ހަގީގީ ލޯބިވާނަމަ ބީހޭނީ އޭނަގެ ހިތުގައެވެ. ޖިސްމެއްގައި ނޫނެވެ.
ހަށިގަނޑަށާއި، ރޫފައަށް ބެލުމަށްފަހު ޙަޔާތުގެ ބައިވެރިޔާ އިޚުތިޔާރު ކުރުމަކީ މިއަދު އަޅުގަނޑުމެންގެ މުޖުތަމައުގައި ފެންނަމުންދާ ވަރަށް ހިތާމަވެރި މަންޒަރެކެވެ. ގިނަފަހަރަށް އެފަދަ ދިރިއުޅުން ހުއްޓުމަކަށް އަންނާކަށް މާ ގިނަ ދުވަސްތަކެއް ވެސް ނުނަގައެވެ. މިފަދަ ލޯތްބަށް ހަގީގީ ލޯބި ކިޔަންވީ ތޯއެވެ؟
ކޮންމެ މީހަކުވެސް ބޭނުންވަނީ އެހެން މީހުންނަށް ދައްކަން ނަމަވެސް ސިފައިން ރީތި ބައިވެރިއެއް އިޚުތިޔާރު ކުރާށެވެ. އެހެންނަމަވެސް ތިބާއަށް އޭގެން ވަކި ފައިދާއެއް ލިބޭހެއްޔެވެ؟ ވިދާ ކޮންމެ އެއްޗަކީ ރަނެއް ނޫނޭ ބުނާ އަޑު އަހަމުހެއްޔެވެ؟ ހަމަ މިފަދައިން ސިފަ ރީތި ކޮންމެ މީހަކީ ތިމާގެ ޙަޔާތުގެ ބައިވެރިއަކަށް ހަދަން އެންމެ ރަނގަޅު މީހާއެއް ނޫނެވެ.
ވީއިރު ސުވާލަކީ ބައިވެރިއެއް އިޚްތިޔާރު ކުރާއިރުގައި ސިފަ ރީތިވުމަށް ނުބަލަންވީ ހެއްޔެވެ؟ ނޫނެކެވެ. ޙަޔާތުގެ ބައިވެރިއެއް އިޚުތިޔާރު ކުރާއިރުގައި ދުރު ވިސްނުމުން ވިސްނައި، އޭނާގެ އަޚުލާގާއި އަޅާލުމާއި އޯގާތެރިކަން ވެސް ތިބާއަށް މުހިންމު ވާނެ ނޫންތޯއެވެ؟ ހަމައެކަނި ރީތި ސިފައެއް ނުވަތަ ހަށިގަނޑެއް ހުރުމުން ފުދުނީ ނޫނެވެ. އަޅާލުމާއި އޯގާވެރިކަން ވެސް ބޭނުންވެއެވެ.
ޖިސްމު ދެކެ ލޯބި ވުމަކީ އެއީ ލޯތްބެއް ނޫނެވެ. އެއީ ތިމާގެ އެދުންތައް ފުއްދުމަށްޓަކައި ތިމާގެ ސިކުނޑިއަށް ސަވާރުވެފައިވާ ނުބައި ޝައިޠާނީ އަމަލެވެ. ހަގީގީ ލޯބިވެރިންނަކީ ޖިސްމަށްވުރެން ތިމާގެ ސިއްހަތަށް ހެޔޮ އެދޭ ، ފަރުވާތެރިވާ އަދި ތިމާއަށް ދީނީ ކަންކަން ކުރުމަށް ބާރު އަޅާ މީހުންނެވެ.
އާދޭހެވެ. ހަގީގީ ލޯބިވެރިން ހޯދުމަކީ ފަސޭހަކަމެއް ނޫނެވެ. ލޯތްބަކީ ސިފަޔަށް ބަލައިގެން ވާ އެއްޗަކަށް ވަނީ ނަމަ ދުވާލެއްގެ މައްޗަށް ތިމާއަށް ކިތައް ކިތައް މީހުންދެކެ ލޯބި ވެވޭހެއްޔެވެ؟ އަދަދު ނުކުރެވޭނެކަން ގައިމެވެ. ހަގީގީ ލޯބިވެރިން ހޯދުމަކީ އުނދަގޫ ކަމަކަށް ވިޔަސް ނުވާނޭ ކަމެއް ނޫނެވެ. ކޮންމެ މަހަކަށް ގަލެއް ވެޔޭ ބުނާ ބީދައިން ކޮންމެ މީހަކަށް ވެސް މިދުނިޔޭގައި ކޮންމެވެސް މީހަކު ވާނެއެވެ.
ލޯބިވެރިއެއް ހޯދަން މަސައްކަތް ކުރާއިރުގައި އެންމެ ފުރަތަމަ ތިމާގެ އަމިއްލަ ނަފުސު ދެކެ ލޯބިވާށެވެ. ދެން އެއަށް ފަހު ލޯބި ހޯދަން މަސައްކަތް ކުރާށެވެ. އިރާދަ ކުރެއްވިއްޔާ ތިމާއަށް ހަގީގީ ލޯތްބަކީ ކޮބައިކަން އެނގި އެ ލޯބި ހާސިލު ކުރުމުގައި ކާމިޔާބު ވާނެއެވެ.
