ކޯސްޓްގާޑުގެ ސްޕެޝަލް ބޯޓް ސްކޮޑްރަން އިފްތިތާހުކޮށްފި
މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) ކޯސްޓްގާޑްގެ ސްޕެޝަލް ބޯޓް ސްކޮޑްރަން އެސްބީއެސް އިފުތިތާހުކޮށްފި އެވެ.
ނަސްރުގެ ދުވަހުގެ މުނާސަބަތުގައި އިއްޔެ ހަވީރު ޖުމްހޫރީ މައިދާނުގައި ބޭއްވި ހަރަކާތުގެ ތެރެއިން، އެސްބީއެސް އިފްތިތާހުކޮށްދީފައިވަނީ ރައީސުލްޖުމްހޫރިއްޔާ ޑރ، މުހައްމަދު މުއިއްޒު އެވެ.
އެމްއެންޑީއެފްގެ ރަސްމީ ވެބްސައިޓްގައި ޝާއިއުކޮށްފައިވާ ހަބަރެއްގައި ބުނީ އެސްބީއެސްއަކީ އެމްއެންޑީއެފް ކޯސްޓްގާޑްގެ ތެރޭގައި ހާއްސަ ތަމްރީނު ލިބިފައިވާ އެލީޓް މެރިޓައިމް ޔުނިޓެއް ކަމަށެވެ. އަދި އެއީ މެރިޓައިމް ޑޮމެއިންގައި ރެޕިޑް ރެސްޕޮންސްއާއި ހައި ސްޓޭކްސް އޮޕަރޭޝަންތަކަށް ހާއްސަ ޔުނިޓެއް ކަމަށްވެސް އެމްއެންޑީއެފް އިން ބުންޏެވެ.
މީގެ އިތުރުން އެމްއެންޑީއެފް އިން ބުނީ އެ ޔުނިޓަކީ، އަންޑަވޯޓާ ޑެމޮލިޝަންއާއި، ޓެރަރިޒަމްގެ އުދުވާންތަކާއި، ކަނޑުފޭރުމާއި، އާމްޑް ރޮބެރީގެ އިތުރުން މަސްތުވާތަކެތީގެ ވަގުފާރިއާއި، ގަވާއިދާ ހިލާފަށް މަސްވެރިކަން ކުރުން ފަދަ އަމަލުތަކާ ދެކޮޅަށް ހިންގާ އޮޕަރޭޝަން ތަކުގައި ހަރަކާތްތެރިވުމަށް ތަމްރީނުދެވި، އެފަދަ ހާލަތްތަކަށް އަބަދުވެސް ތައްޔާރީ ހާލަތުގައި ތިބޭނެ ފައުޖެއް ކަމަށެވެ.
އެ ބޯޓަކީ އިންޑިއާ ކަނޑުގެ ސަލާމަތާއި ރައްކާތެރިކަމަށް އެހީތެރިވުމާއި، ރާއްޖޭގެ ދިފާއީ ސިޔާދަތު ކަށަވަރުކުރުމަށް ރައީސް މުއިއްޒުގެ ސަރުކާރުން ކުރައްވާ މަސައްކަތައް އިތުރުވެގެންދާނެ ބޮޅެއް ކަމަށް އެމްއެންޑީއެފް އިން ބުންޏެވެ.
ނަސްރުގެ ދުވަހުގެ މުނާސަބަތުގައި އިއްޔެ ހަވީރު ކުރިއަށްގެންދިޔަ ހަރަކާތުގައި، ދައުލަތުގެ ވަޒީރުންނާއި، ރައްޔިތުން މަޖިލީހުގެ ބައެއް މެންބަރުންނާއި، ސަރުކާރުގެ އިސްވެރިންނާއި އެހެނިހެން އިއްޒަތްތެރިންގެ އިތުރުން އެމްއެންޑީއެފްގެ ޖެނެރަލް އޮފިސަރުން ބައިވެރިވެވަޑައިގެންފައިވެ އެވެ.
