބޯޓަރީ" އެއް ދިވެހިރާއްޖޭގައި ގާއިމު ވެގެން ދިއުމަކީ ވަރަށް ބޭނުންތެރިކަމެއް ކަމަށް ވެސް އޭނާ ވިދާޅުވިއެވެ.
މީގެއިތުރުން އަމްޒަތު ވިދާޅުވީ، ރާއްޖޭގެ ކަނޑުގެ ވަސީލަތްތައް ރަނގަޅު ގޮތުގައި ބޭނުން ކުރުމަށް ގިނަ ދިރާސާތަކެއް ކުރަން ޖެހޭ ކަމަށެވެ.
ކަނޑުގެ ވަސީލަތްތައް ރައްކާތެރިކުރުމާ އެކު ދެމެހެއްޓެނިވި ގޮތުގައި ވަސީލަތްތައް ބޭނުންކޮށްގެން އާމްދަނީ އިތުރުކުރުމަކީ މުހިންމު ކަމެއް ކަމަށެވެ. އެހެންކަމުން، ރިސާޗް އިންސްޓިޓިއުޓުން ދިރާސާތައްކޮށް މެނޭޖްކުރުމަށް ގިނަ މަސައްކަތްތަކެއް ކުރަމުން އަންނަ ކަމަށާއި ނަމަވެސް އަދިވެސް އެ ދާއިރާ ކުރިއަރުވަން ގިނަ އެހީތެރިކަން ބޭނުންވާކަން އޭނާ ފާހަގަކުރެއްވިއެވެ.
މި މަޝްވަރާ ބައްދަލުވުން ނިންމާލައިފައިވަނީ، އެ ޔުނިވާސިޓީއާއި ގުޅިގެން މަސައްކަތްކުރުމަށް އެމްއޯޔޫގައި ސޮއި ކުރުމުގެ ފެހި ސިގްނަލާއެކުގައެވެ.
