ސިންގަޕޫރުގައި ހުންނަވާ ސަފީރަކަށް ޝަހީބު އައްޔަން ކުރަން މަޖިލީހުން ފާސް ކޮށްފި
ރާއްޖެ އިން ސިންގަޕޫރަށް ކަނޑައަޅާފައި ހުންނަވާ ސަފީރަކަށް ފޮރިން މިނިސްޓްރީގެ ޗީފް އޮފް ޕްރޮޓޮކޯލްގެ މަގާމުގައި ހުންނެވި އިބްރާހިމް ޝަހީބް އައްޔަން ރައްޔިތުންގެ މަޖިލީހުން މިއަދު ރުހުން ދީފިއެވެ.
މަޖިލީހުގައި ބޭއްވުނު ޖަލްސާގައި، ސިންގަޕޫރުގެ ސަފީރަކަށް، ޝަހީބު ހަމަޖެއްސުމަށް މަޖިލީހުގެ 58 މެންބަރުން ވަނީ އިއްތިފާގުވެފައެވެ.
ހާރިޖީ ދާއިރާގައި ގިނަ ދުވަސްތަކެއް ވަންދެން މަސައްކަތް ކުރައްވާފައިވާ ޝަހީބަކީ ސަރުކާރުގެ ބައެއް އިސްމަގާމުތަކުގައި މަސައްކަތް ކުރައްވާފައިވާ ބޭފުޅެކެވެ. އެގޮތުން ހޯމްމިނިސްޓްރީގެ ޕާމަނަންޓް ސެކްރެޓަރީއަކަށް ވެސް ޝަހީބް ވަނީ މަސައްކަތް ކުރައްވައިފައެވެ.
އޮސްޓްރޭލިއާއިން ޑިގްރީ ހާސިލްކުރައްވާފައިވާ ޝަހީބަކީ ރާއްޖޭގެ ހާރިޖީ ދާއިރާގައި މަސައްކަތް ކުރައްވާ އެންމެ ތަޖުރިބާކާރު އަދި އެ ދާއިރާގައި އެންމެ ދުވަސްވީ ބޭފުޅުންގެ ތެރޭގައި ހިމެނޭ ބޭފުޅެކެވެ. އޭނާ ފޮރިން މިނިސްޓްރީގެ ޗީފް އޮފް ޕްރޮޓޮކޯލްގެ މަގާމަށް އައްޔަން ކުރީ 2018 ވަނަ އަހަރުގެ ޑިސެމްބަރު މަހުގެ ތެރޭގައެވެ.
