ސިންގަމް 3 ގައި ޗުލްބުލް ޕާންޑޭވެސް ފެންނާނެ
ރޯހިތު ޝެއްޓީގެ ކޮޕް ޔުނިވާސްގެ "ސިންގަމް 3" ރިލީޒް ކުރަން ތައްޔާރުވަމުން ދާއިރު މިފިލްމުގެ ސެޓުގެ މަންޒަރެއް ލީކުވެއްޖެ އެވެ.
"ސިންގަމް" ފްރެންޗައިޒްގައި ލީޑް ރޯލު ކުޅެނީ އެކްޓަރު އަޖޭ ދޭވްގަން އެވެ. ބަތަލާގެ ގޮތުގައި ފެންނަނީ ކަރީނާ ކަޕޫރު ހާން އެވެ. މި ފްރެންޗައިޒްގެ ތިންވަނަ ސީކުއަލްގެ ޝޫޓިންތައް މިހާރު ކުރިއަށް ދާއިރު ފިލްމުގެ ބޮޑު ވަނީ ނިމިފަ އެވެ.
"ސިންގަމް 3" އިން ޑައިރެކްޓަރު ރޯހިތުގެ ކޮޕް ޔުނިވާސްގެ އެހެން ފިލްމުތަކުގެ އެކްޓަރުންވެސް ފެންނާނެ އެވެ. އެގޮތުން "ސިމްބާ" ގެ ލީޑް ތަރި ރަންވީރު ސިންގް އަދި "ސޫރްޔަވަންޝީ" ގެ ތަރި އަކްޝޭ ކުމާރުވެސް ފެންނާނެ އެވެ. މީގެ އިތުރުން މިފިލްމުގައި އަންހެން ކޮޕެއްގެ ގޮތުގައި ފެންނާނީ ދިޕިކާ ޕަދުކޯން އެވެ. އޭނާ އަކީ "ލޭޑީ ސިންގަމް" އެވެ.
"ސިންގަމް 3" ގައި ބޮޑު ސްޓާ ކާސްޓެއް ހިމެނޭއިރު ޓަރިގާ ޝްރޯފް، ޖެކީ ޝްރޯފް އަދި އަރުޖުން ކަޕޫރުވެސް ފެންނާނެ އެވެ. ދާދި ފަހުން ވައިރަލްވި ވީޑިއޯއަކުން ފެންނަ ގޮތުގައި އަޖޭއާއިއެކް އެކްޝަން މަންޒަރަކުން "ދަބަންގް" ފްރެންޗައިޒްގައި ކޮޕެއްގެ ރޯލު ކުޅުނު ސަލްމާން ހާންވެސް ހަރަކާތްތެރިވާނެ އެވެ. "ސިންގަމް 3" ގައި ސްޕެޝަލް އެޕިއަރެންސްއަކުން ސަލްމާން ފެންނާނީ ޗުލްބުލް ޕާންޑޭގެ ރޯލުންނެވެ.
މިފިލްމު ކުރިން ރިލީޒް ކުރަން ހަމަޖެހުނީ މި އަހަރުގެ އޯގަސްޓު މަހު އެވެ. އެހެންނަމަވެސް މިހާރު ހަބަރުތައް ބުނާ ގޮތުގައި "ސިންގަމް 3" ރިލީޒް ކުރާނީ ޑިސެމްބަރު މަހުގެ ތެރޭގަ އެވެ. ހަމަ އެމަހު ކާރްތިކް އާރްޔާން ލީޑް ރޯލު ކުޅޭ "ބޫލް ބުލައްޔާ 3" ވެސް ރިލީޒް ކުރާނެ އެވެ. އެހެންކަމުން އެ މަހަކީ ވަރަށް ވާދަވެރި މަހަކަށް ވާނެކަމަށް އޮތީ ބެލެވިފަ އެވެ.
