ރިއަލް އެސްޓޭޓް ބިލަށް ޕާޓީތަކާއި ޖަމިއްޔާތަކުގެ ޚިޔާލު ހޯދަނީ
ރިއަލް އެސްޓޭޓް ވިޔަފާރީގެ ބިލަށް ސިޔާސީ ޕާޓީތަކާއި މަދަނީ ޖަމިއްޔާތަކުގެ ޚިޔާލު ހޯދުމަށް ރައްޔިތުންގެ މަޖިލީހުގެ ގައުމީ ތަރައްގީއާއި ތަރިކައިގެ ކޮމިޓީން މިއަދު ނިންމައިފިއެވެ.
ސަރުކާރުގެ ފަރާތުން މަޖިލީހަށް ހުށަހަޅާފައިވާ ރިއަލް އެސްޓޭޓް ވިޔަފާރީގެ ބިލަށް ސިޔާސީ ޕާޓީތަކާއި މަދަނީ ޖަމިއްޔާތަކުގެ މަޝްވަރާ ހޯދުމަށް ޤައުމީ ތަރައްޤީއާއި ތަރިކައިގެ ކޮމިޓީން ފާސްކޮށްފިއެވެ.
މިއަދު ބޭއްވި އެ ކޮމިޓީގެ ބައްދަލުވުމުގައި މިގޮތަށް ހުށަހަޅުއްވީ ކޮމިޓީގެ މުގައްރިރު، ބާރަށު ދާއިރާގެ މެންބަރު އިބްރާހީމް ޝުޖާއުއެވެ.
މި ހުށަހެޅުމަށް ހޯރަފުށި ދާއިރާގެ މެންބަރު ޢަލީ މޫސާ ތާއީދު ކުރެއްވިއިރު، ކޮމިޓީގައި ބައިވެރިވެވަޑައިގެންނެވި ހުރިހާ މެންބަރުންގެ އިއްތިފާގުން ވަނީ މިގޮތަށް ފާސްކޮށްފައެވެ. މި ބިލަށް ޕާޓީތަކާއި ޖަމިއްޔާތަކުގެ ޚިޔާލު ހޯދުމަށް، މިދިޔަ ބުރާސްފަތި ދުވަހު އޮތް ބައްދަލުވުމުގައި ތޮއްޑޫ ދާއިރާގެ މެންބަރު ހުސައިން ސަމީރު ވެސް ހުށަހެޅުއްވިއެވެ. ނަމަވެސް އެ ދުވަހު އެއްވެސް މެންބަރަކު ތާއީދު ނުކުރެއްވުމުން އެކަން ކުރިއަކަށް ނުދެއެވެ.
މިއަދުގެ ބައްދަލުވުމުގައި މުޤައްރިރު ޝުޖާއު ވިދާޅުވީ، ކޮމިޓީގެ މަސައްކަތްތައް ކުރިއަށް ގެންދާނީ މައިނޯރިޓީގެ އަޑުއަހައިގެން ކަމަށާއި މެންބަރު ސަމީރު ކުރިން ހުށަހެޅުއްވީ ރަނގަޅު ކަމެއް ކަމަށް ޤަބޫލުކުރައްވާ ކަމަށެވެ. ޝުޖާއު ވިދާޅުވި ގޮތުގައި ޕާޓީތަކާއި ޖަމިއްޔާތަކުން ބިލާ މެދު ޚިޔާލު ފާޅުކުރަން ބޭނުންވާކަން ލިޔުމުން އެންގުމުން، އެ ފަރާތްތައް ކޮމިޓީއަށް ހާޒިރުކޮށް ވާހަކަ ދެއްކުމުގެ ފުރުސަތު ދޭނެއެވެ.
އާންމުކޮށް ބިލުތަކަށް ޚިޔާލު ހޯދަން ދޭ ހަތް ދުވަހުގެ ބަދަލުގައި، މި ބިލަކީ ގިނަ ރައްޔިތުންގެ މަސްލަހަތު ހިމެނޭ ކަމަކަށް ވާތީ 14 ދުވަހުގެ މުއްދަތެއް ދިނުމަށް ވެސް ކޮމިޓީން ވަނީ ނިންމާފައެވެ. މީގެއިތުރުން، މީގެ ކުރިން ކަމާ ބެހޭ މުއައްސަސާތަކުން ހަމައެކަނި ލިޔުމުން ޚިޔާލު ހޯދަން ނިންމާފައި އޮތް ނިންމުން ބަދަލުކޮށް، އެ ފަރާތްތައް ވެސް ކޮމިޓީއަށް ހާޒިރުކޮށް ސުވާލު ކުރުމަށް ވަނީ ނިންމާފައެވެ.
ސަރުކާރުގެ ފަރާތުން ހެންވޭރު އުތުރު ދާއިރާގެ މެންބަރު އަހުމަދު އައިފާން ހުށަހެޅުއްވި މި ބިލުގެ މަގްސަދަކީ ރިއަލް އެސްޓޭޓް ދާއިރާ ހަރުދަނާކޮށް، ޑިވެލޮޕަރުން ރަޖިސްޓްރީ ކުރުމާއި އެފަރާތްތަކުގެ ޒިންމާތަކާއި ހައްގުތައް ބަޔާންކުރާ ހާމަކަން ބޮޑު ނިޒާމެއް ގާއިމުކުރުމެވެ.



ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.