ހުނަރުވެރި މަސައްކަތްތެރިކަމުގެ ތައުލީމާއި ތަމްރީނު ފެށިތާ 50 އަހަރު ފުރުން ފާހަގަ ކޮށްފި
ދިވެހިރާއްޖޭގައި ކޮލޮމްބޯ ޕްލޭން ސްޓާފް ކޮލެޖް (ސީޕީއެސްސީ) އާއި ގުޅިގެން ވޮކޭޝަނަލް ޓްރެއިނިންގްގެ ތަމްރީނު ފެށުނުތާ 50 އަހަރު ފުރުން މިއަދު ފާހަގަ ކޮށްފިއެވެ.
މި ދުވަސް ފާހަގަކުރުމުގެ ހަފްލާ ބާއްވާފައިވަނީ، 'އިންކަންޓްރީ ޕްރޮގްރާމް އޮން ޑިވެލޮޕްމަންޓް އޮފް މޯލްޑިވްސް ނޭޝަނަލް ޓިވެޓް ޕޮލިސީ ފްރޭމްވާކް' ގެ ތެރެއިންނެވެ.
މި ފްރޭމްވޯކަކީ، މޯލްޑިވްސް ނޭޝަނަލް ސްކިލްސް ޑިވެލޮޕްމަންޓް އޮތޯރިޓީ އާއި، އެޑިއުކޭޝަން މިނިސްޓްރީއާއި، ލޭބަރ އެންޑް ސްކިލްސް ޑިވެލޮޕްމަންޓާއި، ކޮލަމްބޯ ޕްލޭން ސްޓާފް ކޮލެޖާއި ގުޅިގެން ކުރިޔަށްގެންދިޔަ ފްރޭމްވޯކެކެވެ.
މި ހަފްލާގައި، ކޮލޮމްބޯ ޕްލޭން ސްޓާފް ކޮލެޖްގެ ޑިރެކްޓަރ ޖެނެރަލް ޕްރޮފެސާ ޑރ. ވިކްރަމަސިންހަ އާއި އެމްއެންއެސްޑީއޭގެ ސީއީއޯ ޑރ ޒަހުރާ މުހައްމަދާއި، އެމްއެންއެސްޑީއޭގެ ސްޓާފުންގެ އިތުރުން މިނިސްޓްރީގެ އިސްބޭފުޅުންނާއި ސީޕީއެސްސީގެ ތަޖްރިބާކާރުންގެ 2 ބޭފުޅުން އަދި ތަމްރީނު ޕްރޮގްރާމްގެ ހުރިހާ ބައިވެރިން ވަނީ ބައިވެރިވެފައިވެއެވެ.
ރާއްޖޭގައި ހުނަރުވެރި މަސައްކަތްތެރިކަމުގެ ތައުލީމާއި ތަމްރީނު ޕްރޮގްރާމްތައް ފުރަތަމަ ފެށީ 1974 ގައެވެ. އެއީ ވޮކޭޝަނަލް ޓްރެއިނިން ދިނުން ރޭވުމާބެހޭ ކޮލަމްބޯޕްލޭން ނޭޝަނަލް ސެމިނާއެކެވެ.
ހުނަރުވެރި މަސައްކަތްތެރި ކަމުގެ ދާއިރާއިން މީހުން ބިނާކުރަންފެށުނީ ޔޫއެންޑީޕީ އާއި އައިއެލްއޯގެ އެހީގައި 1975ވަނަ އަހަރު މާލޭގައި ހުޅުވުނު ވޮކޭޝަނަލް ޓްރޭނިންގް ސެންޓަރ (ވީޓީސީ) ގެނަމުގައެވެ. ވީޓީސީގެ ގޮފިތައް ރާއްޖޭގެ އެކި ސަރަހައްދުތަކުގައި ބިނާކުރަން ފަށާފައިވަނީ 1980ގެ ކުރީ ކޮޅުގައެވެ.
އޭގެފަހުން، 2000 ގެ އަހަރުތައް ފެށުނު ހިސާބުން، ދިވެހިސަރުކާރުން މޯލްޑިވްސް ކޮލެޖް އޮފް ހަޔާ އެޑިޔުކޭޝަން އުފައްދަވާ، ހިންގުމަށް އައި ބަދަލުތަކާއި އެކު، "މައިޓް" ގެ ހިންގުން ކޮލެޖްގެ ފެކަލްޓީ އޮފް އިންޖިނިއަރިންގް ޓެކްނޮލޮޖީއަށް ބަދަލުކުރެވުނެވެ.
