ގަވަރުނަރު ހާޒިރުކުރުން މާލިއްޔަތު ކޮމިޓީގެ އެޖެންޑާއިން ނަގައިފި
މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ގަވަރުނަރު އަލީ ހާޝިމާއި އޮތޯރިޓީގެ ދެ ބޭފުޅަކު ހާޒިރުކުރުމަށް މިއަދަށް ތާވަލުކުރި ރައްޔިތުންގެ މަޖިލިހުގެ މާލިއްޔަތު ކޮމިޓީގެ ބައްދަލުވުމުގެ އެޖެންޑާއިން އެ އޮތޯރިޓީގެ ބޭފުޅުން ހާޒިރުކުރުން ނަގައިފި އެވެ.
ގަވަރުނަރު ހާޒިރު ކުރުމަށް ނިންމާފައި ވަނީ މިއަދު 11:00 އަށް ތާވަލުކުރި ކޮމިޓީގެ ބައްދަލުވުމަށެވެ. އެ ބައްދަލުވުމަށް ގަވަރުނަރު ހާޝިމާ އެކު ޑެޕިއުޓީ ގަވަރުނަރު އަހުމަދު އިމާދާއި އެސިސްޓެންޓް ގަވަރުނަރު އިދުހާމް ހުސައިން ވެސް ބައިވެރިވެ ވަޑައިގަންނަވާ ގޮތަށް އޮތީ ހަމަޖެހިފަ އެވެ.
މަޖިލިހުގެ މާލިއްޔަތު ކޮމިޓީގެ ބައްދަލުވުމަށް އެމްއެމްއޭގެ ބޭފުޅުން ހާޒިރުކުރުން ކޮމިޓީގެ އެޖެންޑާއިން ނެގި ސަބަބާ ގުޅޭގޮތުން މަޖިލިހުން ބަހެއް ލިބޭ ގޮތް ވަނީ ނުވެފަ އެވެ.
މިއަދުގެ މާލިއްޔަތު ކޮމިޓީއަށް އެޖެންޑާކޮށްފައި ވަނީ ޑެބްޓް ބިލާއި ފިސްކަލް ރެސްޕޮންސިބިލިޓީ ބިލުގެ ސުންގަޑި ކަނޑައަޅައި ބިލުގެ މަސައްކަތް ކުރިއަށް ގެންދާނެ ގޮތާ މެދު މަޝްވަރާ ކުރުމެވެ. އަދި ކޮމިޓީއަށް ލިބިފައިވާ މައްސަލަތަކާ މެދު މަޝްވަރާ ކުރުމަށް ވެސް ވަނީ އެޖެންޑާ ކޮށްފަ އެވެ.
މާލިއްޔަތު ކޮމިޓީއަށް ގަވަރުނަރު ހާޝިމް ހާޒިރުކުރުމަށް ނިންމިއިރު، އޭނާ މަގާމުން ވަކިކުރަން ރައީސް ޑރ. މުހައްމަދު މުއިއްޒަށް ލަފާ ދޭން އެ ކޮމިޓީން ވަނީ ފާސްކޮށްފަ އެވެ. އެ މައްސަލަ އިސްވެ، މާލިއްޔަތު ކޮމިޓީއަށް ހުށަހަޅުއްވާފައި ވަނީ މަޖިލިހުގެ ނައިބު ރައީސް އަދި ދިއްގަރު ދާއިރާގެ މެމްބަރު އަހުމަދު ނާޒިމެވެ.
ނާޒިމް ވިދާޅުވެފައި ވަނީ އިގުތިސޯދު ހީނަރުވެ، އަލުން އަނބުރާ އިޔާދަކުރަން އުނދަގޫ ހިސާބަކަށް ގައުމުގެ އިގުތިސޯދު ނިކަމެތިވެގެން ދިޔައިރު، އެމްއެމްއޭގެ ގާނޫނުގައި ބަޔާން ކުރާ މަގުސަދުތައް ހާސިލު ކުރެވިފައިވާ ނުވާ ކަމަށެވެ. އަދި ސަރުކާރަށް އިގުތިސޯދީ ލަފާ ދިނުމާއި މަނިޓަރީ ޕޮލިސީ ވެސް އޭގެ އެންމެ އެކަށޭނެ ގޮތުގައި ހިނގަމުންދާ ކަމަށް ގަބޫލު ނުކުރައްވާ ކަމަށް އޭނާ ވިދާޅުވެފައިވެ އެވެ.
ނާޒިމް ތުހުމަތު ކުރެއްވި ގޮތުގައި ރާއްޖޭގައި ހިންގާ ބޭންކުތަކާއި ފައިނޭންޝިއަލް އިންސްޓިއުޓްތަކުން އާންމުންނަށް ލޯނު ދޫކުރާ މިންވަރު ނުސީދާކޮަށް ހިފަހައްޓާ، ބޭންކުތަކުގެ ރިޒާވް، އެމްއެމްއޭގައި ބެހެއްޓުމަށް ގަވަރުނަރު ވަނީ ބާރު އަޅުއްވާފަ އެވެ. ނާޒިމް ވިދާޅުވި ގޮތުގައި މިގޮތަށް އަމަލު ކުރުމުގެ ސަބަބުން އިގުތިސޯދު ތެރޭގައި ދައުރުވަމުންދާ ފައިސާ މަދުވެ، އިގުތިސޯދީ މަސައްކަތްތައް ހުއްޓި، ގައުމުގެ އިގުތިސޯދުގެ ދުވެލި މަޑުޖެހިފައިވާ ކަމުގަ އެވެ.
