ރައީސްގެ ހަށިކޮޅުގައި “ހުޅުޖަހަން” ޖެހޭ ކަމަށް ބުނި މީހާ ހައްޔަރު ކޮށްފި
ރައީސް އިބްރާހިމް މުހައްމަދު ސޯލިހްގެ ހަށިކޮޅުގައި އަލިފާން ޖަހަން ގޮވާލި މީހާ މިއަދު ހައްޔަރުކޮށްފިއެވެ.
މިމައްސަލާގައި ކޯޓުއަމުރެއްގެ ދަށުން ހައްޔަރު ކޮށްފައި ވަނީ އުމުރުން 47 އަހަރުގެ ފިރިހެނެކެވެ. މި މީހާއަކީ ތ. ވިލިފުށްޓަށް އުފަން ނިސްބަތްވާ މީހެކެވެ.
ރައީސްގެ ހަށިކޮޅަށް ގެއްލުން ދިނުމަށް ގޮވާލި ގޮވާލުން، ޗެނަލް 13 ގައި ގެންދިޔަ ލައިވް ޕްރޮގްރާމެއްގައި ބްރޯޑްކާސްޓް ކުރެވިފައިވާތީ އެ ޗެނަލްއިން ވަނީ އެކަމަށް މަޢާފަށް ވެސް އެދިފައެވެ.
ރައްޔިތުންގެ އަޑު" ގެ ނަމުގައި ގެނެސްދިން ޕްރޮގްރާމްއަށް ގުޅި ބައިވެރިޔަކު ރައީސްއަށް ނިސްބަތްކޮށް އޭނާއަށް ފެންނަނީ އެމަނިކުފާނުގެ ހަށިކޮޅުގައި އަލިފާން ޖަހަންކަމަށް ބުނި ބުނުމަކީ އޭނާގެ އަމިއްލަ ހިޔާލުގެ މައްޗަށް ދެއްކި ވާހަކައެއް ކަން އެ ޗެނަލުން ވަނީ ފާހަގަކޮށްފައެވެ.
ޗެނަލް 13 އިން ބުނެފައިވާ ގޮތުގައި އެ ޗެނަލް އަކީ އެކަކު އަނެކަކަށް ނަފްރަތު އުފެއްދުމާއި އެންމެންގެ މެދުގައި އަނިޔާވެރިކަން އުފެއްދުމަށް ހިތްވަރު ދޭ ޗެނަލް އެއް ނޫންކަމަށެވެ. އަދި ކުރިއަށް އޮތްތާ މިފަދަ ފުުރުސަތަކަށް މަގުފަހި ވާފަދަ ކަމެއް ވިޔަ ނުދޭނެ ކަމަށްވެސް އެ ޗެނަލް އިން ވަނީ ބުނެފައެވެ.
މި މައްސަލަ އާއި ގުޅިގެން، ފުލުހުން ވިދާޅުވީ އެއީ ޓެރަރިޒަމަށް ހިތްވަރު ދިނުން ކަމަށް ބެލެވޭ ކަމަށާއި ފުލުހުން އެ މައްސަލަ ބަލަމުންދާ ކަމަށެވެ.