އޭގެ ފަހުން ހިންގުނު ހަރަކާތްތައް:
- ވަޒީފާގެ ބާޒާރަށް ބޭނުންވާ ހުނަރުވެރި ދާއިރާތަކުން ތަމްރީނު ލިބިފައިވާ ދިވެހީން، އަވަސް ސްޕީޑެއްގައި އިތުރުކުރުމަށް 2005 އަހަރު، ޑިޕާޓްމަންޓް އޮފް ހަޔާ އެޑިޔުކޭޝަންގެ ދަށުން ރާއްޖޭގެ އެކި ސަރަހައްދުތަކުގައި ތަމްރީނު ޕްރޮގްރާމުތައް ހިންގަންފެށުނެވެ.
- މަސައްކަތްތެރިކަމުގެ ދާއިރާއަށް ބޭނުންވާ ފަންނީ ހުނަރުވެރި މީހުންނަށް ތަމްރީނު ދިނުމަށް ދުނިޔޭގައި މިހާރު ފުޅާދާއިރާއެއްގައި ބޭނުންކުރާ ޓެކްނިކަލް އެންޑް ވޮކޭޝަނަލް އެޑިޔުކޭޝަން އެންޑް ޓްަރޭނިންގް (ޓިވެޓް) ނިޒާމް ރާއްޖެއަށް ތައާރަފްކުރެވުން.
- ފަންނީ ހުނަރުވެރި މަސައްކަތްތެރިކަމުގެ ތަޢުލީމާއި ތަމްރީނު އިތުރުކުރުމަށް މޯލްޑިވްސް އިންސްޓިޓިއުޓް އޮފް ވޮކޭޝަނަލް އެޑިޔުކޭޝަން އެންޑް ޓްރޭނިންގް (މިވެޓް) ގެ ނަމުގައި އައު މުއައްސަސާއެއް 2009 ވަނަ އަހަރު އުފެއްދުނެވެ.
- ތަމްރީނުދޭ މަރުކަޒުތަކުގެ ގަބިލުކަން އިތުރުކުރުމަށާއި، ހުނަރުވެރި ތަމްރީނުގެ ދާއިރާ ރެގިއުލޭޓްކޮށް ކުރިއެރުވުމަށް 2011 ވަނަ އަހަރު ޓެކްނިކަލް އެންޑް ވޮކޭޝަނަލް އެޑިޔުކޭޝަން އެންޑް ޓްރޭނިންގް (ޓިވެޓް) އޮތޯރިޓީގެ ނަމުގައި ސަރުކާރުން މުއައްސަސާއެއް އުފެއްދެވިއެވެ.
- 2014 ވަނަ އަހަރު ރާއްޖޭގެ ސްކޫލްތަކުގެ ދަރިވަރުންނަށް "ދަސްވާރު" ގެ ނަމުގައި އިންޓާންޝިޕް ޕްރޮގަރާމެއް ތައާރަފްކޮށްފައިވެއެވެ.
- 2016 ވަނަ އަހަރު ބީ.ޓެކް ސްޓްރީމް މާއްދާއެއްގެ ގޮތުގައި ސްކޫލުތަކުގައި ކިޔަވައިދޭން ފެށުނެވެ.
- 2019 ގައި އެމްޕްލޯއިމަންޓް ސެކްޓަރ ކައުންސިލްތައް އަލުންއެކުލަވާލައި ނެޝަނަލް އެޕްރެންޓިސްޝިޕް ޕްރޮގްރާމު އިފްތިތާހުކުރެވުނެވެ. އަދިނޭޝަނަލް ކޮމްޕިޓެންސީ ސްޓޭންޑާރޑްތައް މުރާޖާކުރުމުގެ މަސައްކަތާއި އައު ސްޓޭންޑަރޑްތައް ތައްޔާރު ކުރުމުގެ މަސައްކަތް، މޯލްޑިވްސް އެންހާންސިންގް އެމްޕްލޯއިބިލިޓީ އެންޑް ރެޒިލިއަންސް އޮފް ޔޫތު (މީރީ) ޕްރޮޖެކްޓްގެ ދަށުން ފެށުނެވެ.
