ތުރާކުނުގައި ވޯޓާ ބަންކަރިންގެ ހިދުމަތް އެމްޕީއެލުން ފަށަނީ
ތިލަދުންމަތި އުތުރުބުރީ ތުރާކުނުގައި ވޯޓާ ބަންކަރިންގެ ހިދުމަތް ފަށަން ނިންމާފައިވާ ކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ބުނެފި އެވެ.
އުތުރުގައި ފެށުމަށް ހަމަޖެހިފައިވާ މެރިޓައިމްގެ ހިދުމަތްތަކާ ގުޅޭގޮތުން މަޝްވަރާ ކުރުމަށް އެމްޕީއެލްގެ ސީއީއޯ މުހައްމަދު ވަޖީހް އިބްރާހީމާއި އެ ކުންފުނީގެ ބައެއް އިސްބޭފުޅުން ބުރާސްފަތި ދުވަހު ތުރާކުނަށް ޒިޔާރަތްކުރައްވައި، އެ ރަށު ކައުންސިލާ އެކު މަޝްވަރާ ބައްދަލުވުމެއް ވަނީ ބާއްވާފަ އެވެ.
އެ ބައްދަލުވުމުގައި ވާހަކަ ދައްކަވަމުން ވަޖީހް ވިދާޅުވީ ތުރާކުނު ކައުންސިލުން އެދިފައިވާ ގޮތަށް، އެ ރަށުގައި ވޯޓާ ބަންކަރިންގެ ހިދުމަތް ފޯރުކޮށްދިނުމުގެ އިންތިޒާމުތައް ހަމަޖައްސަވައިދެއްވާނެ ކަމަށެވެ. އެގޮތުން ވޯޓާ ބަންކަރިންގެ ހިދުމަތް ދޭން ބޭނުންކުރާ ފްލޯޓިން ބާޖް ތުރާކުނުގައި ބޭއްވުމަށް ހަމަޖެހިފައިވާ ކަމަށް ވަޖީހް ވިދާޅުވި އެވެ.
އެމްޕީއެލްގެ ސީއީއޯ ވިދާޅުވި ގޮތުގައި ތުރާކުނުގައި ވޯޓާ ބަންކަރިންގެ ހިދުމަތް ފެށުމާ އެކު، ރަށުގެ ރައްޔިތުންނަށް ވަޒީފާގެ އިތުރު ފުރުސަތުތައް ތަނަވަސްވެގެންދާނެ ކަމުގަ އެވެ.
އުތުރުގައި މެރިޓައިމްގެ ހިދުމަތް ފެށުމަށް ސަރުކާރުން ކުރަމުން އަންނަ މަސައްކަތްތަކުގެ ތެރެއިން އެ އަތޮޅު އުލިގަމުގައި ޔޮޓް މެރީނާއެއް ތަރައްގީކޮށް، މެރިޓައިމްގެ ބައެއް ހިދުމަތްތައް ފޯރުކޮށްދިނުމަށް އެ ރަށު ކައުންސިލާ އެކު އެމްޕީއެލުން ވަނީ ފަހުމުނާމާއެއްގައި ސޮއިކޮށްފަ އެވެ.
އިއްޔެވި އެއްބަސްވުމުގެ ދަށުން އެމްޕީއެލުން އުލިގަމުގައި ޔޮޓް މެރިނާއެއް ތަރައްގީކޮށް، ޔޮޓްތަކަށް ބޭނުންވާ ހިދުމަތްތައް އެ ރަށުން ފޯރުކޮށްދޭން ބޭނުންވާ ވަސީލަތްތައް ގާއިމުކުރާނެ އެވެ.
މި މަސައްކަތްތަކުގެ އިތުރުން އުތުރުގައި އިންޓަނޭޝަނަލް ބަންކަރިންގެ ހިދުމަތް ފެށުމަށް އެމްޕީއެލުން ކުރަން ޖެހޭ މަސައްކަތްތައް އެ ކުންފުނިން ދަނީ ކުރަމުންނެވެ.
