ނޫސްވެރިކަމުގެ ދާއިރާއިން ޝަރަފުވެރިކަމުގެ އިނާމު މޫސައަށް
ރާއްޖޭގެ އެންމެ ފުންނާބު ނޫސްވެރިންގެ ތެރޭގައި ހިމެނޭ މޫސާ ލަތީފަށް ނޫސްވެރިކަމުގެ ޝަރަފުވެރިކަމުގެ އިނާމު ދީފި އެވެ.
މިއަދު ދަރުބާރުގެ ގޭގައި ބޭއްވި މިއަހަރުގެ ގައުމީ ދުވަހުގެ ޖަލްސާގައި އެ ޝަރަފު މޫސާ ލަތީފަށް ދީފައިވަނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެވެ.
މޫސަ, ނޫސްވެރިކަމުގެ ދާއިރާއަށް ވަދެވަޑައިގަންނެވީ 1980 ވަނަ އަހަރު އެވެ. ހަވީރު ނޫހުގެ އިތުރުން މިހާރު ނޫހުގައިވެސް މޫސަ މަސައްކަތްކުރައްވާފައިވެ އެވެ.
"މިހާރު" ނޫހުގެ އެޑިޓަރުކަންވެސް ކުރެއްވި މޫސާ މިހާރު މަސައްކަތް ކުރައްވަނީ 'ދައުރު އޮންލައިން'ގެ ޗީފް އެޑިޓަރުގެ މަގާމުގަ އެވެ.
ނޫސްވެރިކަމުގެ ދާއިރާއިން 2001 ވަނަ އަހަރުގައި ހިތްވަރު ދިނުމުގެ އިނާމާ ނޫސްވެރިކަމުގެ 50 ވަނަ އަހަރުގެ "ރިހި ގަލަން" އަދި "އަލިމަސް ޔޫބިލް" ގެ އެވޯޑްވެސް މޫސަ އަށް ލިބިވަޑައިގެންފައިވެ އެވެ.
މޫސަ ތައުލީމް ހާސިލުކުރީ މެލޭޝިއާގެ ލިމްކޮކް ވިން ޔުނިވާސިޓީން މާސް ކޮމިޔުނިކޭޝަންގެ ދާއިރާއިންނެވެ.
