އެމްޑީޕީއަށް ބޯމަތިވެފައިވާ ވިލާތަކަކީ 2023 ގެ ގަދަ ވިއްސާރަ!

މި ދުވަސްވަރު ރާއްޖޭގެ ސިޔާސީ މަޝްރަހުގައި ބުންއަޑު ކިޔާފައި ދެކެވޭ އެއްވާހަކައަކީ އެމްޑީޕީގެ ރައީސް މުޙައްމަދު ނަޝީދު އިސްވެ ހުންނަވައިގެން، މި ސަރުކާރުގެ އިކޮނޮމިކް މިނިސްޓަރު ފައްޔާޒު އިސްމާޢީލް ބޭރުކޮށްލަން އާދެ ވަކި ކުރަން ކުރަމުންދާ މަސައްކަތުގެ ވާހަކައެވެ. "އިންޑިއާ އައުޓު" އަދި "ފައްޔާޒު އައުޓު " މިިއީ ފަތު އަޑު ކިޔާފަ ގަދަވަމުންދާ ދެ މައުޟޫއެވެ.

ކޮންމެއަކަސް ފައްޔާޒާއި ދެކޮޅަށް ފާޅުގައި ސީދާ ނިކުމެ ހުންނެވީ އެމްޑީޕީގެ ރައީސްއެވެ. ޕެޓިޝަނެއް ހަދައި ސޮއިކުރަމުން ދާއިރު، އެމްޑީޕީގެ 65 މަޖިލިސް މެންބަރުންގެ ތެރެއިން އަދި ސޮއި ކުރީ 30 މެންބަރުންނެވެ. އެމްޑީޕީގެ ޕީޖީ ގުރޫޕުން 3 ލައިން ވިޕެއް ނެރެވޭނީ 33 ވޯޓު ޔަގީން ކުރެވިގެންނެވެ.

ރައީސް ނަޝީދަށް ވީ ވަރެއް ކޮށްގެން، އެމަނިކުފާނު ވިދާޅުވާ، ހިތާއި ހިތުގެ ގުޅުމުގެ ތެރެއިންވެސް އެމަނިކުފާނަށް ހަމަކުރެވުނު ވަރު ހަމަވީކަމަށް ބަލައި ވަޓްސް އަޕް ގުރޫޕުގައި ފައްޔާޒަށް ވަނީ ބަހުގެ އެތައް ހަމަލާތަކެއް ރައްދުކޮށްފައެވެ. އެމްޑީޕީއަށް ރަނގަޅު ގޮތަކީ ފައްޔާޒު ދުރަށް ޖެހިލުން ކަމަށް ވިދާޅުވެފައިވާއިރު، ބުރޯ ހެދިގެން އެމްޑީޕީ ތެރޭގައި ނޫޅެވޭނެ ކަމަށް ވެސް ވަނީ އަންގާފައެވެ.

އޭގެ ފަހުން މިދިޔަ ބުދަ ދުވަހު ރައީސް ނަޝީދު ވަނީ އެމްޑީޕީއަށް ސިޓީއެއް ފޮނުއްވާފައެވެ. އެ ސިޓީގައި ފައްޔާޒަށް ކޮރަޕްޝަންގެ އިނގިލިތައް ދިއްކޮށްފައިވާ ކަން ފާހަގަވެއެވެ. އަދި ފައްޔާޒު މަގާމުން ބޭރުކޮށްދޭން ވެސް ވަނީ އެދިލައްވާފައެވެ. އެމްޑީޕީގެ ޗެއަރޕާސަން ހަސަން ލަތީފުވެސް ވަނީ ރައީސް ނަޝީދަށް ބައިއަތު ހިފާ، ފައްޔާޒާއި ދެކޮޅަށް ސޮއިކޮށްފައިކަން ފާހަގަކޮށްލެވެއެވެ.

