މަޖިލިހުގައި ޕީއެންސީގެ 80 ވަރަކަށް މެމްބަރުން އެ ތިބީ އެމްޑީޕީގެ މަސައްކަތުން: ފައްޔާޒު
ހިނގަމުންމިދާ ވިހި ވަނަ ރައްޔިތުންގެ މަޖިލިހުގައި ވެރިކަން ކުރާ މައި ޕާޓީ، ޕީޕަލްސް ނޭޝަނަލް ކޮންގްރެސް (ޕީއެންސީ) އަށް ނިސްބަތްވާ އަށްޑިހަވަރަކަށް މެމްބަރުން އެ ތިބީ އެމްޑީޕީގެ އިސްލާހީ މަސައްކަތުގެ ސަބަބުން ކަމަށް އެ ޕާޓީގެ ޗެއާޕާސަން ފައްޔާޒު އިސްމާއިލް ވިދާޅުވެއްޖެ އެވެ.
އެމްޑީޕީގެ ކުރިމަގާއި ރާއްޖޭގެ ސިޔާސީ މަޝްރަހާ ގުޅޭގޮތުން ރާއްޖެ ޓީވީގައި ވާހަކަ ދައްކަވަމުން ފައްޔާޒު ވިދާޅުވީ ރައްޔިތުންގެ ހިޔާލު ފާޅުކޮށް، ގަލަމާއި ދުލުގެ މިނިވަންކަން ރާއްޖެއަށް ހޯދައިދިނީ އެމްޑީޕީން ކަމަށެވެ. ވޯޓު ދިނުމުގެ ހައްގާއި އެ ހައްގު ބޭނުން ކުރުމާއި ނުކުރުމާ އަދި އެހެންހުރި ކަންކަން އިހުތިޔާރު ކުރުމުގެ ފުރުސަތު ލިބުނީ އެމްޑީޕީގެ 19 އަހަރުގެ ސިޔާސީ މަސައްކަތުން ކަމަށް ފައްޔާޒު ވިދާޅުވި އެވެ. އޭނާ ވިދާޅުވި ގޮތުގައި ޑިމޮކްރަސީގެ ވާހަކަ އާއި އަދުލްއިންސާފުގެ ވާހަކަ ގަބޫލު ނުކުރައްވާ ބޭފުޅުން ވެސް އެ ފަދަ ވާހަކަތައް ދައްކަވައިގެން ވޯޓު ހޯއްދަވައިގެން ވެރިކަމަށް ވަޑައިގަތުމަކީ ވެސް އެ ޕާޓީ އާ އަދި އިސްލާހީ ހަރަކާތުގައި ބައިވެރިވި ފަރާތްތަކުގެ މަސައްކަތުގެ ނަތީޖާ ކަމުގަ އެވެ.
"މިއަދު ދިވެހިރާއްޖޭގެ ރައްޔިތުންގެ މަޖިލިހަށް، މިސާލަކަށް އެ ގޮނޑިތަކުގައި ތިއްބެވި ބޭފުޅުންނަށް އެ އުންމީދު ކުރެވުނީ، މިސާލަކަށް ޕީއެންސީގެ ފަރާތުން އެ ތިބަ އަށްޑިހަވަރަކަށް ބޭފުޅުންނަށް މަޖިލިހަށް ވަނުމުގެ އުންމީދު ކުރެވި އެތާ އެ ތިބެވުނީ ވެސް އެމްޑީޕީގެ މަސައްކަތުން. އެހެންނަމަ އަޅުގަނޑެއް ގަބޫލެއް ނުކުރަން އެކަހަލަ އާންމު ރައްޔިތުންނަށް ދިވެހިރާއްޖޭގައި އެފަދަ ފުރުސަތުތައް އޮތީސް ކަމަކަށް،" ފައްޔާޒު ވިދާޅުވި އެވެ.
ފައްޔާޒު ވިދާޅުވެފައި ވަނީ ހެޔޮ ކަންތައްތަކެއްގެ ވާހަކަ އެމްޑީޕީން ދައްކަމުން އަންނައިރު، އެކަން ބަލައިގަންނަން ތިބި ރައްޔިތުންގެ ލޯކުރިމަތީގައި ފެންނަން ހުންނައިރު އެގޮތަށް އެކަން ނުދެކޭ ކަމުގެ އިހުސާސް ކުރެއްވޭ ކަމަށެވެ. ހަމައެގޮތަށް އެ ކަންކަން ވިއްކަން ތިބޭ ފަރާތްތަކުން ވެސް އެގޮތަށް ގަބޫލު ނުކުރާ ފަހަރު އަންނަ ކަމަށް ފައްޔާޒު ވިދާޅުވި އެވެ. އާ ގާނޫނުއަސާސީ އާއެކު ރާއްޖޭގައި އަނިޔާވެރިކަމުގެ ވެއްޓެއް އުފެދުމުގެ ފުރުސަތު ދެން ނޯންނާނެ ކަމަށް ގަބޫލު ކުރެއްވުނު ނަމަވެސް ކަންތައް ވަމުން ދިޔައީ އެގޮތަށް ނޫންކަން ފާހަގަކުރައްވާ އެމްޑީޕީގެ ޗެއާޕާސަން ވިދާޅުވީ އޭނާއަށް ގަބޫލު ކުރެއްވޭ ގޮތުގައި އިސްލާހީ މަސައްކަތަކީ ދުވަހަކު ވެސް ނިމޭނެ ކަމެއް ނޫން ކަމަށެވެ.
"މި ހައްގުތަކަކީ ހަމަ އިސާހިތަކު އަތުން ބީވެގެން ހިނގައިދާނެ އެއްޗެއް ކަމަށް ގަބޫލުކުރަން ޖެހޭނެ. އަބަދުވެސް އެކަން ދަނެގެން، ވިސްނައިގެން ކުރިއަށް ދާން އެބަ ޖެހޭ،" ފައްޔާޒު ވިދާޅުވި އެވެ.
ފައްޔާޒު ވިދާޅުވި ގޮތުގައި ހައްގުތަކުގެ ވާހަކަ ދައްކައިގެން ވެރިކަމަށް އައި ބަޔަކު އެކަން ބަދަލުކޮށް، ކަންކަން އަތްމައްޗަށް ނަގައިގެން ހައްގުތައް ގެއްލުވާލާފައިވާ ތަން ދުނިޔެ އާއި ރާއްޖޭން ވެސް ފެންނަން އެބަހުރި ކަމުގަ އެވެ. އެކަހަލަ ސިގްނަލްތަކެއް މިހާރު ވެސް ފެންނަމުން އަންނަ ކަމަށް އޭނާ ފާހަގަކުރެއްވި އެވެ.
Ads by STO
