ގުޅީފަޅުން ގޯތި ލިބުނު މީހުންގެ ގުރުލުން އަންގާރަ ދުވަހު
ބިންވެރިޔާ ސްކީމްގެ ދަށުން ގުޅީފަޅުން ގޯތި ލިބުނު މީހުންގެ ގުރުލުން އަންނަ އަންގާރަ ދުވަހު ބާއްވަން ނިންމައިފި އެވެ.
ހައުސިން، ލޭންޑް އެންޑް އާބަން ޑިވެލޮޕްމެންޓުން ސަރުކާރު ގެޒެޓުގައި އިއްޔެ ޝާއިއުކުރި އިއުލާނެއްގައި ބުނީ އެ ގުރުލުން ކުރިއަށްދާނީ މިދިޔަ ސަރުކާރުގައި ގިރާވަރުފަޅުން ދޫކުރި ގޯތި ލިބުނު މީހުންގެ ތެރެއިން ގުޅީފަޅަށް ގޯތި ބަދަލުކުރި މީހުންނާއި ގުޅީފަޅުން ގޯތި ލިބުނު މީހުންނަށް ކަމަށެވެ.
ހައުސިން މިނިސްޓްރީން ބުނީ އެ ބަދަލަކީ "ގުޅީފަޅުގެ ލޭންޑް ޔޫސް ޕްލޭން"ގެ ދަށުން އައިސްފައިވާ ބަދަލެއް ކަމަށެވެ.
އެގޮތުން ކުރިން ބިންވެރިޔާ ސްކީމުގެ ދަށުން ގުޅީފަޅުން ގޯތި ލިބިފައިވާ ފަރާތްތަކުގެ ގޯތީގެ ލޮކޭޝަނަށް ބަދަލު އައިސްފައިވާ ކަމަށްވެސް އެ މިނިސްޓްރީން ބުންޏެވެ.
ހައުސިން މިނިސްޓްރީން ބުނީ ގުޅީފަޅުން ގޯތި ލިބުނު މީހުންނަށް ބިން ލިބޭ ޕްލޮޓް ކަނޑައެޅުމަށް ބާއްވާ ގުރުލުން އޮންނާނީ އަންގާރަ ދުވަހު ހެނދުނު 9:00 އިން ފެށިގެން ދަރުބާރުގޭ ރަންނަބަނޑޭރި މާލަމުގައި ކަމަށެވެ.
ގުޅީފަޅުން ބިން ލިބޭ ފަރާތްތަކުން ގުރުލުން ހަމަޖެހިފައިވާ މާލަމަށް ވަދޭވޭނެ ކަމަށް މިނިސްޓްރީން ބުންޏެވެ. އަދި ބިން ލިބޭ ފަރާތެއްގެ ބަދަލުގައި އެހެން ފަރާތަކުން ހާޒިރުވާނަމަ، ބިން ލިބޭ ފަރާތުގެ އިއުތިރާޒެއް ނެތް ކަމުގެ ލިޔުމަކާ އައިޑީކާޑުގެ ކޮޕީ އަކާއެކު ހާޒިރުވުމަށްވެސް މިނިސްޓްރީން އެދިފައިވެ އެވެ.
ގުރުލުމުގެ އިވެންޓް ކުރިއަށްދާ ވަގުތު ދައުލަތުގެ މީޑިއާ "ޕީއެސްއެމް" އިން ލައިވް ކުރުމަށް ހަމަޖެހިފައިވާ ކަމަށްވެސް ހައުސިން މިނިސްޓްރީން ބުންޏެވެ.
ގުޅީފަޅުން ގޯތި ލިބޭ މީހުންގެ ލިސްޓެއް އިއުލާނާއެކު އާންމުކޮށްފައިވާ ކަމަށް މިނިސްޓްރީން ބުންޏެވެ.
ގުޅީފަޅުން ދޫކުރި ގޯތީގެ އަދަދާއި ބޮޑުމިން:
- 1250 އަކަފޫޓުގެ 669 ގޯތި
- 1650 އަކަފޫޓުގެ 1234 ގޯތި
- 2050 އަކަފޫޓުގެ 916 ގޯތި
- 2450 އަކަފޫޓުގެ 473 ގޯތި
- 2850 އަކަފޫޓުގެ 158 ގޯތި
- 3250 އަކަފޫޓުގެ 49 ގޯތި
- 3650 އަކަފޫޓުގެ 21 ގޯތި
އަދި ގުރުލުން ކުރިއަށްދާނީ މިނިސްޓްރީން އެކުލަވާލާފައިވާ ލިސްޓުގައިވާ ތަރުތީބުން، އެކަމަށް ކަނޑައަޅާފައިވާ މިނިސްޓްރީގެ މުވައްޒަފުން ކަމަށްވެސް މިނިސްޓްރީން ބުންޏެވެ.
ޖުމްލަ 3،520 ގޯތި ދޫކުރަން ހަމަޖެހިފައިވާއިރު ގޯތި ލިބޭ މީހުން ގުރުލުން ނިމުމުން، ގޯތިތަކުގެ ރަޖިސްޓްރީ އާއި ބިން ލިބޭ މީހުންނާއެކު އެއްބަސްވުން ތަކާއި ގުޅޭ މައުލޫމާތު ހައުސިން މިނިސްޓްރީ އިން ފަހުން ހިއްސާ ކުރާނެކަމަށް އިއުލާންގައިވެ އެވެ.
Ads by STO
