ވަގުތީ ބުޅާ ފެސިލިޓީ އަންނަ މަހު 2 ވަނަ ދުވަހު ހުޅުވަނީ
ހުޅުމާލޭ ދެވަނަ ފިޔަވަހީގައި މާލޭ ސިޓީ ކައުންސިލުން ގާއިމްކުރާ ބުޅާ ފެސިލިޓީގެ ފަހުގެ މަސައްކަތް ނިންމާ، މި އަންނަ މަހުގެ 2 ވަނަ ދުވަހުގައި ހުޅުވާނެ ކަމަށް އެގްރިކަލްޗާ އެންޑް އެނިމަލް ވެލްފެއާ މިނިސްޓަރީން ބުނެފި އެވެ.
އެ މިނިސްޓްރީން ބުނީ މި ފެސިލިޓީގެ މަސައްކަތް އެއްކޮށް މިހާރު ނިމިފައިވާ ކަމަށެވެ. އަދި މާލޭ ސިޓީ ކައުންސިލާ ހަވާލުކޮށްގެން ކުރިއަށްގެންދާ މި މަސައްކަތުގެ ދަށުން މިހާރު ކުރިއަށް ދަނީ ހުޅުވުމަށް ވާންޖެހޭ އެންމެފަހުގެ ތައްޔާރީތައް ކަމަށް މިނިސްޓްރީން ބުންޏެވެ.
މާލެ ސިޓީ ކައުންސިލުން ވަނީ ޖަނަވާރުންނަށް ފަރުވާދިނުމަށް ހާއްސަ ޑޮކްޓަރަކާއި ހާއްސަ ދެ ނަރުހުން ހޯދުމަށް އިއުލާންކޮށްފަ އެވެ.
މި އިއުލާންއާއެކު މާލެ ސިޓީ ކައުންސިލުން ބުނީ ވެޓެރިނަރީ ޑޮކްޓަރުގެ މުސާރައަކީ 35،000 ރުފިޔާ އަދި ވެޓެރިނަރީ ނަރުހުންގެ އަސާސީ މުސާރައަކީ 8،130 ރުފިޔާ ކަމަށެވެ. އަދި ސާވިސް އެލަވަންސް ގެ ގޮތުގައި މަސައްކަތްކުރާ ކޮންމެ ދުވަހަކަށް 100 ރުފިޔާ ކަނޑައަޅާފައިވާއިރު، އިތުރު ގަޑީގައި މަސައްކަތް ކުރާނަމަ، މުސާރައިގެ 35 ޕަސެންޓް ލިބޭނެކަމަށްވެސް މާލެ ސިޓީ ކައުންސިލުން އިއުލާންގައި ބުނެފައި ވެއެވެ.
މި ފެސިލިޓީން ލިބޭ ހިދުމަތްތަކުގެ ތެރޭގައި އާންމު ޗެކަޕްތަކާއި، ފަރުވާތަކާއި، އަދި އޮޕަރޭޝަންތަކުގައި ވެޓެރިނޭރިއަނަށް އެހީތެރިވުމާއި ވެޓެރިނޭރިއަން އަންގާ ގޮތުގެ މަތިން ބުޅަލަށް ބޭސް ދިނުމާއި، ކާންދިނުމާއި، ބޭސްއެޅުން ހިމެނެ އެވެ. އަދި އިންޖެކްޝަން ޖެހުމާއި، ލޭ ނެގުމާއި، ކުޑަކަމުދާ ތަކެތި ޓެސްޓްކުރުމާއި އެ ނޫންވެސް ބަލި ދެނެގަތުމަށް ކުރާ ޓެސްޓުތައް ކުރުމާއި، އެނެސްތީސިއާ ބެލެހެއްޓުމާއި އޮޕަރޭޝަނަށް ފަހު ރިކަވަރީގައި ތިބޭ ބުޅާތަކަށް ބޭނުންވާ ފަރުވާ ދިނުންވެސް މި ފެސިލިޓީގައި ހިމެނެ އެވެ.
މާލެ ސިޓި ކައުންސިލާއި ހަވާލުކޮށްގެން ކުރިއަށްގެންދާ ބުޅާ ފެސިލިޓީތައް ކުރިއަށް ގެންދިއުމަށް ހަމަޖެހިފައިވަނީ ފިޔަވަހިތަކަކަށް ބަހާލައިގެންނެވެ.
އެގޮތުން ފުރަތަމަ ބުޅާތައް ތިބޭނެ ތަނެއް ގާއިމް ކުރި ނަމަވެސް، ފަހުން ވެޓް ކްލިނިކެއް ގާއިމްކުރެވި، ބުޅަލުގެ އިތުރުން އޮޅު ކޮށްގެން ގެންގުޅޭ އެހެން ދިރޭތަކެއްޗަށް ފަރުވާ ދެވޭނެ އިންތިޒާމުވެސް ގާއިމްކުރުމަށް ވަނީ ނިންމާފަ އެވެ.
މި ފެސިލިޓީގެ އަމަލީ މަސައްކަތް ފަށާފައިވަނީ މިދިޔަ މާޗް މަހުގެ 19 ވަނަ ދުވަހުގަ އެވެ.
މާލޭގެ މަގުތަކުގައި ބުޅާ ގިނަވުމުގެ ސަބަބުން އެކަމަށް ހައްލެއް ގެނައުމަށް ރައީސް ޑރ. މުހައްމަދު މުއިއްޒުގެ މޭޔަރުކަމުގައި މަސައްކަތް ފެއްޓެވި އެވެ. އެންމެ ފުރަތަމަ ފާސްކުރީ 1.5 މިލިއަން ރުފިޔާގެ ބަޖެޓަކާ އެކު ވިލިމާލޭގައި އެކަން ކުރުމަށެވެ.
ނަމަވެސް އެކަން ބަދަލުކޮށް ހުޅުމާލޭ ދެވަނަ ފިޔަވަހީގައި ބުޅާ ފެސިލިޓީ އަޅަނީ މިނިސްޓްރީ އަށް ދީފައިވާ 5000 އަކަފޫޓުގެ ބިމެއްގަ އެވެ.
