ޕީޖީ އޮފީހުގެ ވިކްޓިމް ސަޕޯޓް ނިއުސްލެޓާ "ނިޔާވެހި" އިފްތިތާހުކޮށްފި
ޕްރޮސިކިއުޓާ ޖެނެރަލްގެ އޮފީސް (ޕީޖީ) ގެ ވިކްޓިމް ސަޕޯޓް ނިއުސްލެޓާ "ނިޔާވެހި" އިފްތިތާހު ކޮށްފިއެވެ.
ނިޔާވެހި މިއީ ޕީޖީ އޮފީހުން ނެރެން ފެށި ދެވަނަ ނިއުސްލެޓާއެވެ. މި ނިއުސްލެޓާއަކީ، އިޖުތިމާއީ ހިދުމަތުގައި މަސައްކަތްކުރައްވާ ފަންނީ ބޭފުޅުންނަށް އަމާޒުކޮށް ނެރެންފަށާފައިވާ ނިއުސްލެޓާއެކެވެ. އަދި އެ އޮފީހުން ބުނި ގޮތުގައި މި ނިއުސްލެޓާ ނެރޭނީ މަހަކު އެއްފަހަރު ކަމަށެވެ.
އެ ނިއުސްލެޓާއަކީ ޕީޖީ ހުސައިން ޝަމީމުގެ އިސްނެންގެވުމަކަށް ކުރާ މަސައްކަތެކެވެ.
ޕީޖީ އޮފީހުން ބުނީ، ވިކްޓިމް ސަޕޯޓަށް ހާއްސަކޮށް އެ އޮފީހުން ނިއުސްލެޓާ ނެރެންފެށީ، ވިކްޓިމް ސަޕޯޓް ދާއިރާއަކީ، އިޖްތިމާއީ ހިދުމަތްތެރިންގެ ދާއިރާއާއި، ޖިނާއީ އަދުލުގެ ނިޒާމުގެ އިތުރުން ކުޑަކުދިންގެ އަދުލުގެ ނިޒާމާއި، ގާނޫނީ ނިޒާމާ ގުޅޭ ހިސާބެއްގައި މަސައްކަތްކުރައްވާ ފަންނީ ބޭފުޅުން ހިމެނޭ ދާއިރާއަކަށް ވާތީއެވެ. އަދި ޖިނާއީ އަދުލުގެ ނިޒާމާއި، ކުޑަކުދިންގެ އަދުލުގެ ނިޒާމަށް އަންނަ ބަދަލުތައް ދާއިރާގެ ފަންނީ ބޭފުޅުންނަށް ދުވަހުން ދުވަހަށް ފެންނާނެގޮތް ހެދުމަށް ކަމަށެވެ.
އެގޮތުން ވިކްޓިމުން ހިމެނޭ މައްސަލަތަކުގައި އަމަލުކުރާ އުސޫލުތަކަށް އަންނަ ބަދަލުތަކާއި، ކޯޓުތަކުން ނިންމަވާ ނިންމެވުންތަކުން ކަނޑައެޅޭ އުސޫލުތައް ނިޔާވެހިގައި ޝާއިއުކުރެވޭނެ ކަމަށް އެ އޮފީހުން ބުނެއެވެ. އަދި އޭގެއިތުރުން، އެކަހަލަ މައްސަލަތަކުގައި އެ އޮފީހުން އަމަލުކުރާ އުސޫލުތަކަށް އަންނަ ބަދަލުތައް ވެސް އޭގައި ޝާއިއުކުރެވޭނެއެވެ.
އިތުރަށް އެ އޮފީހުން ބުނީ، އަމާޒަކީ ރާއްޖޭގެ ޖިނާއީ އަދުލުގެ ނިޒާމުގައި ވިކްޓިމް ސަޕޯޓް ދާއިރާގައި މަސައްކަތްކުރައްވާ ފަންނީ ބޭފުޅުންނަކީ، މި ދާއިރާއިން ދުނިޔޭގެ ފެންވަރުގެ ހިދުމަތެއްދޭ ބަޔަކަށް ހެދުން ކަމަށެވެ.
މި ދާއިރާގެ ކަންކަމާބެހޭ މަޢުލޫމާތު ހިމެނޭ ރަސްމީ ނިއުސްލެޓަރއެއް ނުވަތަ އެނޫންވެސް ޕަބްލިކޭޝަނެއް މިވަގުތަކު ނެތް ކަމަށް ޕީޖީ އޮފީހުން ބުނެފައިވެއެވެ.
"ނިޔާވެހި" ގެ ފުރަތަމަ އަދަދު މިއަދު ވަނީ ނެރެފައެވެ. އަދި ކޮންމެ މަހަކު އެއްފަހަރު އާ އަދަދެއް ނެރެން ނިންމާފައިވާއިރު، މި ނިއުސްލެޓާގައި ލިޔުމުގެ ފުރުސަތު އެ ދާއިރާގެ ފަންނީ ބޭފުޅުންނަށް ވަނީ ހުޅުވާލެވިފައި ކަމަށް ވެސް އެ އޮފީހުން ބުނެފައުވެއެވެ.
މިހާރު ވަނީ އެ ނިއުސްލެޓާއަށް ސަބްސްކްރައިބް ކުރުމުގެ ފުރުސަތު ހުޅުވާލައިފައެވެ.
