މި ނިމުނީ ކާމިޔާބު މުބާރާތެއް، މިހާރު އަމާޒުހުރީ ވޯލްޑްކަޕް ކޮލިފައިންއަަށް: ރުމޭނިއާ ކޯޗު
މިއަހަރުގެ ޔޫރޯއަކީ ރުމޭނިއާއަށް ކާމިޔާބު މުބާރާތެއްކަމަށް އެ ޓީމުގެ ކޯޗު އެޑްވާޑް އިއޮޑަނެސްކޫ ބުނެފިއެވެ.
ޔޫރޯ 2024 ގެ ނޮކްއައުޓް ބުރުގައި ރޭ ނެދަލެންޑްސް އަތުން ބަލިވެ މުބާރާތާ އަލްވަދާއު ކިޔަން ޖެހުނު މެޗަށްފަހު ވާހަކަދައްކަމުން އިއޮޑަނެސްކޫ ބުނީ އެ ޓީމަށް މިއަހަރުގެ މުބާރާތް ކާމިޔާބު ކަމަށް ވިޔަސް ހިތާމަ ކުރާކަންކަން އެބަހުރިކަަމަށެވެ.
ރުމޭނިއާ ޔޫރޯ މެޗަކުން މޮޅުވެ މުބާރާތުގެ ނޮކްއައުޓް ބުރަށް ގޮސްފައިވަނީ 24 އަހަރު ފަހުންނެވެ. 2000 ވަނަ އަހަރު ބޭއްވި މުބާރާތުން ރުމޭނިއާ ކެޓީ ކުއާޓާ ފައިނަލުންނެވެ. އޭގެ ފަހުން އެ ޓީމު އަދި ޔޫރޯ މަޗަކުން ވެސް މޮޅުވެފައެއް ނުވެއެވެ
އިއޮޑަނެސްކޫ ބުނީ އެ ޓީމު ނިކުތީ 2000 ވަނަ އަހަރު އެ ޓީމު ނެރުނު ނަތީޖާއަަށް ވުރެ ރަނގަޅު ނަތީޖާއެއް ނެރުމަށްކަމަށެވެ. އެހެންކަމުން ނޮކްއައުޓް ބުރުން މުބާރާތާ ވަކިވުމުން ދެރަވާކަމަށް އޭނާ ބުންޏެވެ.
މުބާރާތުން ކެޓުމުގެ ފުރިހަމަ ޒިންމާ ނަގާކަމަށާއި، އެކަމުގެ ސަބަބުން އޭނާގެ މަގާމު ގެއްލިދާނެކަމަށް ނުވިސްނާކަމަށް އިއޮޑަނެސްކޫ ބުންޏެވެ. އޭނާ ބުނީ އޭނާގެ ވިސްނުމުގައި ހުރީ ވޯލްޑްކަޕް ކޮލިފައިންގައި ރަނގަޅު ނަތީޖާއެއް ނެރެ، ޓީމު ވޯލްޑްކަޕަށް ކޮލިފައިކޮށްދިނުންކަމަށް ވެސް އިއޮޑަނެސްކޫ ބުންޏެވެ.
ރުމޭނިއާ ނޮކްއައުޓް ބުރަށް ކޮލިފައިވީ ގްރޫޕް އީގެ އެއްވަނަ ޓީމުގެ ގޮތުގައެވެ. އެ ޓީމު ކުރި ހޯދީ ބެލްޖިއަމް ދެވަނައަށް ވައްޓާލުމަށްފަހުގައެވެ. އެ ގްރޫޕްގެ ތިންވަނަ ލިބުނީ ސްލޮވާކިއާއަށެވެ. އެ ގްރޫޕުން މުބާރާތުން ކެޓީ ޔޫކްރޭންއެވެ.
