އަޅުގަނޑުމެންނާ ހަވާލުވާން ޖެހުނީ ސަރުކާރެކޭ ކިޔާ ތޮށިގަނޑަކާ: ޝުޖާއު

ރިޔާސީ އިންތިހާބު ކާމިޔާބުކޮށް ޕްރޮގްރެސިވް ކޮންގްރެސް ކޯލިޝަން ހަވާލުވާން ޖެހުނީ ސަރުކާރެކޭ ކިޔާ "ތޮށިގަނޑު" އަކާ ކަމަށް ރައްޔިތުންގެ މަޖިލީހުގެ ބާރަށު ދާއިރާގެ ޕީއެންސީ މެމްބަރު އިބްރާހިމް ޝުޖާއު މިއަދު ވިދާޅުވެއްޖެ އެވެ.
ޝުޖާއު މިހެން ވިދާޅުވެފައި ވަނީ އިއްޔެ އެމްޑީޕީ ޕީޖީ ގްރޫޕުން ބޭއްވި ނޫސްވެރިންގެ ބައްދަލުވުމެއްގައި ކެންދޫ ދާއިރާގެ އެ ޕާޓީގެ މެންބަރު މައުރޫފް ޒާކިރު، (މަޓޭ)، ރައީސް ޑރ. މުހައްމަދު މުއިއްޒުގެ ސަރުކާރަކީ ކަނޑައެޅިގެން އޮޅުވާލައި ދޮގުހަދާ ސަރުކާރެއް ކަމަށް ރައްޔިތުން މިހާރު ވެސް ގަބޫލުކުރާ ކަމަށް ވިދާޅުވެ ދެއްކެވި ވާހަކައަށް ރައްދު ދެމުންނެވެ.
އެކްސްގައި ކުރެއްވި ޕޯސްޓެއްގައި ޝުޖާއު ވިދާޅުވީ އެގޮތަށް ވާހަކަ ދައްކަވާއިރު ކޮންމެވެސް ވަރެއްގެ ލަދު ހަޔާތެއް ހުންނަންވާނެ ކަމަށެވެ. ޕްރޮގްރެސިވް ކޮންގްރެސް ކޯލިޝަނުން ހަވާލުވާން ޖެހުނީ ސަރުކާރެކޭ ކިޔާ ތޮށިގަނޑަކާކަން ފާހަގަކުރައްވާ ޝުޖާއު ވިދާޅުވީ ރައްޔިތުން ނިކުމެ ވެރިކަން ބަދަލު ނުކުރި ނަމަ މިއަދު ގައުމު އޮންނާނީ ބަނގުރޫޓުވެ، ބޭންކްރަޕްސީ އިއުލާނުކޮށްފައި ކަމަށެވެ.
ބަލަ ތިބޭފުޅުން ވެރިކަން ކުރީ ފައިސާ ޗާޕްކޮށްގެންނޭ. މުސާރަތައް ސިޔާސީގޮތުން ބޮޑުކޮށް، ކުޅުނު ނާޗަރަންގީން ބޯފެންކޮޅު އިހުހުރި އަގުގައި ގަންނާކަށް ރައްޔިތަކަށް ނުލިބުނޭ. ތާހިރު ބަޔަކަށް ވާން ނޫޅުއްވާ،" ޝުޖާއު ވިދާޅުވި އެވެ.ޝުޖާއު ވިދާޅުވި ގޮތުގައި މި ގައުމު ހަގީގީ މާނައިގައި ރައީސް މުއިއްޒު ސަލާމަތް ކޮށްދެއްވާނެ ކަމުގަ އެވެ. ދައުލަތުގެ ހަރަދު ކުޑަކުރުމާއި އާމްދަނީ އިތުރު ކުރުމުގެ ސިޔާސަތެއްގެ އިތުރުން މީޑިއަމް ޓާމް ރެވެނިއު ސްޓްރެޓެޖީއެއް އެކުލަވާލުމަށް ވަޒީރުންގެ މަޖިލިހުން މިދިޔަ ހަފުތާގައި ވަނީ ނިންމަވާފަ އެވެ. ވަޒީރުންގެ މަޖިލިހުން އެގޮތަށް ނިންމަވާފައި ވަނީ ފިނޭންސް މިނިސްޓްރީން ހުށަހެޅި ކަރުދާހަކަށް މަޝްވަރާ ކުރުމަށް ފަހުގަ އެވެ.





ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.