248 ސިޔާސީ މުވައްޒަފުން މަދުކޮށް ޕާފޯމެންސް ބަލާ ނިޒާމަކަށް އަމަލު ކުރަން ފަށަނީ
248 ސިޔާސީ މުވައްޒަފުން މަދުކޮށްފައިވާ ކަމަށާއި މުވައްޒަފުންގެ ޕާފޯމެންސް ބަލަން ނިޒާމެއް ގާއިމުކޮށް، ވަރަށް އަވަހަށް އަމަލުކުރަން ފަށާނެ ކަމުގައި ޗީފް ސްޕޯކްސްޕާސަން ހީނާ ވަލީދު ވިދާޅުވެއްޖެ އެވެ.
ދައުލަތުގެ ހަރަދު ކުޑަކުރުމުގެ ގޮތުން އަޅާ ފިޔަވަޅެއްގެ ގޮތުގައި 228 ސިޔާސީ މުވައްޒަފުން ވަކިކުރަން ނިންމަވާފައިވާކަން ރައީސް ޑރ. މުހައްމަދު މުއިއްޒު ހާމަކުރެއްވީ މިދިޔަ މަހުގެ 15 ވަނަ ދުވަހު އެވެ. ވިދާޅުވީ އިކޮނޮމިކް ރިފޯމް އެޖެންޑާގެ ދަށުން އެ މުވައްޒަފުން 15 ދުވަހުގެ ތެރޭގައި ވަކިކުރުމަށް އަންގާފައިވާނެ ކަަމަށެވެ.
ވަކިކުރަން ނިންމެވި ސިޔާސީ މުވައްޒަފުންގެ ތެރޭގައި 7 ސްޓޭޓް މިނިސްޓަރުންނާއި 43 ޑެޕިއުޓީ މިނިސްޓަރުންނާއި 109 ސީނިއާ ޕޮލިޓިކަލް ޑިރެކްޓަރުންގެ އިތުރުން 69 ޕޮލިޓިކަލް ޑިރެކްޓަރުން ހިމެނޭ ކަމަށެވެ. މި ބަދަލާ އެކު ދައުލަތުގެ ބަޖެޓުން މަހަކު 5.7 މިލިއަން ރުފިޔާ ސަލާމަތްވާނެކަން ރައީސް ފާހަގަކުރެއްވި އެވެ.
"އެކްސް" ގައި މިއަދު ކުރި ޕޯސްޓެއްގައި ހީނާ ވިދާޅުވީ ސަރުކާރުގެ އިކޮނޮމިކް ރިފޯމް އެޖެންޑާގެ ދަށުން ހަރަދު ކުޑަކުރުމުގެ ފިޔަވަޅުތައް އަޅަމުންދާ ކަމަށެވެ. އެގޮތުން އަޅަމުންދާ ފިޔަވަޅުތަކުގެ ތެރެއިން އިއްޔެގެ ނިޔަލަށް 248 ސިޔާސީ މުވައްޒަފުން މަދުކުރެވިފައިވާ ކަމަށެވެ.
"ހަމަ އެ އާއެކު ސިޔާސީ މުވައްޒަފުންގެ މަސައްކަތުގެ ފެންވަރު ބަލާ، ކުރުންތެރިކަން އިތުރު ކުރުމަށް ސިޔާސީ މުވައްޒަފުންގެ ޕަފޯމަންސް ބަލާނެ ނިޒާމެއް ގާއިމް ކުރުމަށް ކެބިނެޓުން މިހާރު ވަނީ ނިންމާފައި،" ހީނާ ވިދާޅުވި އެވެ.
މި ނިޒާމަށް ވަރަށް އަވަހަށް އަމަލު ކުރަން ފަށާނެކަން ޗީފް ސްޕޯކްސްޕާސަން ފާހަަގަކުރެއްވި އެވެ.
ސިޔާސީ މަގާމުތައް މަދު ކުރުމުގެ އިތުރުން ޝަރުއީ ދާއިރާގެ އިސްވެރިންނާއި މަޖިލިހުގެ މެމްބަރުންނާއި މިނިވަން މުއައްސަސާތަކާއި ސަރުކާރު ހިއްސާވާ ކުންފުނިތަކުގެ އިސްވެރިންގެ އިތުރުން ސިޔާސީ މުވައްޒަފުންގެ މުސާރައިން 10 އިންސައްތަ ދެ އަހަރު ދުވަހުގެ މުއްދަތަށް އުނިކުރަން ނިންމަވާފައިވާކަން ވެސް މިދިޔަ މަހު ރައީސް ވަނީ ހާމަކުރައްވާފަ އެވެ.
ވިދާޅުވެފައިވާ ގޮތުގައި އަންނަ އަހަރަށް ލަފާކޮށް ހުށަހަޅާ ދައުލަތުގެ ބަޖެޓުގައި ހަރަދު ކުޑަކުރުމުގެ މަގުސަދުގައި ގިނަ ފިޔަވަޅުތަކެއް ހިމަނާނެ ކަމުގަ އެވެ. އެގޮތުން ބޭންކުތައް ފިޔަވައި ސަރުކާރު ކުންފުނިތަކުގެ މުވައްޒަފުންގެ މުސާރައިން 10 އިންސައްތަ އުނިކުރާނެ ކަމަށާއި ކުންފުނިތަކުގެ ވެރިންނަށް އެންމެ ބޮޑުކޮށް ދެވޭނީ 90،000 ރުފިޔާ ކަމުގައި ކަނޑައަޅުއްވާނެ ކަމުގަ އެވެ.
އިސްލާހީ ފިޔަވަޅުތައް އެޅުމުގައި 12،000 ރުފިޔާއަށް ވުރެ މަދުން މުސާރަ ލިބޭ މުވައްޒަފުން އިސްތިސްނާ ކުރާނެ ކަމުގައި ފާހަގަކުރެއްވި އެވެ.
އިގުތިސޯދީ އިސްލާހީ އެޖެންޑާގެ ދަށުން ގިނަ ފިޔަވަޅުތަކެއް އަޅަން ނިންމާފައިވާކަން ހާމަކުރެއްވިއިރު، އެމަނިކުފާނު ވަނީ ލިބިވަޑައިގަންނަވާ މުސާރައިން 50 އިންސައްތަ އުނިކުރެއްވުމަށް ނިންމަވާފަ އެވެ.
