އެސްއޯއީ ކޮމިޓީއަށް އޭސީސީ ހާޒިރުކުރަނީ!
ރައްޔިތުންގެ މަޖިލީހުގެ ސްޓޭޓް އޯން އެންޓަޕްރައިސަސް (އެސްއޯއީ) އަށް އެންޓި ކޮރަޕްޝަން ކޮމިޝަން (އޭސީސީ) ގެ މެންބަރުން ހާޒިރުކުރުމަށް ފާސްކޮށްފި އެވެ.
އިއްޔެ ކުރިއަށް ދިޔަ އެސްއޯއީ ކޮމިޓީގެ ބައްދަލުވުމުގައި އޭސީސީ ހާޒިރުކުރަން ހުށަހެޅި އެ ކޮމިޓީގެ ނައިބް މުގައްރިރު، ފުވައްމުލަކު ދެކުނު ދާއިރާގެ މެންބަރު އިބްރާހިމް ހުސެއިން (އިއްބެ) އެވެ.
އޭސީސީ ހާޒިރުކުރުމަށް ހުށަހަޅާ ސަބަބެއް ކަމަށް އިއްބެ ވިދާޅުވީ އެ ކޮމިޝަންގެ މަސައްކަތް ކުރިއަށްދާ ގޮތް ބެލުމަކީ މުހިއްމު ކަމަކަށްވާތީ އެވެ.
"....އޭސީސީ މި ކޮމިޓީއަށް ހާޒިރުކޮށް އަޅުގަނޑުމެން މައުލޫމާތު ސާފުކޮށް ކުރީގައި ކަންތައް ކުރެވިފައި ހުރި ގޮތާއި މިހާރު އެ ބޭފުޅުން ރޭވިފައި ހުރި ގޮތާއި ސާފުކުރަން ބޭނުންވާ ކަމަށް އަޅުގަނޑު ހުށަހަޅާލަން" އިއްބެގެ ހުށަހެޅުން ފާސްވީ ކޮމިޓީއަށް ވަޑައިގެންނެވި މެންބަރުންގެ އިއްތިފާގުންނެވެ.
މި ނިންމުމާއެކު އެސްއޯއީ ކޮމިޓީން އޭސީސީއަށް ނޯޓިސް ފޮނުވާނެ އެވެ.
މަޖިލީހުގެ ގަވައިދު ބުނާ ގޮތުން އޭސީސީ ފަދަ މިނިވަން މުއައްސަސާތައް ޖަވާބުދާރި ކުރުވުމުން މެންޑޭޓް އޮންނަނީ މަޖިލީހުގެ މިނިވަން މުއައްސަސާތަކުގެ ކޮމިޓީއަށެވެ. އެހެން ނަމަވެސް އެސްއޯއީ ކޮމިޓީއަށް އޭސީސީ ހާޒިރުކުރަނީ ކުންފުނިތަކާއި ގުޅޭ ގޮތުން ސުވާލުކުރުމަށް ކަމަށް ބެލެވެ އެވެ.
