ޕޭޕަލްގެ ގްލޯބަލް މާކެޓިންގެ ރައީސްއާއެކު މިނިސްޓަރު ސައީދު މަޝްވަރާކުރައްވައިފި

ރާއްޖެއަށް ޕޭޕަލްގެ ޚިދުމަތް ހޯދުމަށް ދިވެހި ސަރުކާރުން ކުރަމުންދާ މަސައްކަތުގެ ތެރެއިން ޕޭޕަލްގެ ގްލޯބަލް މާކެޓިންގެ ރައީސް ސުޒާން ކެރީރާއާއެކު އިކޮނޮމިކް މިނިސްޓަރު މުހައްމަދު ސައީދު މިއަދު މަޝްވަރާކުރައްވައިފި އެވެ. އޮންލައިންކޮށް ކުރިއަށް ގެންދިޔަ އެ ބައްދަލުވުމުގެ ފޮޓޯތައް މިނިސްޓަރު ސައީދު ވަނީ ދެންމެ އޭނާގެ ރަސްމީ އެކްސް އެކައުންޓުން ޕޯސްޓްކޮށްފަ އެވެ. ސައީދު ވިދާޅުވީ މަޝްވަރާ ކުރެއްވީ ޕޭޕަލް މެދުވެރިކޮށް ފައިސާ ލިބުމުގައި ދިމާވާ ދަތިތަކާ ގުޅޭ ގޮތުންނެވެ. "ޕޭޕަލް މެދުވެރިކޮށް ފައިސާ ލިބުމުގައި ދިމާވާ ދަތިތަކުން އަރައިގަތުމަށް ރާއްޖޭގެ އީ-ކޮމާސްއަށް އެހީތެރިވުމުގެ ގޮތުން ޕޭޕަލްގެ ޕްރެޒިޑެންޓް ފޮރ ގްލޯބަލް މާކެޓިން އާ އެކު މުހިންމު މަޝްވަރާއެއް ކުރެއްވި،" އިނގިރޭސި ބަހުން ސައީދު ލިޔުއްވާފައިވާ ޕޯސްޓްގައިވެ އެވެ.