އުފެދޭ ސުވާލުތައް ވަރަށް ގިނައެވެ. މި ސަރުކާރުގައި ކޯލިޝަން ޕާޓީތަކުގެ ވަޒީރުންނާއި، މަސައްކަތުގެ ފެންވަރު ދަށް ވަޒީރުންނާއި، ހިލަމެއްވެސް ނުވާ ވަޒީރުން ތިއްބެވިއިރު، ފައްޔާޒުގެ ފުލުން ނުނެއްޓި ރައީސް ނަޝީދު އުޅުއްވަން ޖެހޭ ސަބަބެކެވެ. މަސްވެރިންގެ ބޮޑު މެޖޯރިޓީއެއް އެމްޑީޕީއަށް ކުރި ތާއީދު ގެއްލެމުންދާއިރު، މިނިސްޓަރު ޒަހާއަށް ތައުރީފުކުރައްވާފައި އެންމެ އެކްޓިވް އެއް ވަޒީރު ފަހާ ދުވަން ޖެހޭ ސަބަބެވެ.

އެމްޑީޕީ އުފެދިގެން އަދާހަމައަށް އައިއިރު އެމްޑީޕީގެ ތެރެއިން ފެންނަ އެންމެ ޑިމޮކްރެޓިކް ސިފައަކީ ރައީސް ނަޝީދާއި ދެކޮޅުވެއްޖެނަމަ ނުވަތަ ރައީސް ނަޝީދާއި ޖެހިއްޖެ ނަމަ ޕާޓީން ނަގާ ހޫރާލާކަމެވެ. މާޒީގެ ތެރެއަށް ފީނާލަމާތޯއެވެ.

އެމްޑީޕީގެ ކުރީގެ ރައީސް އިބްރާހިމް އިސްމާއިލް، އެ ޕާޓީން ބޭރުކޮށްލީ ސީދާ ރައީސް ނަޝީދު އިސްވެ ހުންނަވައިގެންނެވެ. އެކި ގޮތްގޮތުން ދުއްޕާން ކުރަމުން ގޮސް އިބްރާއަށް ކެތްނުވެގެން ޕާޓީ ދޫކޮށްލީއެވެ. އެ ޕާޓީގެ ކުރީގެ ރައީސް ޑރ.މުނައްވަރަށް ވެސް ދިމާވީ ރައީސް ނަޝީދުގެ ނުފޫޒެވެ. އެ ޕާޓީގެ ކުރީގެ ރައީސް ޑރ.ޑީޑީ އެ މަގާމަށް އިންތިޚާބުވެ ވަޑައިގަތީ ރައީސް ނަޝީދުގެ ކެންޑިޑޭޓް ބަލިކޮށް އާންމުންގެ ލޯތްބާއި ތާޢީދާއި ވޯޓާއެކުގައެވެ. ނަމަވެސް ޑީޑީ ވެސް އައުޓުކޮށްލީއެވެ.  އެ ޕާޓީގެ ކުރީގެ ނައިބު ރައީސް އަލްހާން ފަހުމީއަށް ވެސް މިފަދައިން ދިމާވިކަމަށް ހުދު އަލްހާން ވެސް ވަނީ ވިދާޅުވެފައެވެ.

އެއަށްފަހު 2018 ގައިވެސް ކިރިޔަ ކިރިޔާވެސް ވާން އޮތިއްޔާ ވެރިކަމަށް ރައީސް ނަޝީދަށް ކުރިމަތިލެވޭނެ ހުރިހާ ފޯމިއުލާއެއް ހޯއްދެވިއެވެ. ޕްރައިމަރީގައި ގިނިކަންޏާ ވާދަކުރައްވާ ކާމިޔާބު ކުރެއްވިއެެވެ. ޓިކެޓް އެރުއްވިއެެވެ. ނަމަވެސް އާޚިރުގައި އެކަން އެގޮތަށް ނުވާނެކަން ޔަގީންވުމުން، ފަހަތަށް ޖެހިވަޑައިގަތުމަށްފަހު ޒަމާންވީ ބެސްޓް ފްރައިންޑްގެ ނަން ހުށަހެޅީއެވެ. އެހެން މީހަކަށް ފުރުސަތެއް ނެތް ގޮތަށެވެ.

