"މިސް ޔުނިވާސް"ގައި ދިވެއްސަކު ބައިވެރިވުން ސަރުކާރުން ކުށްވެރިކޮށްފި
ދުނިޔޭގެ އެކި ގައުމުތަކުން ވާދަކޮށް ބާއްވާ "މިސް ޔުނިވާސް" ގައި ދިވެއްސަކު ބައިވެރިވުމުން ސަރުކާރުން އެކަން ކުށްވެރިކޮށްފި އެވެ.
މިނިސްޓްރީ އޮފް ޔޫތު އެމްޕަވަމަންޓް، އިންފޮމޭޝަން އެންޑް އާޓްސް އިން ނެރުނު ބަޔާނެއްގައި ބުނީ މެކްސިކޯގައި ބޭއްވުމަށް ހަމަޖެހިފައިވާ "މިސް ޔުނިވާސް" ގައި ދިވެހިން ދީނާއި އަގީދާއާއި ސަގާފަތް ނުގުޅޭ ހަރަކާތްތަކާއި މުބާރާތްތައް ބޭއްވުމާއި އަދި އެކިއެކި ފަރާތްތަކުން ބާއްވާ އެފަދަ މުބާރާތްތަކާއި ހަރަކާތްތަކުގައި ދިވެހިން ބައިވެރިވުމަކީ ދިވެހި ސަރުކާރުން ބަލައިގަންނާނެ ކަމެއް ނޫން ކަމަށެވެ.
މިނިސްޓްރީން ބުނީ މިފަދަ މުބާރާތެއްގައި ދިވެއްސަކު ބައިވެރިވުމަކީ ދިވެހިން ގަބޫލު ކުރާ އާންމު އަހުލާގީ މިންގަނޑުތަކާއި އުސޫލުތަކާވެސް ހިލާފު ކަންކަމަށްވާއިރު، ރާއްޖެ ތަމްސީލް ކުރުމުގެ ނަމުގައި ދިވެއްސަކު އެފަދަ ހަރަކާތްތަކަށް ދިއުމުގައި ސަރުކާރުގެ ބައިވެރިވުން އޮތް ގޮތައް ދެކެވޭ ވާހަކަތަކަކީ ދޮގު ވާހަކަތަކެއް ކަމަށެވެ.
މީގެއިތުރުން މިނިސްޓްރީން ބުނީ މިފަދަ މުބާރާތެއްގައި ދިވެއްސަކު ބައިވެރިކުރުމަކީ ސަރުކާރުން ކުރާނެ ކަމެއް ނޫން ކަމަށެވެ. އަދި އެއީ ސަރުކާރުން ކުރުވާ ކަމެއްކަން ދޭހަވާ ގޮތައް މައުލޫމާތު ނުފެތުރުމަށާއި، އެފަދަ މުބާރާތްތަކުގައި ދިވެހިން ބައިވެރި ނުވުމަށްވެސް ސަރުކާރުން ވަނީ ގޮވާލާފަ އެވެ.
މި މުބާރާތުގައި ބައިވެރިވުމަށް މަސައްކަތް ކުރަމުންދާ ފަރާތްތަކުން އެކަން ހުއްޓާލުމަށްވެސް ސަރުކާރުން ވަނީ ގޮވާލާފަ އެވެ.
މި މުބާރާތް އަންނަ މަހުގެ 14 ވަނަ ދުވަހު ފަށާއިރު، ރާއްޖެ ތަމްސީލް ކުރުމުގެ ނަމުގައި ދިވެއްސެއްގެ ގޮތުގައި ބައިވެރިވެފައިވަނީ އުމުރުން 21 އަހަރުގެ މޮޑެލް، މަރިޔަމް ޝައިނާ ނަސީމެވެ.
އިންޑިއާގައި ހުންނަ މެކްސިކޯގެ އެމްބަސީން އިއްޔެގައި ކުރި ޓްވީޓެއްގައި ބުނީ މި މުބާރާތުގައި ބައިވެރިވެ، މެކްސިކޯއަށް ދިއުމަށް ޝައިނާއަށް ވިސާ ހަމަޖައްސައިދީފައި ވާކަމަށެވެ.
މެކްސިކޯއިން އިންޑިއާއަށް ކަނޑައަޅުއްވާފައި ހުންނަވާ ސަފީރު ޑިއޭގޯ ޕެރެޒް ވަނީ ޝައިނައާ ބައްދަލުކުރައްވައި، ކާމިޔާބު ލިބޭނެ ކަމަށް އުއްމީދުކުރައްވާ ކަމަށްވެސް ވިދާޅުވެފަ އެވެ.
Ads by STO
