މޫސުން ގޯސްވުމާ ގުޅިގެން ބްރިޖުގެ މަސައްކަތަށް ދަތިވާ ކަމަށް ބުނެ ދައްކާ އުޒުރު ގަބޫލެއް ނުކުރެވޭ: މުއްތޮލިބު
މޫސުމީ ގޮތުން ދިމާވާ ކަންތައްތަކާ ގުޅުވާ މާލެ ތިލަފުށި ބްރިޖް މަޝްރޫއުގެ މަސައްކަތް ކުރުމަށް ދަތިވާ ކަމަށް ބުނެ މަސައްކަތް ކުރަމުންދާ ކޮންޓްރެކްޓަރު އެފްކޮންސްއިން ދައްކާ ސަބަބުތައް ގަބޫލު ނުކުރެއްވޭ ކަމަށް ކޮންސްޓްރަކްޝަން އެންޑް އިންފްރާސްޓްރަކްޗަ މިނިސްޓަރު ޑރ. އަބްދުﷲ މުއްތޮލިބު ވިދާޅުވެއްޖެ އެވެ.
ގްރޭޓާ މާލެ ކަނެކްޓިވިޓީ - މާލެ ތިލަފުށި ލިންކް މަޝްރޫއުގެ މަސައްކަތުގެ 45.8 އިންސައްތަ މަސައްކަތް މިހާތަނަށް ވަނީ ކޮށްފަ އެވެ. އެގޮތުން ޕްރީކާސްޓް ސެގްމަންޓްސްގެ 43.5 އިންސައްތަ އާއި ތަނބުތަކުގެ ޕައިލިންގެ 79.5 އިންސައްތަ މަސައްކަތް ވަނީ ނިންމާފަ އެވެ. ޕައިލް ކެޕްގެ 67.8 އިންސައްތަ އަދި ޕިއަ ކޮމްޕްލެކްސްގެ 62.2 އިންސައްތަ މަސައްކަތްކޮށްފައިވެ އެވެ.
އިންފްރާސްޓްރަކްޗަ މިނިސްޓްރީން ހިންގަމުން އަންނަ މަޝްރޫއުތަކާ ގުޅޭގޮތުން މައުލޫމާތު ދިނުމަށް ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މުއްތޮލިބު ވިދާޅުވީ ރާއްޖެ ފަދަ މާހައުލެއްގައި މަސައްކަތް ކުރުމުގެ ތަޖުރިބާ މަޝްރޫއުގެ މަސައްކަތް ކުރަމުންދާ އެފްކޮންސްގެ ނެތުމުގެ ސަބަބުން މަސައްކަތް ކުރުމުގައި ދަތިތަކާ ކުރިމަތިވެ މަސައްކަތް ލަސްވެފައިވާ ކަމަށެވެ.
ސަރުކާރާ ހަވާލުވިއިރު، މިދިޔަ ނޮވެމްބަރު މަހުގެ 16 ވަނަ ދުވަހު ސަޕްލިމެންޓްރީ އެގްރިމެންޓެއްގައި ސޮއިކޮށްފައިވާ ކަމަށެވެ. އޭގައި ބަޔާންކޮށްފައިވާ 30 މަސް ދުވަހަކީ ޕްރޮޖެކްޓް ނިންމަން އެކަށީގެންވާ ވަގުތެއް ކަމަށް ގަބޫލުކުރައްވާ ކަމަށެވެ. ކޮންޓްރެކްޓަރު އޭގެ ކުރިން މަސައްކަތް ކުރަމުން ގެންދިޔަ ގޮތަށް ބަލާއިރު 30 މަސް ދުވަހުގެ ތެރޭގައި މަސައްކަތް ނިމޭނެ ކަމަށް ފެންނަ ކަމުގައި ފާހަގަކުރެއްވި އެވެ. އަދި އެ "ކޮންފިޑެންސް" އެފްކޮންސްއިންނާއި ކޮންސަލްޓެންޓްގެ ފަރާތުން ލިބިފައިވާ ކަމަށެވެ.
