ރައީސް މުއިއްޒުގެ ނަފްސާނި މައްސަލަތަކެއް ހުރި ކަމަށް ޔާމީން ސިފަކޮށްފި
ބޯހިޔާވަހިކަން ފޯރުކޮށް ދިނުމަށް މި ސަރުކާރުން ފަށާފައިވާ ރަސްމާލެ މަޝްރޫއުގައި ކަންތައް ހިންގާފައިވާ ގޮތުން ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ނަފްސާނީ މައްސަލަތަކެއް ހުރިކަމުގެ ހެކިތަކެއް ފެނިވަޑައިގެންނެވި ކަމަށް ވިދާޅުވެ ކުރީގެ ރައީސް އަބްދުالله ޔާމީން ރޭ ފާޑު ވިދާޅުވެއްޖެ އެވެ.
ފީޕަލް ނޭޝަނަލް ފްރޮންޓް (ޕީއެންއެފް) އޮފީހުގައި ސިލްސިލާކޮށް ބާއްވަމުން އަންނަ ޖަލްސާތަކުގެ ތެރެއިން ރޭގެ ޖަލްސާގައި ރަސްމާލެ މަޝްރޫއުގެ ކަންކަން ހިނގާދިޔަ ގޮތަށް ތަފްސީލީ ގޮތެއްގައި ޔާމީން ވާހަކަ ދައްކާފައި ވެއެވެ. ރަސްމާލެ މަޝްރޫއު ރަސްމީކޮށް ފަށާފައިވަނީ މިދިޔަ އަހަރުގެ ޑިސެމްބަރު މަހުގެ 18 ވަނަ ދުވަހު އެވެ. ފުށިދިއްގަރުފަޅު ހިއްކައިގެން ތަރައްގީ ކުރާ މި ސިޓީގެ މަޝްރޫއު ހަވާލު ކުރީ ނެދަލޭންޑްސްގެ ބޮސްކާލިސްއާ ގުޅިފައިވާ ސްރީލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން (ސީއެމްސީ) އާ އެވެ.
ދައުލަތުގެ ބަޖެޓަށް ލުއިވާގޮތަށް ބިން ހިއްކަން ސީއެމްސީއާ ހަވާލު ކުރީ ފުށިދިއްގަރުފަޅުން 70 ހެކްޓަރު އަދި ހުޅުމާލެއިން 10 ހެކްޓަރުގެ ބިން އެ ކުންފުންޏަށް ލިބޭ ގޮތަށެވެ. މި ހިނގާ ޖުލައި މަހުގެ ނިޔަލަށް ނިންމަން ހަވާލުކުރި ބިން ހިއްކުމުގެ މަސައްކަތް ހުއްޓުނެވެ. މިނިވަން ދުވަހުގެ ޖަލްސާގައި ރައީސް ވިދާޅުވީ ރަސްމާލެ މަޝްރޫއުގެ މަސައްކަތްތައް ކުރިއަށްދާ ގޮތާއިމެދު ކަންބޮޑުވުންތަކެއް ހުރުމާއިއެކު ބައެއް ކަންކަމަށް ބަދަލު ގެނަސްފައިވާ ކަމަށެވެ. އަދި އަންނަ އަހަރުގެ މާޗު މަހުގެ ނިޔަލަށް ބިން ހިއްކައި ނިންމައިލާނެ ކަމަށްވެސް ރައީސް ވިދާޅުވި އެވެ.
ޕީއެންއެފްގެ ޖަލްސާއެއްގައި ޔާމީން ވާހަކަފުޅު ދައްކަވަނީ/ ފޮޓޯ: ޗެނަލް13
މި މަޝްރޫއާ ގުޅޭގޮތުން ވާހަކަ ދައްކަވަމުން ޔާމީން ވިދާޅުވީ ރަސްމާލެއާ ގުޅޭ ކަންބޮޑުވުންތައް އެންމެ ފުރަތަމަ ފާޅު ކުރީ ޕީއެންއެފްގެ އޮފީހުގައި ކަމަށެވެ. އެގޮތުން އެކަން ހިނގަނީ ގޯސްކޮށްކަމަށް ތަފްސީލީ ގޮތެއްގައި ހާމަ ކުރެއްވީ އައްބާސް އާދިލް ރިޒާކަމަށް ޔާމީން ވިދާޅުވި އެވެ.
