އެޗްއާރުސީއެމުން ގޮވާލީ ނޮޅިވަރަންފަރު ހައުސިން ޔުނިޓް ލިބޭ މީހުންގެ ލިސްޓް ބާތިލުކުރަން
ހދ. ނޮޅިވަރަންފަރުގައި އިމާރާތްކުރާ ހައުސިން ޔުނިޓް ލިބޭ މީހުންގެ ވަގުތީ ލިސްޓް ބާތިލުކުރުމަށާއި ކަމާ ގުޅޭ އުސޫލު އިސްލާހުކޮށް، އަލުން އިއުލާނު ކުރުމަށް ހިޔުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް) އިން އެ ރަށު ކައުންސިލަށް އަންގައިފި އެވެ.
ސަރުކާރުގެ ބޯހިޔާވަހިކަމާއި ގެދޮރުވެރިކަމުގެ ސިޔާސަތުގެ ދަށުން އަމިއްލަ ގެދޮރު ނެތް ފަރާތްތަކަށް ބޯހިޔާވަހިކަން ފޯރުކޮށްދިނުމަށް ހިންގާ ބޯހިޔާވަހިކަމުގެ ޕްރޮގްރާމުގެ ތެރެއިން "ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ހދ. ނޮޅިވަރަންފަރުގައި އިމާރާތްކުރާ 100 ހައުސިން ޔުނިޓް ދޫކުރުމަށް ހަމަޖެހިފައިވާ އުސޫލު" ގައި ރައްޔިތުން ކަންބޮޑުވާ ކަންތައްތަކެއް ހުރި ކަމަށް ބުނެ، އެ ރަށުގެ 279 ރައްޔިތަކު ސޮއިކޮށް އެޗްއާރުސީއެމަށް ޕެޓިޝަނެއް ހުށަހެޅި އެވެ.
ޕެޓިޝަނުގައި ރައްޔިތުން ފާހަގަކޮށްފައިވާ ކަންބޮޑުވުންތައް ހިޔުމަން ރައިޓްސް ކޮމިޝަނުގެ ގާނޫނުގެ ދަށުން އެ ކޮމިޝަނުން ވަނީ ތަހުގީގުކޮށްފަ އެވެ.
މައްސަލަ އާ ގުޅިގެން ކޮމިޝަނުގެ ތަހުގީގުން ފާހަގަކުރެވޭ ކަންކަމަށް ރިއާޔަތްކޮށް އެޗްއާރުސީއެމުން މިއަދު ނެރުނު ނޫސް ބަޔާނުގައި ބުނީ އެ އުސޫލު މިހާރު އެކުލަވާލާފައި އޮތްގޮތުގެ ސަބަބުން އުސޫލުގެ ދަށުން ހައުސިން ޔުނިޓުތައް ދިނުމަށް ކަނޑައަޅައިފި ނަމަ، އެކަމަށް އެދި ފޯމު ހުށަހަޅާފައިވާ ފަރާތްތަކަށް ގާނޫނު އަސާސީ އާއި ގާނޫނުތަކުން ކަށަވަރުކޮށްދީފައިވާ ހައްގުތައް ގެއްލިގެން ދިއުމުގެ ފުރުސަތު އޮތް ކަމަށެވެ.
އުސޫލު އިސްލާހުކޮށް، މިހާރު ފޯމު ހުށަހަޅާފައިވާ ފަރާތްތަކުގެ ފޯމް އަލުން ރީ-އިވެލުއޭޓް ކުރުމަކީ އެންމެ އިންސާފުވެރި ގޮތް ކަމަށް ނުބެލެވޭ ކަމަށް އެޗްއާރުސީއެމުން ބުނެ އެވެ.
އެހެންވެ މިހާރު އިއުލާނުކޮށްފައިވާ ވަގުތީ ލިސްޓު ބާތިލު ކުރުމަށް ކޮމިޝަނުން ވަނީ ނޮޅިވަރަންފަރު ކައުންސިލުގެ އިދާރާއަށް އަންގާފަ އެވެ.
އޭގެ އިތުރުން ކޮމިޝަނުގެ ރިޕޯޓުގައި ބަޔާންކޮށްފައިވާ ކަންބޮޑުވުންތަކަށް ހައްލެއް ލިބިގެންދާނެ ގޮތަށް އުސޫލު އިސްލާހުކޮށް، އަލުން އިއުލާނު ކުރުމަށާ އަދި އެކަން ކުރާއިރު ގާނޫނު އަސާސީ އާއި ކަމާ ގުޅުންހުރި ގާނޫނުތަކުން ކަށަވަރުކޮށްދީފައިވާ ހައްގުތައް ހަނިނުވާނޭ ގޮތަށް އުސޫލު އެކުލަވާލުމަށް ވެސް ވަނީ އަންގާފަ އެވެ.
އެޗްއާރުސީއެމުން އިތުރަށް ބުނި ގޮތުގައި އެ ކޮމިޝަނުގެ އެންގުމާ ހިލާފުވެއްޖެ ނަމަ، ކޮމިޝަނުގެ ގާނޫނުގައިވާ ގޮތުގެ މަތިން އަމަލު ކުރެވޭނެ ކަމުގަ އެވެ.
ހައުސިން ޔުނިޓުތަކާ ގުޅޭގޮތުން ހުށަހެޅުނު މައްސަލަ ކޮމިޝަނުން ބަލައި ނިންމައި، މި މައްސަލަ އާ ގުޅިގެން ނިންމާފައިވާ ގޮތް ނޮޅިވަރަންފަރު ކައުންސިލުގެ އިދާރާ އާއި ހައުސިން، ލޭންޑް އެންޑް އާބަން ޑިވެލޮޕްމަންޓް މިނިސްޓްރީ އާއި ލޯކަލް ގަވަމަންޓް އޮތޯރިޓީ އަދި މައްސަލަ ހުށަހެޅި ފަރާތާ ހިއްސާކޮށްފައިވާ ކަމުގަ އެވެ.
