ޓިވެޓް ޕޮލިސީ ފްރޭމްވޯކްގެ ތަމްރީނު ފަށައިފި
ޑިވެލޮޕްމަންޓް އޮފް މޯލްޑިވްސް ނޭޝަނަލް ޓިވެޓް ޕޮލިސީ ފްރޭމްވޯކްގެ ތަމްރީނު ފަށައިފިއެވެ.
މި ތަމްރީނު ޕްރޮގްރާމަކީ، މޯލްޑިވްސް ނޭޝަނަލް ސްކިލްސް ޑިވެލޮޕްމަންޓް އޮތޯރިޓީ އާއި، މިނިސްޓްރީ އޮފް ހަޔާ އެޑިޔުކޭޝަން، ލޭބާ އެންޑް ސްކިލްސް ޑިވެލޮޕްމަންޓާއި، ކޮލަމްބޯ ޕްލޭން ސްޓާފް ކޮލެޖާއި ގުޅިގެން ފަށާފައިވާ ޕްރޮގްރާމެކެވެ.
މި ތަމްރީނު ޕްރޮގްރާމް ކުރިޔަށްދަނީ ވޯލްޑްބޭންކްގެ މޯލްޑިވްސް އެންހާންސިން އެމްޕްލޯޔަބިލިޓީ އެންޑް ރެޒީލިއަންސް އޮފް ޔޫތު (މީރީ) ޕްރޮޖެކްޓްގެ އެހީތެރިކަމާއެކުއެވެ.
މި މަހުގެ 2 އަކުން 6 އަކަށް މާލޭގައި ބާއްވާ މި ތަމްރީނު ޕްރޮގްރާމުގައި ރާއްޖެއާއި ރާއްޖެއިން ބޭރުގެ ފަންނީ ތަޖްރިބާކާރުން ސެޝަންތައް ނަގައިދިނުމަށް ވަނީ ހަމަޖެހިފައެވެ. މި ތަމްރީނު ޕްރޮގްރާމުގައި ޓިވެޓް ދާއިރާ އަށް ނިސްބަތްވާ 60 ފަރާތަކުން ބައިވެރިވެއެވެ.
މި ހަފްލާގައި ހަޔާ އެޑިއުކޭޝަން މިނިސްޓަރ ޑރ. މަރިޔަމް މާރިޔާ ވީޑިޔޯ މެދުވެރިކޮށް ދެއްވި ހާއްސަ މެސެޖްގައި ގައުމީ ފެންވަރުގެ ޓިވެޓް ޕޮލިސީއެއް އޮތުމުގެ މުހިއްމުކަމަށް އަލިއަޅުވާލިއެވެ. އެގޮތުން މާރިޔާ ވިދާޅުވީ، ބަދަލުވަމުންދާ ވަޒީފާގެ ބާޒާރަށް ބޭނުންވާ ހުނަރާއި މައުލޫމާތު ލިބިފައިވާ ފަރުދުންތަކެއް ބިނާކުރުމުގެ މުހިއްމުކަން މާރިޔާ ފާހަގަކުރިއެވެ.
އިތުރަށް މާރިޔާ ވިދާޅުވީ، މި ޕޮލިސީގެ ސަބަބުން އިގްތިސާދަށާއި ދިވެހީންނަށް ފާގަތި މުސްތަގްބަލެއް ގެނުވާނެ ކަމަށެވެ.
މި ހަފްލާގައި ވާހަކަދައްކަމުން އެމްއެންއެސްޑީގެ ޗީފް އެގްޒެކެޓިވް އޮފިސާ ޑރ ޒަހުރާ މުހައްމަދު ވިދާޅުވީ މި ތަމްރީނު ޕްރޮގްރާމްގެ މައިގަނޑު މަގްސަދަކީ ދިވެހިރާއްޖޭގެ "ޓިވެޓް" ދާއިރާގެ ޕޮލިސީތައް ތައްޔާރުކުރުމަށް ކަނޑައަޅާފައިވާ ލަނޑުދަނޑިތައް ބަލައި، އެ ލަނޑުދަނޑިތައް ހާސިލްކުރުމުގައި ކުރިމަތިވާ މައްސަލަތަކާއި، ގޮންޖެހުންތައް ދެނެގަތުން ކަމަށެވެ. އެގޮތުން، މީގެ ކުރިން އެކުލަވާލައިފައިވާ ސްޓްރެޓެޖިކް ޕްލޭންތައް ދިރާސާކޮށް، މުސްތަގުބަލުގައި ބޭނުންކުރެވޭނެ ހަރުދަނާ ޓިވެޓް ޕޮލިސީ ޕްރޭމްވޯކެއް އެކުލަވާލެވުން ކަމަށް ވެސް ވިދާޅުވިއެވެ.
މީގެއިތުރުން ޒަހުރާ ވިދާޅުވީ، މި ޕޮލިސީ ފްރޭމްވޯކްގެ އެހީގައި މަސައްކަތްތެރިކަމާއި ގުޅޭ ތައުލީމާއި ތަމްރީނު ދިނުމަށް ބޭނުންކުރާ ކަރިކިއުލަމްތައް އެކުލަވާލުމާއި، ސްޓްރެޓެޖިކް ޕްލޭންތައް ކުރިއަށް ގެންދިއުމާއި، ވަސީލަތްތައް ރާއްޖޭގެ އެކި ކަންކޮޅުތަކަށް ފޯރުކޮށްދިނުމަށް މަގުފަހި ވެގެންދާނެ ކަމަށެވެ. އަދި މަސައްކަތްތެރިކަމުގެ ސިނާއަތްތަކާއި ގުޅުން ބަދަހިކޮށް، ތަމްރީނުތައް ހިނގަމުންދާގޮތް ބަލައި، ތަމްރީނުތަކުގެ ފެންވަރު ކަށަވަރުކުރުމާއި، ވަޒަންކުރެވޭނެ ނިޒާމެއް ގާއިމްކުރެވޭނެ ކަމަށްވެސް ޒަހުރާ ވިދާޅުވިއެވެ.