ވެރިކަން ލިބި، ރައީސް ޞާލިހު ވެސް އެމްޑީޕީ މެމްބަރުންގެ މެދުގައި މަގުބޫލު ޝަހުޝަކަށްވެ، ސިޔާސީ ރޭހުގައި ހީރޯއަކަށް ވެދާނެ ކަމުގެ ބިރު އިންތިހާއަށް ބޮޑުވެއްޖެއެވެ. ކުރިން މީހުން ކިޔަމުން އައި ރައީސް ނަޝީދުގެ ނަން ރައީސް ޞާލިހަށް ބަދަލުވެ، ޕާޓީގެ ގައުމީ މަޖިލީހާއި، ސުޕަރ މެޖޯރިޓީ އޮތް ރައްޔިތުންގެ މަޖިލީހުގައި ރައީސް ނަޝީދުގެ މައްޗަށް ރައީސް ޞާލިހު ކުރި ހޯއްދަވައިފިއެވެ.

ރައީސް ޞާލިހުގެ ސަރުކާރުގައި އެމަނިކުފާނު އެންމެ އިތުބާރު ކުރައްވާ އެއް ވަޒީރަކީ ފައްޔާޒެވެ. އަދި ފައްޔާޒަކީ ފާޅުގައި ގަޓްގައި ކަންކަން ކޮށް ނިންމާ، މީހެއްގެ ބިރަށް ފަސްޖެހޭނެ މީހެއް ނޫންކަން ހުދު ރައީސް ނަޝީދު ވެސް ޔަގީން ކުރާނެއެވެ. އެހެންކަމުން ސަރުކާރާއި، މެންބަރުން އަދި ރައްޔިތުންނާއި ގުޅުވާލާ ބްރިޖުގެ އެއް ތަނބަކީ ފައްޔާޒު އިސްމާޢީލެވެ. ބޯގަންވިިލާގޭ ފައްޔާޒެވެ.

ކޮންމެއަކަސް ރައީސް ނަޝީދުގެ ވިސްނުންފުޅު ހުރީ ސީދާ 2023 އަށެވެ. އެކަން އެދޭނަމަ މި ސަރުކާރު ބަލިކަށި ކޮށްލަން އެބަ ޖެހެއެވެ. ރައީސް ޞާލިޙަށް ކަމެއް ނުކުރެވި ފެއިލް ވަމުންދާއިރު ހަގީގީ މަންޒަރު ދައްކަން އެބަޖެހެއެވެ. މީޑިއާގެ ކުރިމަތީގައި ބެސްޓް ފްރައިންޑުން ވިޔަސް ސިޔާސީ މައިދާނުގެ ރޭހުގައި ބާރަށް ދުއްވާ ދެ އަހުން ކުރި ހޯދާނީ ހުރިހާ ގޮތަކުންވެސް މޮޅު އަހެކެވެ.

ފައްޔާޒު ބޭރުކޮށްލާ ރައީސް ޞާލިހު ބަލިކަށިކޮށްލުމަށްފަހު މި ރޭހުގައި ކުރި ހޯދަން ރައީސް ނަޝީދު އެ ހުންނެވީ ފޫގަޅާފައެވެ. އަރިހުގައި އެމަނިކުފާނަށް ސަނީ ކިޔުއްވާ، މެންބަރުންނާއި، ކިޔަވައިގެން ތިބި ޖާހިލުން ވެސް އެދަނީ ހަރަކާތްތެރިވަމުންނެވެ.

ވިލާގަނޑުތައް ބޯމަތިވެ، އެމްޑީޕީގެ ތަރިކަ މުދާ ބަހާ ހިސާބަށް މިއޮތްގެން ދަނީއެވެ. ޕާޓީގެ ރައީސްއާއި، އެ ޕާޓީގެ އެންމެ އިސްލީޑަރު ދައްކަވާ ވާހަކަ ދިމައެއް ނުވެއެވެ. ކޮޅިގަނޑު ފެށިގެން މިއޮތް ދަނީއެވެ. ބަނަވެ، ކަނޑު ގަދަކޮށްފިއެވެ. 2023 އައުމުގެ ކުރިންވެސް ގަދަ ވަޔާ ވިއްސާރައާއެކު އުދަ އަރާފާނެކަމަށް ސިޔާސީ މާހިރުން ދަނީ ލަފާކުރަމުންނެވެ. ގެއްލުންވާ މިންވަރެއް އެނގޭނީ އުދަ އަރާ ނިމުމުންނެވެ.