ރައީސް ވަހީދުގެ ތައުރީފް އިންޑިއާގެ ކޯސްޓް ގާޑަށް
މިދިޔަ ބުރާސްފަތި ދުވަހު އަވައްޓެރި ސްރީލަންކާގެ އިރުމަތީ އައްސޭރިފަށުން ދަތުރު ކުރަމުން ދިޔަ ތެޔޮބޯޓެއްގައި އަލިފާން ރޯވެ، އެ ހާދިސާގައި އިންޑިއާގެ ކޯސްޓު ގާޑުން ކުރިމަސައްކަތް ފާހަގަ ކޮށް އިންޑިއާގެ ކޯސްޓު ގާޑަށް ކުރީގެ ރައީސް ޑރ. މުހައްމަދު ވަހީދު ހަސަން މަނިކު ޝުކުރު އަދާ ކުރައްވައިފިއެވެ
އިއްޔެ ރައީސް ވަހީދު ކުރެއްވި ޓުވީޓެއްގައި ވިދާޅުވެފައިވަނީ، އިންޑިއާ ކަނޑުގެ ސަރަހައްދުގައި ބިޔަ ތެޔޮ ޓޭންކަރެއް ރޯވެގެން ހިނގި އަލިފާނުގެ ހާދިސާގެ ސަބަބުން ލަންކާގެ އިތުރަށް ރާއްޖެއަށް ވެސް އޭގެ ނޭދެވޭ އަސަރު ކުރާނެ ކަމަށެވެ.
އެހެން ނަމަވެސް އިންޑިއާގެ ކޯސްޓްގާޑްގެ މިންނަތް މަސައްކަތުން ސަރަހައްދުގައި ގުދުރަތީ ބޮޑު ކާރިސާއެއް ހިނގިޔަ ނުދީ ސަލާމަތް ކޮށްދިނީތީ އެ ގައުމުގެ ކޯސްޓްގާޑަށް ވަރަށް ބޮޑަށް ޝުކުރު އަދާ ކުރައްވާ ކަމަށް ރައީސް ވަހީދު ވިދާޅުވިއެވެ.
އެތެޔޮ ބޯޓުގައި ހިފާފައިވާ އަލިފާންގަނޑު ނިއްވާލުމަށާއި އޭގައި ތިބި މީހުން ސަލާމަތްކުރުމަށް ޓަކައި ގިނަ މަސައްކަތްތަކެއް އިންޑިއާގެ ކޯސްޓް ގާޑުން ވަނީ ކޮށްފައެވެ.
ޕެނަމާގެ "ދަ ނިއު ޑައިމަންޑް" ނަމަކަށް ކިޔާ އެ ޓޭންކަރުގައި އަލިފާން ރޯވެފައިވަނީ އިންޑިއަން އޮއިލް ކޯޕަރޭޝަނުން ޗާޓަރު ކޮށްގެން އެ ގަައުމުގެ ޕްރަދީފް ބަނދަރަށް ދިޔަ މަގުމަތީގައިކަމަށް ލަންކާގެ މީޑިއާތަކުން ބުނެއެވެ.