"ކީއްވެގެންހޭ ރާޖޫގެ އެއްވެސް ވަރެއްގެ އެސެސްމެންޓެއް ނަހަދާ, ދިވެހި ސަރުކާރުން ހުރިހާ ސާމާނެއް ދިނީ. އެހެންވީމަ ކީއްވެގެންތޯއޭ އެ ވިދާޅުވަނީ އަޅުގަނޑުމެންނަށް (ރައީސް މުއިއްޒުއަށް) ކަމު ނުދިޔައޭ. ކީއްވެގެންތޯ ކަމު ނުދިޔަކަމުގެ ކްރެޑިޓް އޭނަ ނަގަން އެ މަސައްކަތް ކުރައްވަނީ"
ޔާމީން ވިދާޅުވީ ނަފްސާނީ އިލްމުގެ ތެރެއިން މިމައްސަލައިގައި ރައީސް މުއިއްޒުއަށް އޮލްޓަނޭޓިވްއެއް ހޯދަން ޖެހޭ ކަމަށެވެ. ރައީސް މުއިއްޒުއަކީ ގަސްތުގައި އިތުރުފުޅު ހައްދަވާ ބޭފުޅެއް ކަމުގައިވާނަމަ މައްސަލައެއް އެބަ އުޅޭ ކަމަށާއި ނަފްސާނީ އިލްމުގެ އަލީގައި މިކަން އޮޅުންފިލުވައިދެވޭނެ ކަަމަށް ވިދާޅުވި އެވެ.
ނަފްސާނީ ދެ ބައްޔެއްގެ ނަން ރައީސް ޔާމީން ގެންނެވި އެވެ. އެއް ބައްޔަކީ ބައި ޕޯލާ އެވެ. އަނެއް ބައްޔަކީ ސްކިޒޯފްރެނިއާ އެވެ. ޔާމީން ވިދާޅުވީ، ރައީސް ދެފަހަރު ދެގޮތަށް ވާހަކަ ދައްކަވާނަމަ ނުވަތަ އެއްފަހަރު ދައްކަވާ ވާހަކަ އަނެއް ފަހަރު ހަނދުމަފުޅު ނުހުންނަނަމަ ނަފްސާނީ މައްސަލައެއް އުޅޭ ކަމަށެވެ.
"އެހެންވެއްޖެއްޔާ މި ނިކުންނަނީ އެއަށްވުރެއް ބޮޑު ގާނޫނީ މައްސަލައެއް. ގާނޫނީ މައްސަލައަށް މި ވާގޮތަކީ ރައީސުލްޖުމްހޫރިއްޔާގެ ޝަރުތުތަކުގެ މައްސަލަ މި ނިކުންނަނީ"
ބުއްދި ސަލާމަތުން ހުރި މީހެއް ކަމުގައިވުމަކީ ރައީސުލްޖުމްހޫރިއްޔާގެ މަގާމުގައި ހުންނަވާ ބޭފުޅެއްގެ ޝަރުތެކެވެ. ރައީސް ޔާމީން އިޝާރާތް ކުރެއްވިފަދަ ނަފްސާނީ މައްސަލައެއް ހުރި މީހެއްނަމަ ރައީސުލްޖުމްހޫރިއްޔާކަމުގައި ނުހުންނެވޭނެ އެވެ.
ރޭގެ ޖަލްސާގައި ވާހަކަ ދެއްކެވި ލޯޔަރު އާސިފް ވިދާޅުވީ ރަސްމާލެ މަޝްރޫއުގައި ކަން ހިނގާދިޔަ ގޮތުން ރައީސް މުއިއްޒު އަކީ މުނާފިގެއްގެ ގޮތުގައި ސިފަކުރެއްވިދާނެ ކަމަށެވެ. މިހެން އާސިފް ވިދާޅުވީ ރައީސް މުއިއްޒު މުނާފިގުންގެ ސިފަތައް ބަޔާންކޮށް ދެއްކެވި ވާހަކަފުޅަކާއި ގުޅުވަ އެވެ.
ރައީސް ޔާމީން ވިދާޅުވީ ރައީސް މުއިއްޒުގެ ނަފްސާނީ މައްސަލައެއް ހުރީތޯ ނުވަތަ އެމަނިކުފާނަކީ މުނާފިގަކީތޯ ނިންމާނީ ރައްޔިތުން ކަމަށެވެ.
މާލެއާ ގާތްގަނޑަކަށް ވިއްސަކަށް މިނެޓު ދުރުގައި އޮތް ފުށި ދިއްގަރުފަޅު ހިއްކައިގެން ތަރައްގީކުރާ ސިޓީއަކީ ހުޅުމާލެއަށްވުރެއް ތިންގުނަ ބޮޑު ތަނެކެވެ. އެތަނަކީ މުޅި މާލެ ސަރަހައްދުގެ ބޯހިޔާވަހިކަމުގެ މައްސަލައަށް ހައްލެއް ގެނަސްދޭނެ މަޝްރޫއެއް ކަމަށް ރައީސް މުއިއްޒު ވިދާޅުވި އެވެ. ރަސްމާލެއާއި މާލެ ސިޓީ ގުޅުވައިލަން ނިންމާފައިވަނީ ކަނޑު އަޑިން އަޅާ ޓަނަލަކުންނެވެ.
