ލަސްވިޔަސް ދަރިވަރުންގެ ލޯނަށް ފައިސާ ދަނީ ދޫކުރަމުން: މާރިޔާ
ކިޔަވަން ލޯނު ދޭނެ ކަމަށް ލިޔުން ދޫކޮށްފައިވާ ދަރިވަރުންނަށް ސަރުކާރުން ދޫކުރަމުން އަންނަ ފައިސާ ދިނުމުގައި ލަސްވި ނަމަވެސް އެކަމުގައި އެއްވެސް ހުއްޓުމެއް އައިސްފައި ނުވާ ކަމަށް ހަޔަ އެޑިއުކޭޝަން، ލޭބަ އެންޑް ސްކިލްސް ޑިވެލޮޕްމަންޓް މިނިސްޓަރު ޑރ. މަރިޔަމް މާރިޔާ ވިދާޅުވެއްޖެ އެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މާރިޔާ ވިދާޅުވީ ރައްޔިތުން ބޭނުންވާ އަވަސް މިނުގައި ފައިސާ ދޫކުރުމުގައި ގޮންޖެހުންތަކެއް އެބަހުރި ކަމަށެވެ. އެހެންނަމަވެސް އެ މަސައްކަތަށް އެއްވެސް ހުއްޓުމެއް އައިސްފައި ނުވާ ކަމަށެވެ.
"މެދުކެނޑުމެއް ނެތި މިނިސްޓްރީގެ ވަސީލަތްތައް ހުރި ވަރަކުން އެކަމަށް ދަނީ މަސައްކަތް ކުރަމުން. ބަންދު ދުވަސްތަކުގައި މަސައްކަތް ކުރެވެމުންދޭ،" މާރިޔާ ވިދާޅުވި އެވެ.
ރައީސް ޑރ. މުހައްމަދު މުއިއްޒު ނިންމަވާފައި ވަނީ ޝަރުތު ހަމަވާ ހުރިހާ ދަރިވަރުންނަށް ލޯނު ދިނުމަށް ކަމަށްވާއިރު، މި އަހަރު ލޯނު ދިނުމަށް 1،300 އަށް ވުރެ ގިނަ ދަރިވަރުން ވަނީ ހޮވިފައި ކަމަށެވެ. އަދި މިދިޔަ އަހަރު ވެސް ގިނަ އަދަދެއްގެ ދަރިވަރުންނަށް ލޯނު ދިނުމަށް ނިންމާފައިވާ ކަމަށެވެ. އެހެންނަމަވެސް އެ ދަރިވަރުންގެ ތެރެއިން ގިނަ ދަރިވަރުންގެ ލޯނުގެ ފުރަތަމަ ޕޭމަންޓް ދިނުމުގެ މަސައްކަތް ކުރަން ޖެހުނީ އަދުގެ ސަރުކާރުން ކަމަށެވެ.
"މިދިޔަ އަހަރުގެ ދަރިވަރުންނާއި މި އަހަރުގެ ދަރިވަރުންނާ އަދި ލޯނުގައި ކިޔަވަމުންދާ ދަރިވަރުންނަށް ލޯނުގެ ފައިސާ ކޮންމެ ހަ މަހަކުން ހަ މަހަކުން މި ގެންދަނީ ދޫކުރަމުން. މި އަހަރުގެ މިހާތަނަށް 473 މިލިއަނަށް ވުރެ ގިނަ ރުފިޔާ ވަނީ ދޫކުރެވިފައި،" މާރިޔާ ވިދާޅުވި އެވެ.
މިނިސްޓަރު ވިދާޅުވި ގޮތުގައި މަތީ ތައުލީމު ހާސިލު ކުރުމަށް ލޯނު ދިނުމާއި ސްކޮލާޝިޕް ދިނުމާ އަދި ރާއްޖޭގައި ފުރަތަމަ ޑިގްރީއަށް ކިޔަވާ ދަރިވަރުންނަށް ސަރުކާރުން ހަރަދުކުރާނެ ކަމުގަ އެވެ. އެއްވެސް ކަމަކަށް ހުއްޓުމެއް ގެނައުމަކީ ސަރުކާރުގެ ވިސްނުމެއް ނޫންކަން ފާހަގަކުރެއްވި އެވެ.
ލޯނާއި ސްކޮލާޝިޕާއި ފުރަތަމަ ޑިގްރީއަށް ފައިސާ ދޫކުރުމުގައި ދިމާވާ ލަސްތައް މިނިސްޓަރުގެ ވާހަކައިގައި ވަނީ ވިދާޅުވެދެއްވާފަ އެވެ. އެގޮތުން ފާހަގަކުރެއްވި ކަންކަމަކީ:
- ލިޔެކިޔުންތައް ފުރިހަމައަށް ހުށަހަޅާފައި ނުހުރުން
- ލިބުން އެދޭ ފައިސާގެ އަދަދު އެއީ ޖަސްޓިފައި ކުރެވޭ އަދަދެއްކަން ދެނެގަންނާނެ ލިޔުން ހުށަހަޅާފައި ނުހުރުން
- ލޯނު ދޭން އިއުލާނު ކޮށްފައި އޮންނަ ގައުމު ނޫން އެހެން ގައުމަކަށް ދާން ބޭނުންވުމުން ދިމާވާ އިދާރީ ދަތިތައް
- ޔުނިވާސިޓީން ލިބެން ބޭނުންވާ ލިޔުން ނުލިބި ހުރުން
- ލިޔެކިޔުން ހަމަޖައްސަން ބޭނުންވާނެ ކަމަށް އަންދާޒާކޮށް ދަރިވަރުންނަށް އަންގާފައިވާ މުއްދަތު ނުލިބޭހާ ލަސްކޮށް ފައިސާ ލިބުމަށް އެދި ހުށަހެޅުން
Ads by STO
