ތަރައްގީގެ މަގުން ބާރަށް ކުރިއަށް ދެވޭނީ އާބާދީ އެއްފަސްކޮށްގެން: އަބްދުއްރަހީމް
ތަރައްގީގެ މަގުން އެންމެ ބާރަށް ކުރިއަށް ދެވޭނީ ތަރައްގީ އާއި އާބާދީ އެއްފަސްކޮށްގެން ކަމަށް ރައްޔިތުންގެ މަޖިލިހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެ އެވެ.
ކުޅުދުއްފުށި ސިޓީގައި ވޭސްޓް މެނޭޖްމަންޓް ކޯޕަރޭޝަން (ވެމްކޯ) ގެ ހިދުމަތްތައް އިފުތިތާހު ކުރުމަށް ބޭއްވި ރަސްމިއްޔާތު ޝަރަފުވެރިކޮށްދެއްވާ ވާހަކަފުޅު ދައްކަވަމުން އަބްދުއްރަހީމް ވިދާޅުވީ ރައީސް ޑރ. މުހައްމަދު ވެރިކަމާ ހަވާލުވެވަޑައިގެންނެވީ ދިވެހި ގައުމާއި ރައްޔިތުންނަށް ހިދުމަތް ކުރެއްވުމުގެ މަގުސަދުގައި ކަމަށެވެ. ރާއްޖޭގެ އެކި ކަންކޮޅުތަކުން ފެންނަނީ ގައުމުގެ ހާލަތު މިއަދު އޮތް ގޮތަށް ބަލާއިރު ވަރަށް ބާރު ސްޕީޑުގައި ވައުދުތައް ފުއްދަމުންދާ މަންޒަރު ކަމަށް އަބްދުއްރަހީމް ވިދާޅުވި އެވެ.
އަބްދުއްރަހީމް ވިދާޅުވެފައި ވަނީ ރައީސްގެ ވައުދުފުޅުތަކުގެ ތެރޭގައި ރާއްޖޭގެ އެކި ސަރަހައްދުތަކުގައި އާބަން ސެންޓަރުތަކެއް ތަރައްގީކުރުން ހިމެނޭއިރު ސިޓީތަކަށް ވެސް ހާއްސަ އިސްކަމެއް ދެއްވާ ކަމަށެވެ. އެގޮތުން އާބާދީ ބޮޑެތި ރަށްްރަށަށް އިސްކަންްދީގެން އެ ރަށްރަށް ތަރައްގީ ކޮށްގެން ނޫން ގޮތަކަށް ދެމެހެއްޓެނިވި ގޮތެއްގައި ތަރައްގީ ކުރިއަށް ނުގެންދެވޭނެ ކަމަށް އެމަނިކުފާނު ވިދާޅުވި އެވެ.
އެހެންނަމަވެސް ރައީސްގެ އަމާޒަކަށްވީ ތަރައްގީ އާއި އާބާދީ އެއްފަސް ކުރުމުގެ ސިޔާސަތެއް ގެންގުޅުންކަން އަބްދުއްރަހީމް ފާހަގަކުރެއްވި އެވެ. އަބްދުއްރަހީމް ވިދާޅުވި ގޮތުގައި އެއީ އެންމެ ފައިދާހުރި ގޮތް ކަމަށާއި ތަރައްގީގެ މަގުން އެންމެ ބާރަށް ދެވޭނީ އެގޮތުގައި ކުރިއަށް ގޮސްގެން ކަމަށް ރައީސް ގަބޫލުފުޅު ކުރައްވާ ކަމުގަ އެވެ.
"ތަރައްގީގެ މަގުން އެންމެ ބާރަށް ކުރިއަށް ހިނގާފައި ދެވޭނީ ތަރައްގީ އާއި އާބާދީ އެއްފަސްކޮށްގެން ކަމަށް ރައީސުލްޖުމްހޫރިއްޔާ ގަބޫލުފުޅު ކުރައްވަނީ. އެއްގޮތަކަށް ވެސް އަޅުގަނޑު މި ދަންނަވަނީ ކުދިކުދި ރަށްރަށުން މީހުން ބާލާ ވާހަކައެއް ނޫން. ތަރައްގީ އާއި އާބާދީ އެއްފަސްކުރީމާ އެމީހުން އަމިއްލައަށް އެ ތަންތަނަށް އަންނާނެ،" އަބްދުއްރަހީމް ވިދާޅުވި އެވެ.
އަބްދުއްރަހީމް ވިދާޅުވީ ރައީސްގެ ބޭނުންފުޅަކަށްވެފައި ވަނީ އާބަން ސެންޓަރުތަކެއް ގާއިމުކޮށް، މާލެ އާ އެއް ފެންވަރެއްގައި އެ ތަންތަނުން ހިދުމަތް ލިބޭނެ ނިޒާމެއް ގާއިމުކުރުން ކަމަށެވެ. އޭރުން މާލެ ތޮއްޖެހެމުންދާ ދިއުމަށް ނިމުމެއް އަންނާނެ ކަމަށް އެމަނިކުފާނު ވިދާޅުވި އެވެ.
ވެރިކަން ކުރާ މައި ޕާޓީ، ޕީއެންސީގެ ޗެއާޕާސަން ވިދާޅުވެފައި ވަނީ ގައުމު މިއަދު މި އޮތް ހާލަތުން އަރައިގަތުމަށް ވަރަށް ގިނަ މަސައްކަތްތައް ކުރަން ޖެހޭ ކަމަށެވެ. ކޮންމެ ސަރުކާރެއް އޮތަސް ރާއްޖެ މިހާރު މި އޮތް ގޮތަށް 500 ނުވަތަ 700 އާބާދީ އޮންނަ ރަށްތަކުގައި ހުރިހާ ހިދުމަތެއް ގާއިމުކުރުމަކީ އުނދަގޫ ކަމަކަށް ވާނެ ކަމަށް އަބްދުއްރަހީމް ވިދާޅުވި އެވެ.
އަބްދުއްރަހީމް ވިދާޅުވި ގޮތުގައި ރައީސް މުއިއްޒުގެ ސަރުކާރުގައި އަމާޒު ހިފާފައިވާ ތަރައްގީ އާއި އާބާދީ އެއްފަސް ކުރުމުގެ ސިޔާސަތުގެ ތެރެއިން ރައްޔިތުންނަށް ލުއިފަސޭހަކަން ލިބިގެންދާނެ ކަމުގަ އެވެ. އެގޮތުން ފެށޭ ކޮންމެ ހިދުމަތަކާ އެކު ފަސޭހަކަމާއި އިގުތިސޯދީ ގޮތުން ކުރިއެރުން ލިބިގެންދާނެކަން ވެސް އަބްދުއްރަހީމްގެ ވާހަކަފުޅުގައި ފާހަގަކުރެއްވި އެވެ.
