Tuesday, 17 November 2026
Advertisement
HDC — Share-Below (leaderboard)
ސަރުކާރު

އާރުއެސްޑަބްލިޔުގެ މައުލޫމާތު މަސްވެރިންނާއި ކައުންސިލުތަކަށް ދޭން ޓީމުތައް އަތޮޅުތަކަށް

އާރުއެސްޑަބްލިޔުގެ މައުލޫމާތު މަސްވެރިންނާއި ކައުންސިލުތަކަށް ދޭން ޓީމުތައް އަތޮޅުތަކަށް
މަސްދޯނިފަހަރުގައި ލޮނުފެނުން މަސް ފިނިކުރާ ނިޒާމު (އާރުއެސްޑަބްލިޔު) ނިޒާމު ގާއިމުކުރުމުގެ މަޝްރޫއާ ގުޅޭގޮތުން މަސްވެރިންނާއި ކައުންސިލުތަކަށް މައުލޫމާތު ދިނުމަށް އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަން (އެސްޑީއެފްސީ) އާއި ފިޝަރީޒް މިނިސްޓްރީގެ ޓީމުތައް ރާއްޖޭގެ އެކި އަތޮޅުތަކަށް ފުރައިފި އެވެ. އެސްޑީއެފްސީ އާއި މިނިސްޓްރީގެ ޓީމުތައް މި ހަފުތާގައި ހަރަކާތްތެރި ވާނީ ތ. ހިރިލަންދޫ އާއި އެ އަތޮޅު ވޭމަންޑޫ، ޅ. ނައިފަރު, ށ. ކޮމަންޑޫ އަދި ހއ. އިހަވަންދޫގަ އެވެ. ފިޝަރީޒް މިނިސްޓްރީން ބުނީ މި ދަތުރުތަކުގައި އެ ފެސިލިޓީއަށް ހުށަހެޅުމަށް ބޭނުންވާ އޮޑިވެރިންނަށް އެހީތެރިކަން ފޯރުކޮށްދިނުމުގެ މަސައްކަތް ކުރާނެ ކަމަށެވެ. ރާއްޖޭގެ އެންމެ ދެކުނުގެ ހަތަރު އަތޮޅުގައި މަސްވެރިކަންކުރާ 100 ވަރަކަށް ދޯނި ހަރަކާތްތެރިވާއިރު، އޭގެ ތެރެއިން 70 ދޯނީގައި އާރުއެސްޑަބްލިޔު ސިސްޓަމް ވަނީ ހަރުކޮށްފަ އެވެ. އެ ސިސްޓަމް ހަރުނުކުރަނީ 30 ދޯނީގަ އެވެ. އެ ހަތަރު އަތޮޅުގައި ދުވާލަކަށް 450 ޓަނުގެ އައިސް އުފެއްދޭ 12 ޕްލާންޓް ހުރެ އެވެ. ނަމަވެސް މަސްވެރިކަން ރަނގަޅު ދުވަސްވަރެއްގައި ދޯނިތަކަށް އެކަށީގެންވާ އައިސް ފޯރުކޮށެއް ނުދެވެ އެވެ. ހުވަދޫގައި މަސްވެރިކަމުގައި ހަރަކާތްތެރިވާ 160 ދޯނި އޮންނައިރު، މަސްވެރިކަަން ރަނގަޅު ދުވަސްވަރު އައިސް ލިބުމުގެ ދަތިކަން ކުރިމަތިވެ އެވެ. މަސް ބޭނުމަށްފަހު މަހުގެ ޓެމްޕަރޭޗާ ދަށްކުރުމަކީ ވަރަށް މުހިންމު ކަމެކެވެ. އެކަން ކުރެވެނީ މަސް ފިނިކޮށްގެނެވެ. މަސް މަރުވުމަށް ފަހު މަހުގައި "ހިސްޓަމިން" ކިޔާ މާއްދާއެއް އިތުރުވެ އެވެ. ވަކި ވަރަކަށް ވުރެ އެ މާއްދާ އިތުރުވެފައިވާ މަސް ބޭނުން ކުރުމުން ހަށިގަނޑަށް ގެއްލުންވެ އެވެ. ބައެއް ފަހަރު މަހުގެ ބާވަތްތައް ކަމުގައިވާ ހިކިމަސް ނުވަތަ ރިހާކުރު ބޭނުންކުރާއިރު އަނގަ ކަހާ ގޮތްވަނީ މަހުގައި "ހިސްޓަމިން" އިތުރުވުމުންނެވެ. ވުމާ އެކު މަހުގެ ތާޒާކަން ދެމެހެއްޓުމަށް އާރުއެސްޑަބްލިޔު ސިސްޓަމް ދޯނީގައި ހަރުކުރުމަކީ މުހިންމު ކަމެއް ކަމަށް ފިޝަރީޒް މިނިސްޓްރީން ބުނެ އެވެ. އެކަމުގެ ސަބަބުން އައިސް ހޯދަން ދަތުރުކުރަން ޖެހޭ ޖެހުން މަދުވެ، ފަސޭހައިން އައިސް ލިބުމާ އެކު މަހުގެ ތާޒާކަން ދެމެހެއްޓޭނެ ކަމަށެވެ.

އާރުއެސްޑަބްލިޔު ސިސްޓަމް:

  • ޖެނެރޭޓަރު ސެޓް
  • ސޯލާ ޕީވީ ސިސްޓަމް
ފިޝަރީޒް މިނިސްޓްރީ އާއި އެސްޑީއެފްސީ ގުޅިގެން ދޫކުރާ އެ ލޯނަކީ އިސްލާމީ ޝަރީއާގެ ހަމަތަކާ އެއްގޮތަށް ދޫކުރާ ލޯނެކެވެ. ފައިނޭންސިން ހަމަޖެހިފައި ވަނީ އެސްޑީއެފްސީން "އާރުއެސްޑަބްލިޔު ފައިނޭންސިން" ނަމުގައި ހުޅުވާފައިވާ އިސްލާމިކް ފައިނޭންސިން ސްކީމް މެދުވެރިކޮށެވެ. މިއީ ރަހުނަކާ ނުލައި ހަ މަސް ދުވަހުގެ ގްރޭސްޕީރިއަޑާ އެކު، 2 މިލިއަން ރުފިޔާ އާ ހަމައަށް ދޫކުރާ ލޯނެކެވެ. ލޯނަށް އެދި ހުށަހެޅުމުގެ ފުރުސަތު ހުޅުވާލާފައި ވަނީ އެސްޑީއެފްސީގެ ޕޯޓަލް މެދުވެރިކޮށެވެ. އެޕްލިކޭޝަންތައް ލިބޭ މިންވަރަކުން ޝަރުތު ހަމަވާ ފަރާތްތަކުގެ އެޕްލިކޭޝަންތައް ޕްރޮސެސްކުރުމުގެ މަސައްކަތް ކުރިއަށް ގެންދާނެ ކަމަށް މިނިސްޓްރީން ބުނެ އެވެ. އެޕްލިކޭޝަން ބަލައިގަތުމުގެ ސުންގަޑިއަކީ އަންނަ މަހުގެ 30 ވަނަ ދުވަހެވެ. މަޝްރޫއާ ގުޅުންހުރި އިތުރު މައުލޫމާތު ފިޝަރީޒް މިނިސްޓްރީގެ ނަންބަރު 30333434   އަދި އެސްޑީއެފްސީގެ ނަންބަރު 1613 އާ ގުޅުމުން ލިބޭނެ އެވެ.

ރިއެކްޝަން

Advertisement
HDC — Sidebar (box)

ކޮމެންޓް

މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.