ސަދާގެ މަރުގެ މައްސަލައިގެ ފުރަތަމަ އަޑުއެހުން މާދަމާ
އޮކްޓޫބަރު 2021 ގައި ޏ. ފުވައްމުލަކު ހޮސްޕިޓަލުން ޖެހި އިންޖެކްޝަނެއްގެ ސަބަބުން ހަ އަހަރުގައި ސަދާ ސައުދުﷲ އަހުމަދު ނިޔާވި މައްސަލައިގައި އިހުމާލުވެފައިވާ ޑޮކްޓަރުންނާއި ނަރުހުންނަށް ކުރާ ޖިނާއި ދައުވާ ފުރަތަމަ އަޑުއެހުން މާދަމާއަށް ތާވަލުކޮށްފިއެވެ.
ސަދާ ނިޔާވީ ބަނޑަށް ތަދުވެ، ހޮޑުލެވޭތީ ހޮސްޕިޓަލަށް ގެންގޮސް ފަރުވާދެމުން ދަނިކޮށެވެ. މި މައްސަލަ ބަލައި، އެޗްއާރުސީއެމުން ވަނީ ކުއްޖާގެ ކުރީގެ މެޑިކަލް ހިސްޓްރީ ޑޮކްޓަރުން ރަނގަޅަށް ބަލާފައި ނެތް ކަން ފާހަގަ ކޮށްފައެވެ. ކުއްޖާ އޮތް ހާލަތުގައި ވަގުތުން ފަރުވާ ދޭން ޖެހޭ އިރު ވެސް ފަރުވާ ދިނުމުގައި ލަސްތަކެއް ހުރި ކަން ވެސް އެ ކޮމިޝަންގެ ރިޕޯޓުގައި އޭރު ފާހަގަކޮށްފައިވެއެވެ.
ސަދާގެ ބައްޕަ އަދި ނެޝަނަލް ހޮޓެލްސް އަދި ގެސްޓްހައުސް އެސޯސިއޭޝަންގެ އެސްކޯ މެމްބަރު ސައުދުﷲ އަހުމަދު ހަސަން ފޭސްބުކްގައި ކުރި ޕޯސްޓެއްގައި ވިދާޅުވީ، ސަދާ ނިޔާވި ހާދިސާ ގައި ފުވައްމުލައް ހޮސްޕިޓަލުން އިހުމާލުވީ ސިއްހީ ހިދުމަތްތެރިންނާއި ދެކޮޅަށް ކުރާ ދައުވާގެ ކޯޓުގެ ފުރަތަމަ އަޑުއެހުން މާދަމާ 11 ޖަހާއިރު އޮންނާނެ ކަމަށެވެ.
ސައުދުﷲ ވިދާޅުވީ، މި މަސައްކަތް ފެއްޓީ ސަރުކާރުން ހިންގަމުންދާ ހޮސްޕިޓަލުތަކުގެ އިހުމާލުން ލިބޭ އަނިޔާތަކަށް ހައްލެއް ލިބޭނެ ކަމުގެ އުންމީދުގައި ކަމަށެވެ.
"ދިވެހި ދައުލަތުގެ ހޮސްޕިޓަލް ތަކުން ފަރުވާ ކުޑަވުމުގެ ސަބަބުން އަދި އިހުމާލު ތަކުން ލިބޭ އަނިޔާ ތަކަށް ހައްލެއް ލިބޭނޭ ކަމުގެ ފުރިހަމަ އުއްމީދުގައި މި މަސައްކަތް ފެށީ އަދި އުއްމީދު ކުރަނީވެސް،" އެ ޕޯސްޓުގައި ސައުދުﷲ ވިދާޅުވެފައިވެއެވެ.