"އެހެންނަމަވެސް އަޅުގަނޑު ފާހަގަކޮށްލަން ބޭނުންވޭ މޫސުމީ ގޮތުން މި އަންނަ ކަންތައްތަކާ ގުޅިގެން ކަނޑުގަދަވުމާ މިފަދަ ކަންތައްތަކާ ގުޅުވާލައިގެން ކޮންޓްރެކްޓަރުގެ ފަރާތުން ބައެއް ފަހަރު ސަބަބު ދައްކައިގެން ބައެއް މަސައްކަތްތައް ލަސްވާކަން،" މުއްތޮލިބު ވިދާޅުވި އެވެ.
މާބޮޑުތަން ލަސްވާ ކަމަށް ނުފެނުނު ނަމަވެސް ބައެއް "ކްރިޓިކަލް" މަސައްކަތްތައް ބޭނުންވާ ދުވެލީގައި ކުރިއަށް ނުދާ ކަމަށެވެ. އޭގެ ތެރޭގައި ޑީޕް ސީ ޕައިލިންގެ މަސައްކަތް ހިމެނޭ ކަމަށާއި އެ މަސައްކަތް އެންމެ ބޭނުންވާ ދުވެލީގައި ނުކުރެވޭ ކަމަށެވެ.
"ކޮންޓްރެކްޓަރަށް މިހާރު އަޅުގަނޑުމެން ފާހަގަކޮށްފައިވާނެ، އަޅުގަނޑުމެން ގަބޫލު ނުކުރާކަން ކަނޑުގަދަވެގެން މި އަންނަ ކަމަކީ، އެ ބޭފުޅުންނަށް ސަބަބެއް ގޮތުގައި ދައްކައިގެން މަސައްކަތް ލަސްކުރުމަށް މުއްދަތެއް ހޯދުމަށް އޮތް ފުރުސަތެއް ކަމަކަށް،" މުއްތޮލިބު ވިދާޅުވި އެވެ.
މިނިސްޓަރު ވިދާޅުވި ގޮތުގައި އިތުރުކުރި 30 މަސް ދުވަހުގެ މުއްދަތަކީ ސަރުކާރުން ހުށަހަޅައިގެން ދިން 30 މަސް ދުވަސް ނޫން ކަމުގަ އެވެ.
އެއީ ކޮންޓްރެކްޓަރު ޕްރޮޖެކްޓް ނިންމޭނެ ކަމަށް ސަރުކާރަށް ހުށަހަޅައިގެން ސަރުކާރުން އެކަމަށް އެއްވެސް ބަދަލެއް ގެނައުމެއް ނެތި ދީފައިވާ މުއްދަތެއް ކަމުގަ އެވެ. އެހެންނަމަވެސް އެގޮތަށް އެއްބަސްވެފައި ވަނީ ކޮންޓްރެކްޓްގައި އިތުރު އެއްވެސް ސަބަބަކާ ހުރެ ވެސް ދީފައިވާ މުއްދަތު އިތުރު ނުކުރެވޭނެކަން ބަޔާންކޮށްފައިވަނިކޮށް ކަމުގަ އެވެ.
މަސައްކަތް ކުރަމުން ދަނީ އިންޑިއާ ސަރުކާރާ އަދި އެފްކޮންސް އާ ގުޅިގެން ލަސްވާ "ކްރިޓިކަލް" މަސައްކަތްތައް އަވަސް ކުރުމަށް ކަމަށާއި ޝެޑިއުލާ އެއްގޮތަށް މަސައްކަތް ކުރިއަށް ގެންދެވޭނެ ކަމަށް ގަބޫލުކުރެއްވޭ ކަމުގައި މުއްތޮލިބު ފާހަގަކުރެއްވި އެވެ.
