އެސްއޯއީ ކޮމިޓީގެ މުގައްރިރަކަށް ޝުޖާއު، ނައިބަކަށް އިއްބެ
ރައްޔިތުންގެ މަޖިލީހުގެ ސްޓޭޓް އޯންޑް އެންޑް އެންޓަޕްރަައިޒެސް ކޮމިޓީ (އެސްއޯއީ)ގެ މުގައްރިރަކަށް ބާރަށު ދާއިރާގެ މެންބަރު އިބްރާހިމް ޝުޖާއު، ނައިބަކަށް ފުވައްމުލަކު ދެކުނު ދާއިރާގެ މެންބަރު އިބްރާހިމް ހުސައިން (އިއްބެ) ހަމަޖައްސައިފިއެވެ.
މިއަދުގެ މަޖިލިސް ޖަލްސާގައި ވަނީ ދާއިމީ ކޮމިޓީތައް އެކުލަވާލާ ގޮތާއި އެކު، އެ ކޮމިޓީތަކުގައި ތިއްބަވާނެ މެންބަރުން ފާސްކޮށްފައެވެ. އޭގެ ފަހުން ކޮންމެ ކޮމިޓީއަކުން ވެސް ވަނީ އެ ކޮމިޓީއެއްގެ މުގަރިއްރާއި ނައިބު މުގައްރިރު ކަނޑަައަޅާފައެވެ.
އެގޮތުން، އެސްއޯއީ ކޮމިޓީގެ މުގައްރިރަކަށް ޝުޖާއު ހަމަޖައްސާފައިވާއިރު، އޭނާ އަކީ ޕަބްލިކް އެކައުންޓްސް ކޮމިޓީގެ ވެސް މެމްބަރެކެވެ. އޭނާ އަކީ ސަރުކާރު ހިންގާ ކޮންގްރެސް ކޯލިޝަނުން މަޖިލީހަށް ކުރިމަތިލައި، 2447 ވޯޓުން އިންތިހާބު ކާމިޔާބުކުރި ކެނޑިޑޭޓެކެވެ.
އެ ކޮމިޓީގެ ނައިބަކަށް އައްޔަން ކޮށްފައިވާ އިއްބެ އަކީ އެސްއޯއީ ކޮމިޓީގެ އިތުރުން ފޮރިން ރިލޭޝަންސް އާއި އިންޑެޕެންޑެންޓް އިންސްޓިޓިއުޝަންސް ކޮމިޓީގެ ވެސް މެމްބަރެކެވެ. އިބްރާހިމް އަކީ ވެސް ކޮންގްރެސް ކޯލިޝަނުން މަޖިލީހަށް ކުރިމަތިލައި، އިންތިހާބުވީ ފަރާތެކެވެ. އޭނާ އިންތިހާބުވެފައިވަނީ 1142 ވޯޓު ލިބިގެންނެވެ.
މި ހިނގަމުންދާ 20 ވަނަ މަޖިލީހުގައި ސުޕަ މެޖޯރިތީ އޮތީ، ވެރިކަން ކުރާ މައި ޕާޓީ ޕީއެންސީއަށް ވުމުން، މަޖިލީހުގެ ހުރިހާ ކޮމިޓީއެއްގެ މެޖޯރިޓީ ވެސް އޮތީ ހަމަ އެ ޕާޓީއަށެވެ. މާލިއްޔަތު ކޮމިޓީގެ މުގައްރިރު ފިޔަވައި އެހެން ހުރިހާ ކޮމިޓީތަކުގެ މުގައްރިރުންގެ ގޮތުގައި ހަމަޖައްސާފައިވަނީ ސަރުކާރު ތަމްސީލުކުރާ މެމްބަރުންނެވެ.
